Daniel 5 - Samarenyo Meaning-Based Bible (1984)

Nagkombite hi Belsasar

¹ Usa ka gab-i nagdapit ni Hadi Belsasar hin usa ka yukot nga dumagko nga mga tawo ngadto hin usa nga dako nga kombite, ngan nag-irignom hira hin bino.

² Samtang nag-iirignom hira, nagsugo hi Belsasar nga kuhaon an bulawan ug salapi nga mga kopa ngan mga makaong nga gindara ni Nabucodonosor nga iya amay tikang han Templo didto ha Jerusalem. Iginpakuha ini han hadi basi gamiton niya, han iya dumagko nga mga tawo, han iya kaasaw-an, ngan han iya mga aruasawa dida han ira irignom.

³ Gindara dayon an bulawan nga mga kopa ngan mga makaong, ngan ira dayon ginggamit,

⁴ ngan gindayaw nira an kadiyosan nga hinimo hin bulawan, salapi, bronse, puthaw, kahoy, ug bato.

⁵ Tigda la nga pinmakita in usa nga kamot hin tawo ngan nagtikang ini hin pagsurat dida han bungbong han palasyo, nga napapawaan hin maupay han mga suga. Ngan hinkit-an han hadi an kamot samtang nagsusurat ini.

⁶ Ginduas hiya tungod hin kahadlok nga nangurog an iya mga tuhod.

⁷ Ginmoliat hiya nga pasudlon an mga salamangkero, mga diwatero, ngan mga parapanhimalad. Han pagsulod nira, ginsiring hira han hadi, “Adton makakabasa hini nga sinurat ngan makagsumat ha akon han kahulogan hini, pagbabadoan hiya hin hilawig nga mga panapton nga mapula, magkwekwentas hin bulawan nga kwentas hin kadungganan, ngan magigin ikatulo hiya hin kagamhanan dinhe han ginhadian.”

⁸ Dinmaop an hadianon nga mga magsaragdon, kundi waray ha ira nakabasa han sinurat o nakasumat han hadi han kahulogan hini.

⁹ Tungod han iya kahadlok ginduas pa gud hi Hadi Belsasar ngan nagupong an iya dumagko nga mga tawo kon ano an ira pagbubuhaton.

¹⁰ Han pakabati han iroy nga rayna han hiruhimangraw han hadi ngan han iya dumagko nga mga tawo, sinmulod hiya han ruwang nga ginbabangkitahan. Nagsiring hiya, “Mabuhi ka unta ha kadayonan, Harangdon nga Hadi! Ayaw kahadlok hin duro ngan ayaw panduas.

¹¹ May usa ka tawo dinhe han imo ginhadian nga aada ha iya an espiritu han baraan nga kadiyosan. Han hadi pa an imo amay, nagpakita ini nga tawo hin maupay nga panhunahuna, hibaro, ug kinaadman nga sugad han kinaadman han kadiyosan. Hi Hadi Nabucodonosor nga imo amay naghimo ha iya nga puno han mga diwatero, mga salamangkero, mga paratigo, ngan mga parapanhimalad.

¹² May-ada niya talagsaon nga kabatiran ngan maaram gud hiya maghubad hin mga inop, magsulbad, hin mga tirigohon, ngan magsaysay hin mga makuri matukib nga butang; sanglit pasugoi ini nga tawo nga hi Daniel nga ginngaranan han hadi kan Beltsasar, ngan pagsusumatan ka niya han kahulogan hini ngatanan.”

Ginsaysay ni Daniel an Sinurat

¹³ Gindara dayon hi Daniel ngadto ha atubangan han hadi, ngan nagsiring ha iya an hadi, “Hi Daniel ka ba, adto nga Judiyo nga bihag, nga gindara nganhi tikang ha Juda han akon amay nga hadi?

¹⁴ Hinbatian ko nga aada ha imo an espiritu han baraan nga kadiyosan ngan nga batid ka ngan may hibaro ug kinaadman.

¹⁵ Ginpakanhi ko an mga magsaragdon ngan mga salamangkero hin pagbasa hini nga sinurat ngan hin pagsumat ha akon han kahulogan hini, kundi waray hira mahibaro han kahulogan.

¹⁶ Niyan hinbaroan ko nga nakakaagi ka hin tinago nga mga kahulogan ngan nakakagsaysay hin mga makuri matukib nga butang. Kon makabasa ka hini nga sinurat ngan makagsumat ha akon han kahulogan hini, pagbabadoan ka hin higlawig nga mga panapton nga mapula, pagkwekwentasan ka hin bulawan nga kwentas hin kadungganan, ngan magigin ikatulo ka hin kagamhanan dinhe han ginhadian.”

¹⁷ Binmaton hi Daniel, “Tipigi an imo mga regalo para ha imo kalugaringon o ihatag ini ngadto hin iba. Babasahon ko para ha imo, Harangdon nga Hadi, an iginsurat ngan igsusumat ko ha imo an kahulogan hini.

¹⁸ “Ginhimo han Gilalabawi nga Dyos hi Nabucodonosor nga imo amay nga dako nga hadi ngan gintagan hiya hin pagkaligdong ug pagkaharangdon.

¹⁹ Uraura an iya pagdako nga nahadlok ngan nangurog ha iya atubangan an katawhan han ngatanan nga kanasoran ngan mga pinulongan. Kon karuyag niya hin pagpatay, iya pinapatay; kon karuyag niya hin pagbuhi, iya binubuhian. Pinapasidunggan o pinapakaalohan niya an bisan hin-o nga iya karuyagon.

²⁰ Kundi tungod nga nagmapahitas-on hiya, nagmatig-a an ulo, ngan nagmapintas hiya, ginkuha hiya tikang han iya hadianon nga trono ngan nawad-an hiya han iya pagkadungganan.

²¹ Ginpaiwas hiya tikang han katiringban han mga tawo, ngan nasugad an iya hunahuna hin kanan usa nga mananap. Nag-ukoy hiya tampo han ihalas nga mga asno, kinmaon hin banwa sugad hin baka, ngan kinmaturog didto ha gawas nga waray nakakasalipod ha iya tikang han tun-og. Ha kataposan nagmatuod hiya nga an Gilalabawi nga Dyos amo an nagbubuot han ngatanan nga mga ginhadian han mga tawo, ngan makakahatag hiya hini ngadto hadton iya pagpipilion.

²² “Kundi ikaw nga iya anak waray ka magpaubos bisan kon hinbaroan mo ini ngatanan.

²³ Ginsupak mo an Ginoo han langit ngan iginpakuha mo an mga kopa ngan an mga makaong nga ginkuha tikang han iya Templo. Tikang hini nag-inom ikaw, an imo dumagko nga mga tawo, an imo kaasaw-an, ngan an imo mga aruasawa, ngan gindayaw niyo an kadiyosan nga hinimo hin bulawan, salapi, bronse, puthaw, kahoy, ug bato—kadiyosan nga diri nakakakita o nakakabati, ngan waray gud hinbabaroan. Kundi waray niyo pagpasidunggi an Dyos nga nagbubuot kon mabubuhi o mamamatay kamo, ngan nagbubuot han ngatanan nga iyo binubuhat.

²⁴ Amo ito nga ginsugo han Dyos an kamot hin pagsurat hini nga mga pulong.

²⁵ “Amo ini an iginsurat: ‘Ihap, ihap, timbang, mga pagkabahinbahin.’

²⁶ Ngan amo ini an kahulogan: ihap, gin-ihap na han Dyos an mga adlaw han imo ginhadian ngan gintapos na ini;

²⁷ timbang, gintimbang ka na ngan nahibaroan nga magaan ka hin duro;

²⁸ mga pagkabahinbahin, ginbahinbahin na an imo ginhadian ngan iginhatag ngadto han mga Mediahanon ngan mga Persiahanon.”

²⁹ Ginsugo dayon ni Belsasar an iya mga surugoon nga pagbadoan hi Daniel hin hilaba nga panapton nga mapula ngan pagkwentasan hiya hin bulawan nga kwentas hin kadungganan. Ngan ginhimo hiya nga ikatulo hin kagamhanan didto han ginhadian.

³⁰ Hito ngahaw nga gab-i ginpatay hi Belsasar nga hadi han Babilonia;

³¹ ngan an hadianon nga gahom gin-agaw ni Dario nga Mediahanon, nga 62 na an panuigon.