Ecclesiastes 10 - Samarenyo Meaning-Based Bible (1984)

¹ Nagbabaraho in usa ka botelya nga pahamot tungod hin patay nga mga langaw, ngan hinngangalimtan an gidadakoi nga kinaadman tungod hin gutiay nga kalurongan.

² Kinaiya hin tawo nga may kinaadman an pagbuhat han matadong, ngan kinaiya hin lurong an pagbuhat han kasaypanan.

³ Hisasabtan an iya kalurongan bisan han mga diri kinikilala nga mga tawo nga iya igkakatapo ha dalan; hinsasabotan han ngatanan nga lurong hiya.

⁴ Ayaw pag-iwas han imo katungdanan kon masina ha imo an imo punoan; mapapasaylo an imo dagko nga mga kasaypanan kon humilom ka la ngan diri bumaton ha iya.

⁵ Iini in karat-an nga akon hinkit-an ha kalibutan—karat-an nga binubuhat hin mga punoan.

⁶ Tinatagan hin higtaas nga mga katungdanan in lurong nga mga tawo, kundi hinngangalimtan an mga riko.

⁷ Hinkit-an ko in dikabayo nga mga oripon, samtang naglalakat la nga baktas sugad hin mga oripon an mga dagko nga pagkatawo.

⁸ Kon magluong ka, mahuhulog ka ngadto han luong. Kon magruba ka, basi makalusot ka han pader, kakagton ka hin halas.

⁹ Kon magpusak ka hin mga bato, an bato an makakasamad ha imo. Kon magtiak ka hin kahoy, masasamad ka hini.

¹⁰ Kon mangarol an imo parakol ngan diri mo pagbairon, mangungusog ka hin duro hin paggamit hini. Maupay nga andamon mo hin temprano an imo buruhaton.

¹¹ Kawang la an kamaaram mo hin paglumay hin halas kon mauna an halas hin pagkagat ha imo.

¹² An pulong hin tawo nga may kinaadman nahatag hin dungog ha iya, kundi an mga pulong in tawo nga lurong nakakapukan han iya kalugaringon.

¹³ Intremes la anay an pagtikang, ngan ha katapusan, tinuyaw na nga mga pulong.

¹⁴ Diri nahunong hin pagyinakan an luong. Waray usa nga maaram han sunod nga mahinanabo, ngan waray makakagsumat ha aton han mahinanabo katapos ta kamatay.

¹⁵ An tawo la nga uraura na hin kalurong nga diri na nakakatultol han iya balay an maggugool han iya kalugaringon hin waray la hinungdan nga trabaho.

¹⁶ Masamok in nasod kon batan-on pa an iya hadi, ngan mag-aga la hin kombite an iya mga pangulo.

¹⁷ Kundi palaran in nasod nga may hadi nga naglulugaring han iya mga kaladnganan, ngan may mga pangulo nga maaram mag-igo han pagkaon ug pag-inom.

¹⁸ Kon uraura na hin kahubya in tawo hin pag-ayad han iya atop, magtuturo ini ngan marurumpag an iya balay.

¹⁹ Nakakalipay ha imo an pagkombite, ngan nakakapalaksi ha imo an bino, kundi diri ka makakaangkon hini nga duha kon waray nimo kwarta.

²⁰ Ayaw pagsuson han hadi, bisan hin hilom la, ngan ayaw pagsuson han riko, bisan ha imo higdaan nga kwarto. Bangin pagdad-on hin tamsi an iginyakan nimo ngan pagsumatan hira han imo iginsiring.