Daniel 1 - Samarenyo Meaning-Based Bible (1984)

AN SUSUMATON NI DANIEL NGAN HAN IYA KASANGKAYAN Nahimo an Batan-on nga Kalalaken-an nga mga Kaapi han Palasyo ni Nabucodonosor

¹ Dida han ikatulo ka tuig nga hadi ni Joakim han Juda, ginsulong ni Hadi Nabucodonosor an Jerusalem ngan ginpalibotan niya an syudad.

² Igintubyan ha iya han Ginoo hi Hadi Joakim upod an mga garamiton han Templo. Ginhalin niya hira ngadto ha Babilonia, ngadto han templo han iya kadiyosan ngan iginbutang an mga inagaw nga manggad didto han hirimosan nga mga kwarto han templo.

³ Nagsugo an hadi kan Aspenaz, an iya labaw nga opisyal, hin pagpili tikang han mga Israelita nga nabihag hin mga batan-on nga kalalaken-an han hadianon ngan han harangdon nga mga panimalay.

⁴ Kinahanglan mga gwapo hira, mag-aram, tinutdoan hin maupay, madali mahibaro, ngan maupay an panlawas, basi matakos hira hin pag-alagad didto han hadianon nga palasyo. Pagtututdoan hira ni Aspenaz hin pagbasa ngan pagsurat han yinaknan han mga taga-Babilonia.

⁵ Nagsugo liwat an hadi nga tagan hira adlaw-adlaw hin pagkaon ug bino sugad han iginpapakaon ngan iginpapainom han mga kaapi han hadianon nga palasyo. Katapos hin tulo ka tuig hini nga pag-aram, dadad-on hira ngadto ha atubangan han hadi.

⁶ Upod hadton mga napili amo hira Daniel, Ananias, Misael, ug Azarias nga mga sakop han tribo ni Juda.

⁷ Gintagan hira han labaw nga opisyal hin bag-o nga mga ngaran: hi Daniel, Beltsasar; hi Ananias, Sadrac; hi Misael, Mesac; ngan hi Azarias, Abednego.

⁸ Nagsumpa hi Daniel hin diri paghugaw ha iya ngahaw sumala han seremonyas, pinaagi hin diri pagkaon ngan pag-inom han igindudurot ha ira. Sanglit ginhangyo niya hi Aspenaz nga tugotan hiya hin diri pagkaon ug pag-inom han igindudurot ha ira,

⁹ ngan tungod han panabang han Dyos, nalooy hi Aspenaz ha iya.

¹⁰ Kundi nahadlok hi Aspenaz han hadi, sanglit ginsiring niya hi Daniel, “Naglarang na an hadi han imo kakaonon ngan iimnon, ngan kon diri ka masugad kamaupay hin panlawas han iba nga mga batan-on, bangin patayon ako han hadi.”

¹¹ Sanglit ginkadto ni Daniel an tinaporan nga iginbutang ni Aspenaz para ha iya ngan han iya tulo nga mga kaupod.

¹² Nagsiring hiya, “Sarihi kami sulod hin napulo ka adlaw. Tagi la kami hin mga utan nga pagkaon ngan tubig nga irimnon.

¹³ Katapos itanding kami han mga batan-on nga gindudurotan han pagkaon han hadianon nga palasyo, ngan ipasikad an imo pagbubuhaton dida han imo makita ha amon.”

¹⁴ Inmuyon hiya nga sarihan nira ini sulod hin napulo ka adlaw.

¹⁵ Katapos na han panahon, magtarutambok ngan magkurukusog hira kay han ngatanan nga gindurotan han hadianon nga pagkaon.

¹⁶ Sanglit tikang hadto tinugotan hira han gwardya hin pagkaon hin mga utan nga liwan han ihinahatag han hadi.

¹⁷ Gintagan han Dyos an upat nga mga batan-on nga kalalaken-an hin hibaro ug kamaaram hin pakasabot han mga barasahon ngan, labot hini, gintagan niya hi Daniel hin gahom hin paghubad hin mga panan-awon ngan mga inop.

¹⁸ Katapos han tulo ka tuig nga igintalaan han hadi, gindara ni Aspenaz ngadto kan Nabucodonosor an ngatanan nga mga batan-on nga kalalaken-an.

¹⁹ Nakighimangraw ha ira ngatanan an hadi, ngan nakalipay gud ha iya hira Daniel, Ananias, Misael, ug Azarias labaw han iba. Sanglit nahimo hira nga mga kaapi han palasyo han hadi.

²⁰ Bisan ano nga pakiana ngan problema nga iginpapahimutang han hadi, maaruaram ini nga upat hin napulo ka pilo kay han bisan hin-o nga paratigo o salamangkero didto han bug-os niya nga ginhadian.

²¹ Nagpabilin hi Daniel didto han hadianon nga palasyo ngada han pagsakopa han Babilonia ni Ciro nga emperador han Persia.