Daniel 6 - Samarenyo Meaning-Based Bible (1984)

Iginlabog hi Daniel ngadto han Luong han mga Liyon

¹ Naglarang hi Dario hin pagtudlok hin 120 nga mga gobernador nga magkakapot hin katungdanan ha bug-os niya nga ginhadian.

² Labot hini, iya ginpili hi Daniel ngan hin duha pa ka tawo nga magbabantay han mga gobernador ngan maninimangno han kanan hadi mga hiagi.

³ Waray pag-iha nagpakita hi Daniel nga mauruupay hiya magbuhat kay han iba nga mga magbarantay o mga gobernador. Tungod nga labaw gud an iya kamaupay, naghunahuna an hadi hin paghimo ha iya nga tinaporan han bug-os nga ginhadian.

⁴ Niyan nagtinguha an iba nga mga magbarantay ngan mga gobernador hin pagpangita hin sayop dida han pagdumara ni Daniel han empiryo, kundi waray gud hira makaagi, kay katataporan man hi Daniel ngan waray gud hiya magbuhat hin bisan ano nga sayop o diri tangkod nga paagi.

⁵ Naggipasiringsiring hira, “Waray kita hin-aagian nga bisan ano nga sayop hin pagsumbong kan Daniel labot hin butang mahitungod han iya tuluohan.”

⁶ Sanglit nakigkita hira han hadi ngan nagsiring, “Hadi Dario, mabuhi ka unta ha kadayonan!

⁷ Kami ngatanan nga mga pangulo han imo ginhadian—an mga tinaporan han mga bungto, mga gobernador han mga lalawigan, mga heneral han kasondalohan, ngan iba pa nga mga opisyal—nagkauruyon nga kinahanglan magpagawas ka hin sugo, Harangdon nga Hadi, ngan kinahanglan pagtumanon ini han mga tawo. Pagsugo nga sulod hin 30 ka adlaw waray gud tutugotan hin pag-ampo hin bisan hin-o nga diyos ug tawo labot ha imo, Harangdon nga Hadi! An diri magtuman hini nga sugo, ilalabog ngadto hin usa nga luong hin mga liyon.

⁸ Sanglit ipagawas ini nga sugo, Harangdon nga Hadi, ngan pirmahi ini, ngan ipatutuman ini sugad nga usa nga balaod han mga Mediahanon ngan mga Persiahanon ngan diri gud ini maliliwat.”

⁹ Sanglit ginpirmahan ni Hadi Dario an sugo.

¹⁰ Han paghibaro ni Daniel nga ginpirmahan na an sugo, inmoli hiya. Didto hin usa nga igbaw nga kwarto han iya balay may mga bintana nga naatubang ngadto ha Jerusalem. Didto, sugad han iya nababatasan, linmuhod hiya didto han binuksan nga bintana ngan nag-ampo nakakatulo ngadto ha Dyos ha kada adlaw.

¹¹ Han pakakita han mga kaaway ni Daniel nga nag-aampo hiya ngadto ha Dyos,

¹² nagburunyog hira ngatanan ngadto han hadi hin pagsumbong kan Daniel. Nagsiring hira, “Harangdon nga Hadi, nagpirma ka hin sugo nga sulod han 30 ka adlaw, an bisan hin-o nga mag-ampo hin bisan hin-o nga diyos ug tawo labot ha imo, ilalabog ngadto hin usa nga luong hin mga liyon.” Binmaton an hadi, “Oo, masigpit ito nga sugo nga diri maliliwat nga balaod han mga Mediahanon ngan mga Persiahanon.”

¹³ Niyan ginsiring nira an hadi, “Hi Daniel nga usa han mga bihag nga tikang ha Juda, diri nagtatahod ha imo, Harangdon nga Hadi, o nagsusugot han sugo nga imo ginpagawas. Pirme nag-aampo hiya nakakatulo ha kada adlaw.”

¹⁴ Han pakabati hini han hadi, naguol hiya hin duro ngan gintalinguha niya tubtob han katunod han adlaw hin pamiling hin paagi hin pagtalwas kan Daniel.

¹⁵ Niyan binmalik an mga tawo ngadto han hadi ngan nagsiring ha iya, “Maaram ka, Harangdon nga Hadi, nga sumala han mga balaod han mga Mediahanon ngan mga Persiahanon, waray maliliwat nga sugo nga ipinapagawas han hadi.”

¹⁶ Sanglit nagsugo an hadi nga kuhaon hi Daniel ngan ilabog ngadto han luong hin mga liyon. Nagsiring hiya kan Daniel, “Talwason ka unta han imo Dyos nga imo dayuday gin-aalagad.”

¹⁷ Iginbutang in usa nga bato ha bawbaw han ganggang han luong, ngan ginsilyohan an bato han iya kalugaringon nga hadianon nga silyo ngan han silyo han dumagko nga mga tawo, basi waray makatalwas kan Daniel.

¹⁸ Niyan binmalik an hadi ngadto han palasyo ngan waray mahingaturog ha bug-os nga gab-i, waray kumaon, ngan waray makig-urosa hin kalipay.

¹⁹ Dida han pagkamaagahon, binmangon an hadi ngan nagdagmit ngadto han luong.

²⁰ Han pag-abot niya ngadto, ginmoliat hiya ha kabaraka, “Daniel nga surugoon han buhi nga Dyos! Nakatalwas ba ha imo tikang han mga liyon an Dyos nga imo dayuday gin-aalagad?”

²¹ Binmaton hi Daniel, “Mabuhi ka unta ha kadayonan, Harangdon nga Hadi!

²² Ginsugo han Dyos an iya anghel hin pagsagpo han mga baba han mga liyon, basi diri ako nira pagdaoton. Ginbuhat ini han Dyos kay sayod hiya nga waray ako sala ngan waray ako makasayop ha imo, Harangdon nga Hadi.”

²³ Duro gud an kalipay han hadi ngan nagsugo hiya nga kuhaon hi Daniel tikang han luong. Sanglit ira ginkuha hiya ngan hinkit-an nira nga waray gud hiya maano, kay sinmarig hiya han Dyos.

²⁴ Niyan nagsugo an hadi nga pagdakpon an ngatanan nga mga tawo nga nagsumbong kan Daniel, ngan iginpalabog hira ngadto han luong hin mga liyon, upod an ira kaasaw-an ngan mga anak. Han waray pa hira aabot ngadto ha ubos, ginsalo hira han mga liyon ngan ginhunothunot hira ngan ginrumok an ngatanan nira nga mga tul-an.

²⁵ Niyan nagsurat hi Hadi Dario ngadto han mga tawo han ngatanan nga kanasoran ngan mga pinulongan dinhe ha tuna: “An kalinaw maada ha iyo!

²⁶ Nagsusugo ako nga ha bug-os ko nga ginhadian kinahanglan mahadlok ngan magtahod an ngatanan han Dyos ni Daniel. “Buhi hiya nga Dyos, ngan maghahadi hiya ha kadayonan. Diri gud mabubungkag an iya ginhadian, ngan diri gud matatapos an iya gahom.

²⁷ Nagtatalwas ngan nagbabawi hiya; nagbubuhat hiya hin mga urosahon ngan mga milagro didto ha langit ngan dinhe ha tuna. Gintalwas niya ha kamatayon hi Daniel tikang han mga liyon.”

²⁸ Nagmainuswagon hi Daniel dida han panahon han paghadi ni Dario ngan han paghadi ni Ciro nga Persiahanon.