Deuteronomio 7 - Samarenyo Meaning-Based Bible (1984)

Ginpili nga Kalugaringon nga mga Tawo han Ginoo

¹ “Pagdadad-on kamo han Ginoo nga iyo Dyos ngadto han tuna nga iyo pagtatag-iyahon, ngan paiiwason niya in damo nga mga nasod tikang hini nga tuna. Samtang nasulong kamo, paiiwason niya in pito nga mga nasod nga labi ka dagko ngan labi ka gamhanan kay ha iyo: an mga Hiteohanon, mga Girgaseohanon, mga Amoreohanon, mga Canaanhon, mga Periseohanon, mga Hibeohanon, ngan mga Jebuseohanon.

² Kon igtubyan na han Ginoo nga iyo Dyos ha iyo gahom ini nga mga tawo ngan pagpirdehon na hira niyo, kinahanglan pamatayon niyo hira ngatanan. Ayaw kamo pakigsarabot ha ira o pagpakita ha ira hin bisan ano nga pagkalooy.

³ Ayaw kamo pangasawa han bisan hin-o ha ira, ngan ayaw liwat papangasaw-a ha ira an iyo mga anak,

⁴ kay onina pabubulagon nira an iyo mga anak tikang han Ginoo ngadto hin pagsingba hin iba nga kadiyosan. Kon mahinabo ito, masisina ha iyo an Ginoo ngan pupuohon kamo dayon.

⁵ Sanglit rub-a niyo an ira mga altar, dugmoka an ira baraan nga mga harigi nga bato, gun-oba an ira mga ladawan han ira diyosa nga hi Asera, ngan sunoga an ira mga diyosdiyos.

⁶ Buhata ini niyo kay ginpili na kamo nga iya han Ginoo nga iyo Dyos. Ginpili kamo niya nga iya kalugaringon nga linain nga mga tawo tikang han ngatanan nga mga tawo han tuna.

⁷ “Waray an Ginoo maghigugma ngan magpili ha iyo tungod nga darudamo kamo kay han iba nga mga nasod; kamo an gigugutiayi nga nasod dinhe ha tuna.

⁸ Kundi ginhigugma kamo han Ginoo ngan karuyag niya tumanon an saad nga iya iginsaad ngadto ha iyo kaapoy-apoyan. Amo ito nga gintalwas kamo niya pinaagi han iya dako nga gahom, ngan gintalwas kamo tikang han iyo pagkaoripon han hadi han Ehipto.

⁹ Hinumdomi niyo nga an Ginoo nga iyo Dyos amo la an Dyos ngan matinumanon hiya. Pagtutumanon niya an iya ginsaaran ngan ipakikita niya an iya dayuday nga paghigugma ngadto hin yinukot nga mga katulinan hadton mga nahigugma ha iya ngan nagsusugot han iya mga sugo,

¹⁰ kundi diri hiya mag-aalang hin pagkastigo hadton mga napupungot ha iya.

¹¹ Sanglit yana tumana niyo an mga igintutdo ha iyo; sugta an ngatanan nga mga balaod nga iginhatag ko ha iyo yana nga adlaw.

Ginsaad an mga Kaupayan hin Pagkamasinugtanon

¹² “Kon pamatian niyo ini nga mga sugo ngan pagsugton niyo nga matinumanon, niyan, magpapadayon an Ginoo nga iyo Dyos hin pagtuman han iya ginsaaran ha iyo ngan magpapakita hiya ha iyo han iya dayuday nga paghigugma, sumala han iya iginsaad ha iyo kaapoy-apoyan.

¹³ Hihigugmaon ngan bebendisyonan kamo niya basi magdamo kamo ngan magkamay-ada niyo damo nga mga anak. Bebendisyonan niya an iyo kaumhan, basi mamay-ada niyo pagkaon, bino, ngan lana hin olibo; ngan bebendisyonan kamo niya pinaagi hin paghatag ha iyo hin damo nga mga baka ngan mga karnero. Ighahatag niya ha iyo ini ngatanan nga mga kaupayan didto han tuna nga iya iginsaad ngadto ha iyo kaapoy-apoyan nga iya ihahatag ha iyo.

¹⁴ Waray mga tawo dinhe ha kalibutan nga mahuhura hin mga kaupayan sugad ha iyo. Waray mababaw-as ha iyo bisan han iyo kabakahan.

¹⁵ Pananalipdan kamo han Ginoo tikang han ngatanan nga mga sakit ngan diri niya ipapadara ha iyo an magpakaharadlok nga mga sakit nga iyo gin-agian didto ha Ehipto, kundi ikakadto niya ini ha ngatanan niyo nga mga kaaway.

¹⁶ Pagpuoha niyo an tagsa nga nasod nga igtubyan ha iyo gahom han Ginoo nga iyo Dyos, ngan ayaw hira pagpakitaa hin ano man nga pagkalooy. Ayaw niyo pagsingbaha an ira kadiyosan kay makakamatay ini ha iyo.

¹⁷ “Ayaw kamo paghunahuna nga darudamo ha iyo ini nga mga tawo ngan diri kamo makakapaiwas ha ira.

¹⁸ Ayaw kamo kahadlok ha ira; hinumdomi niyo an ginbuhat han Ginoo nga iyo Dyos ngadto han hadi han Ehipto ngan han ngatanan niya nga mga tawo.

¹⁹ Hinumdomi an magpakaharadlok nga mga peste nga hinkit-an han kalugaringon niyo nga mga mata, an mga milagro ngan mga urosahon, ngan an dako nga gahom ug kusog nga ginamit han Ginoo nga iyo Dyos hin pagtalwas ha iyo. Pupuohon niya ini ngatanan nga mga tawo nga iyo nahahadlokan yana ha amo manta nga paagi han pagpuoha niya han mga Ehiptohanon.

²⁰ Magpapasarang pa ngani hiya hin kalisang dida ha ira, ngan pupuohon adton mga nangangalagiw ngan nananago.

²¹ Sanglit ayaw kamo kahadlok hini nga mga tawo. Kaupod niyo an Ginoo nga iyo Dyos; gamhanan hiya nga Dyos ngan amo hiya an angay kahadlokan.

²² Paiiwason niya hin hinayhinay ini nga mga nasod samtang nasulong kamo. Diri kamo dayon makakabungkag ha ira, kay kon buhaton niyo ini, magdadamo an magpintas nga kamanampan ngan makakapahadlok ini ha iyo.

²³ Igtutubyan han Ginoo ngada ha iyo gahom an iyo mga kaaway ngan paglilisangon hira niya ngada han kabungkag nira.

²⁴ Igtutubyan niya ha iyo gahom an ira kahadian. Pamamatayon hira niyo ngan mahihingalimtan na hira. Waray makakagpugong ha iyo; pupuohon niyo an ngatanan.

²⁵ Sunoga niyo an ira mga diyosdiyos. Ayaw niyo pag-ungaraa an salapi o bulawan nga aada hini ngan ayaw niyo pagkuhaa ini para ha iyo. Kon buhaton ini niyo, mapatay kamo, kay nakakapasina han Ginoo an pagsingba hin mga diyosdiyos.

²⁶ Ayaw niyo pagdad-a ini nga mga diyosdiyos ngadto han iyo mga balay, kay mahingangada ha iyo an pagtunglo han Ginoo hini nga kadiyosan. Kinahanglan kapungtan ngan pagtamayon niyo ini nga mga diyosdiyos, kay gintunglo ini han Ginoo.