Ecclesiastes 12 - Samarenyo Meaning-Based Bible (1984)

¹ Sanglit hinumdomi an iyo Magburuhat samtang nga batan-on pa kamo, nga diri pa naabot adton magsulob-on nga mga adlaw ngan mga tuig, nga masiring kamo, “Waray ako makagpahimulos han kinabuhi.”

² Amo ito nga panahon nga magmamadulom ha iyo an kapawa han adlaw, han bulan, ngan han mga bitoon, ngan diri na gud magpapapas an magdakmol nga mga dampog.

³ Niyan mangungurog an iyo mga butkon nga nagpanalipod ha iyo, ngan manluluya an iyo mga bitiis nga magkusog pa yana. Kulang na an iyo mga ngipon hin pagsamsam han iyo kinakaon, ngan magmamadaparap an pagkita han iyo mga mata.

⁴ Diri na mabati an iyo mga durunggan han aringasa ha kalsada. Makuri na kamo makabati han aringasa han gilingan o han tokar han mga turonggan, kundi mapupukaw kamo ha iyo pagkaturog bisan la han honi hin tamsi.

⁵ Mahalawhaw para ha iyo an higtaas nga mga dapit ngan makuri na an iyo paglakat. Pag-uubanon na kamo; magsasagodsod na an iyo pagpitad, ngan mawawaray na an ngatanan nga mga hingyap. Mauli kita ha aton kataposan nga pahuwayan, ngan niyan magkakamay-ada pagkasubo ha mga kadalanan.

⁶ Mauutod an kadena nga salapi, ngan mahuhulog ngan mabubuong an suga nga bulawan; mauutod an pisi ha atabay ngan mabubuong an biso hin tubig.

⁷ Mabalik ha tapotapo han tuna an aton mga lawas, ngan mabalik an aton espiritu ngadto sa Dyos nga naghatag hini ha aton.

⁸ Waray la kapulsanan, waray la kapulsanan, nagsiring an Magwarali. Waray la kapulsanan ini ngatanan!

An Paghugpong han Ngatanan

⁹ Kundi tungod nga may kinaadman an Magwarali, nagpadayon hiya hin pagtutdo han mga tawo han iya hinbaroan. Nag-aram hiya hin mga darahonon ngan ginsarihan niya an ira kamatuoran.

¹⁰ Nagtalinguha an Magwarali hin pamiling hin nakakaliaw nga mga pulong, kundi tangkod an mga pulong nga iya ginsurat.

¹¹ An mga puplonganon han mga may kinaadman sugad hin tais nga mga tabog nga ginagamit han mga magmarangno hin pagtugway han mga karnero, ngan an tinirok nga mga darahonon napabilin ha hunahuna sugad hin mga raysang nga ginpadulot hin maupay. Iginhatag ini han Dyos nga amo la nga Magmarangno ha aton ngatanan.

¹² Anak, may-ada pa angay mo pagbantayan. Waray kataposan an pagsurat hin mga basahan, ngan makakapaluya ha imo in duro nga pag-inaram.

¹³ Katapos hini ngatanan, usa nga butang an angay igsiring: Tahora an Dyos ngan tumana an iya mga sugo, kay amo la ini an tuyo han paghimoa han tawo.

¹⁴ An Dyos an maghuhukom han ngatanan nga aton ginbubuhat, magmaupay o magmaraot, bisan an mga butang nga ginbuhat hin hilom.