Deuteronomio 12 - Samarenyo Meaning-Based Bible (1984)

May-ada Usa nga Dapit hin Pagsingba

¹ “Amo ini an mga balaod nga iyo pagtutumanon samtang nag-uokoy kamo didto han tuna nga ihahatag ha iyo han Ginoo nga Dyos han iyo kaapoy-apoyan. Pamatii ini!

² Didto han tuna nga iyo pagtatag-iyahon, bungkaga an ngatanan nga mga dapit nga ginsisingbahan han mga tawo han ira kadiyosan didto hin higtaas nga kabukiran, didto hin kapungtoran ngan didto ha puno hin magrampag nga kakahoyan.

³ Rub-a niyo an ira mga altar ngan dugmoka an ira baraan nga mga harigi nga bato. Sunoga niyo an ira mga tigaman han diyosa nga hi Asera, ngan tiaka an ira mga diyosdiyos, basi diri na gud ini pagsingbahon didto hito nga mga dapit.

⁴ “Ayaw kamo pagsingba han Ginoo nga iyo Dyos ha sugad nga paagi han pagsingba hini nga mga tawo han ira kadiyosan.

⁵ Tikang han katunaan han ngatanan niyo nga mga tribo magpipili an Ginoo han usa nga dapit nga kakadtoan han mga tawo ha iya atubangan hin pagsingba ha iya.

⁶ Didto ighahalad niyo an iyo mga halad nga pagtutuboron, an iyo mga ikanapulo nga bahin ngan an iyo iba nga mga halad, an mga regalo nga iyo iginsasaad han Ginoo an maupay nga kaburot-on nga mga halad, ngan an mga suhag han iyo mga baka ngan mga karnero.

⁷ Didto ha atubangan han Ginoo nga iyo Dyos nga nagbendisyon ha iyo, makaon kamo ngan an iyo mga panimalay ngan magpapahimulos han mag-upay nga mga butang nga iyo ginkabudlayan.

⁸ “Kon umabot na ito nga panahon, kinahanglan diri na niyo pagbuhaton an iyo hadto ginbuhat. Ngada yana nagpasagad la kamo hin pagsingba, bisan diin ug bisan ano nga iyo karuyag;

⁹ kay aanhi pa man kamo ha gawas han tuna nga ihahatag ha iyo han Ginoo nga iyo Dyos, diin makakag-ukoy kamo dida hin kalinaw.

¹⁰ Kon tumabok na kamo han Salog Jordan, papatatag-iyahon kamo han Ginoo han tuna ngan pauokyon kamo didto. Tatalwason kamo niya tikang han ngatanan niyo nga mga kaaway, ngan makakag-ukoy kamo dida hin kalinaw.

¹¹ Magpipili an Ginoo han usa nga dapit diin pagsisingbahon hiya, ngan didto kinahanglan pagdad-on niyo ngadto ha iya an ngatanan nga akon iginsugo: an iyo mga halad nga pagtutuboron an iyo mga ikanapulo nga bahin ngan an iyo iba nga mga halad, ngan adton linain nga mga regalo nga iyo iginsasaad han Ginoo.

¹² Pagmalipayon kamo didto ha iya atubangan kaupod han iyo mga anak, mga surugoon, ngan han mga Levita nga nag-uokoy didto han iyo mga bungto; hinumdomi niyo nga diri magtatag-iya an mga Levita hin tuna nga ira kalugaringon.

¹³ Ayaw kamo pagdara han iyo mga halad nga susunogon ngadto hin bisan la diin nga dapit nga iyo karuyag;

¹⁴ kinahanglan ighalad ini niyo didto han usa la nga dapit nga pagpipilion han Ginoo didto han katunaan han usa han iyo mga tribo. Didto la niyo ighalad an iyo mga halad nga susunogon, ngan pagbuhatan an iba pa nga akon iginsugo ha iyo.

¹⁵ “Kundi tugot ha iya hin pag-ihaw ngan pagkaon han iyo mga hayop bisan diin kamo pag-ukoy. Makakahimo kamo hin pagkaon sugad han kadamo nga iginhahatag ha iyo han Ginoo. Makakahimo kamo ngatanan hin pagkaon, bisan malinis o mahugaw kamo sumala han seremonyas, sugad han pagkaon niyo han karne hin bugsok o hin oso.

¹⁶ Kundi ayaw kamo pagkaon han dugo hini; kinahanglan ighuwad ini niyo ngada ha tuna.

¹⁷ Kundi hadton iyo ighahalad ngadto han Ginoo nga diri gud kaonon didto han mga dapit nga iyo inuokyan: ayaw bisan an mga ikanapulo nga bahin han iyo binhe, iyo bino, ngan iyo lana hin olibo, bisan an mga suhag han iyo mga baka ug mga karnero, o an mga regalo nga iyo igsasaad han Ginoo, an iyo maupay nga kaburot-on nga mga halad, o iba pa nga mga halad.

¹⁸ Kakaonon niyo ngan han iyo mga anak ini nga mga halad, kaupod han iyo mga surugoon ngan han mga Levita nga nag-uokoy didto han iyo mga bungto, didto la ha atubangan han Ginoo nga iyo Dyos, didto han usa nga dapit hin pagsingba nga ginpili han Ginoo nga iyo Dyos. Ngan kinahanglan magmamalipayon kamo didto tungod han ngatanan nga ginbuhat niyo.

¹⁹ Talinguhaa liwat niyo nga diri niyo pagpasibay-an an mga Levita, samtang nag-uokoy kamo didto han iyo tuna.

²⁰ “Kon pahiluagon na han Ginoo nga iyo Dyos an iyo katunaan, sumala han iya iginsaad, makakakaon kamo hin karne ha bisan san-o nga karuyag niyo.

²¹ Kon hirayo hin duro an usa nga dapit hin pagsingba, niyan, kon karuyag niyo, makakag-ihaw kamo han baka o karnero nga iginhatag ha iyo han Ginoo, ngan makakaon niyo an karne didto han iyo balay sumala han akon iginsiring ha iyo.

²² Makakahimo hin pagkaon hito nga karne an bisan hin-o nga malinis o mahugaw sumala han seremonyas sugad han iyo pagkaon han karne hin bugsok o oso.

²³ Ayaw la niyo pagkaona an karne nga may-ada pa dugo, kay aada han dugo an kinabuhi, ngan kinahanglan diri niyo kaonon an kinabuhi upod han karne.

²⁴ Ayaw niyo gamita an dugo para hin pagkaon; lugod ihuwad ini ngada ha tuna.

²⁵ Kon tumanon niyo ini nga sugo, malilipay an Ginoo, ngan maghihingaupay kamo ngan an iyo mga tulin.

²⁶ Dad-a niyo ngadto han usa nga dapit hin pagsingba an iyo mga halad ngan an mga regalo nga iyo iginsaad han Ginoo.

²⁷ Ighalad niyo didto an mga halad nga susunogon dida han altar han Ginoo. Ighalad liwat niyo adto nga mga hayop nga tutuboron nga kinakaon niyo an karne ngan ihuwad an dugo ngada han altar.

²⁸ Sugta niyo nga matinumanon an ngatanan nga iginsugo ko ha iyo, ngan maghihingaupay ha kadayonan kamo ngan an iyo mga tulin, kay bubuhaton niyo an matadong ngan an nakakalipay han Ginoo nga iyo Dyos.

Ginpahimatngon nga Diri Pagsingba hin Diyosdiyos

²⁹ “Pagbubungkagon han Ginoo nga iyo Dyos an mga nasod samtang nasulong kamo han ira tuna, ngan pagtatag-iyahon niyo ini ngan mag-uokoy kamo didto.

³⁰ Katapos pagbungkaga han Ginoo hito nga mga nasod, talinguhaa nga diri niyo pagsundon an ira mga ginbubuhat bahin han ira tuloohan, kay makakamatay ito ha iyo. Ayaw kamo pagpakiana kon gin-uunan-o nira hin pagsingba han ira kadiyosan, kay bangin kamo masulay hin pagsingba ha amo ngahaw nga paagi.

³¹ Ayaw niyo pagsingbaha an Ginoo nga iyo Dyos hin sugad nga paagi han ira pagsingba han ira kadiyosan, kay ha pagsingba nira han ira kadiyosan, ginbubuhat nira an ngatanan nga makapupungot nga mga butang nga nangangalsan han Ginoo. Iginhahalad pa ngani nira an ira mga anak dida han kalayo ha ira mga altar.

³² “Pagbuhata niyo an ngatanan nga akon iginsugo ha iyo; ayaw niyo pagdugangi o pag-ibani ini nga mga sugo.