Amos 8 - Samarenyo Meaning-Based Bible (1984)

Ginpakita hin Panan-awon nga Alat nga Puno hin mga Bunga

¹ Iginpakita ha akon han Ginoo in lain nga panan-awon diin hinkit-an ko in alat nga puno hin mga bunga.

² Pinmakiana an Ginoo, “Amos, ano an imo hinkikit-an?” “Alat nga puno hin mga bunga,” binmaton ako. Nagsiring ha akon an Ginoo, “Inmabot na an kataposan para han akon nasod nga Israel. Diri ko na liliwaton an akon hunahuna hin pagkastigo ha ira.

³ Dida hito nga adlaw an mga kanta didto han palasyo mahihimo nga mga kanta hin pagtaguminatay. Magkakamay-ada mga patay nga lawas ha ngatanan nga mga dapit. Ilalabog hira ha gawas ngan ito nga dapit magmamamingaw.”

Maghihikaraot an Israel

⁴ Pamati hini, kamo nga nagtatamak han mga magpakalolooy ngan nagtatalinguha hin pagpuo han mga kablas han nasod.

⁵ Nasiring kamo ha iyo la ngahaw, “Makuri na kami makahulat nga maliwas na an baraan nga mga adlaw basi makagbaligya kami han amon mga pagkaon. San-o pa katatapos an Adlaw nga Iparahuway basi makagbaligya na liwat kami? Niyan amon pahihitas-on an pagbaligya, magamit kami hin diri husto nga mga taraksan, ngan linastihan nga mga timbangan ha paglimbong han amon mga pumaralit.

⁶ Mamahalon namon hin pagbaligya han waray pulos nga trigo. Mamimiling kami hin kablas nga tawo nga diri makakabayad han iya mga utang, bisan ngani hin pagpalit hin usa ka padis nga sandalyas, ngan papaliton namon hiya nga usa nga oripon.”

⁷ Nagsumpa an Ginoo nga Dyos han Israel, “Diri ko gud hingangalimtan an magraot nira nga binuhatan.

⁸ Sanglit malinog an tuna, ngan magmamabidoon an ngatanan ha tuna. Mababay-og an bug-os nga nasod; matubo ini ngan maon-on liwat sugad han pagtaob ug paghubas han Salog Nilo.

⁹ Maabot an panahon nga matutunod an adlaw nga naudto pa la, ngan magsisirom an tuna dida ha dayag nga kaadlawon. Ako nga Ginoo nga Dyos an nagyakan.

¹⁰ Hihimoon ko an iyo mga pyesta nga mga adlaw hin paglubong, ngan mga pagtangis hin kabidoan an iyo maglipayon nga mga kanta. Magpapakiskis kamo ngan magbabado kamo hin sako, ngan masusugad kamo hin mga kag-anak nga masulob-on tungod han ira usa la nga anak nga lalake. Magmamapait ito nga adlaw tubtob ha kataposan.

¹¹ “Maabot an panahon nga magpapadara ako hin gutom nganhi ha tuna. Gugutomon an mga tawo, kundi diri hin tinapay; uuhawon hira, kundi diri hin tubig. Gugutomon ngan uuhawon hira hin mensahe nga tikang han Ginoo. Ako nga Ginoo nga Dyos an nagyakan.

¹² Magsusudoysudoy an mga tawo tikang ha Dagat nga Patay ngadto han Mediteraneo ngan maglilibot hira tikang ha amihanan ngadto ha sinirangan. Mamimiling hira ha ngatanan nga dapit hin mensahe nga tikang han Ginoo, kundi diri hira makakaagi hini.

¹³ Dida hito nga adlaw manhihiraptay tungod hin uhaw bisan an mag-upay an panlawas nga mga batan-on nga kalalaken-an ngan kababayen-an.

¹⁴ Adton mga nagsusumpa pinaagi han mga diyosdiyos han Samaria, nga nasiring, ‘Pinaagi han diyos han Dan’ o ‘Pinaagi han diyos han Berseba’—mapupukan ito nga mga tawo ngan diri na gud mabangon.”