2 Samuel 6 - Samarenyo Meaning-Based Bible (1984)

Gindara ngadto ha Jerusalem an Kahon han Ginsaaran

¹ Gintirok na liwat ni David an gimamag-upayi nga mga sondalo didto ha Israel, nga inmabot ngatanan hin 30,000 nga kalalaken-an,

² ngan gindara ini niya ngadto ha Baala didto ha Juda, basi amo hira an magdara han Kahon han Ginsaaran han Dyos nga may-ada ngaran nga Ginoo nga Labi Kamakagarahum, kanay trono aadto ha igbaw han mga kerubin.

³ Ira ginkuha ini ha balay ni Abinadab didto ha bawbaw han pungtod ngan ira ginkarga ini ha bag-o nga karomata. Hira Uza ug Ahio nga mga anak ni Abinadab amo an nagpapalakat han karomata,

⁴ nga nag-uuna han karomata hi Ahio.

⁵ Ha bug-os nira nga kusog, hira David ngan an ngatanan nga mga Israelita nagsasarayaw ngan nagkakaranta ha pagpasidungog han Ginoo. Nagtotokar hira hin mga arpa, mga lira, mga gimbal, mga kastanwelas, ngan mga bombo.

⁶ Han pag-abot na nira han giriokan nga dapit han Nacon, natumba an mga baka ngan nagguguyod han karomata, ngan kinaptan dayon ni Uza an Kahon han Ginsaaran.

⁷ Nasina dayon kan Uza an Ginoo nga Dyos ngan ginpatay hiya tungod kay kinaptan man niya an Kahon han Ginsaaran. Namatay hi Uza didto ha ligid han Kahon han Ginsaaran,

⁸ sanglit tikang hadto gintawag nga Perez Uza adto nga dapit. Napungot hi David kay ginkastigo han Ginoo, ha iya kasina, hi Uza.

⁹ Niyan nahadlok han Ginoo hi David ngan nagsiring hiya, “Uunanhon ko yana pakadara han Kahon han Ginsaaran?”

¹⁰ Sanglit naglarang hiya nga diri na la dad-on an Kahon han Ginsaaran ngadto ha Jerusalem; linmiko lugod hiya ngan gindara ini ngadto han balay ni Obed Edom nga taga syudad han Gat.

¹¹ Nagpabilin ini didto hin pito ka bulan, ngan ginbendisyonan han Ginoo hi Obed Edom ngan an iya panimalay.

¹² Nahibaro hi Hadi David nga tungod han Kahon han Ginsaaran ginpakaupay han Ginoo an panimalay ni Obed Edom ngan an ngatanan nga nakada ha iya panimalay. Sanglit kinuha niya an Kahon han Ginsaaran tikang han balay ni Obed Edom basi dad-on ini ngadto ha Jerusalem pinaagi hin maribhong nga pagsaurog.

¹³ Pakalakat la hin unom ka pitad han mga tawo nga nagpapasag han Kahon han Ginsaaran, ginpaukoy hira ni David samtang naghalad hiya han Ginoo hin tinubod nga todo nga baka ngan hin pinatambok nga nati nga baka.

¹⁴ Nagsinayaw hi David, tugob hin kalipay, ha pagpasidungog han Ginoo, nga nakakatapis la hiya hin dugnit nga lino.

¹⁵ Sanglit gindara niya ngan han ngatanan nga mga Israelita an Kahon han Ginsaaran ngadto ha Jerusalem inupdan hin rugyaw ngan tunog hin mga trompeta.

¹⁶ Han gindadara na ngadto ha syudad an Kahon, timnangbo ha bintana hi Mical nga anak ni Saul ngan hinkit-an niya hi Hadi David nga nagluluksolukso ngan nagsisinayaw ha atubangan han Kahon han Ginsaaran, ngan waray gud makalipay ha iya an ginbuhat ni David.

¹⁷ Gindara nira an Kahon ngan iginbutang ini dida han dapit nga burutangan hini ha sakob han Ginoo han Tulda nga gintindog ni David. Katapos naghalad hi David hin mga halad nga tinubod ngan hin mga halad hin pagdait.

¹⁸ Han kahuman niya paghalad, ginbendisyonan niya an mga tawo ha ngaran han Ginoo nga Labi Kamakagarahum,

¹⁹ ngan tinagan hira ngatanan hin pagkaon. Tinagan niya an kada lalake ug babaye didto ha Israel, hin tag-usa ka bug-os nga tinapay, usa ka gurot nga sinugba nga karne, ngan mga pasas. Katapos nangoli an ngatanan.

²⁰ Niyan, han pag-uli na ni David hin pagbendisyon han iya panimalay, ginmawas hi Mical hin pagtapo ha iya. Nagsiring hiya, “Pagkadako nga kadarayawan an naangkon han hadi han Israel yana nga adlaw! Sinmayaw hiya nga nagtatapis la sugad hin lurong ha atubangan han mga surugoon nga kababayen-an han iya mga opisyal hin waray kaawod!”

²¹ Binmaton hi David, “Nagsinayaw ako ha pagpasidungog han Ginoo nga nagpili ha akon nga liwan han imo amay ngan han iya panimalay ngan naghimo ha akon nga pangulo han iya mga tawo nga Israel. Ngan magpapadayon ako pagsayaw ha pagpasidungog han Ginoo,

²² ngan magmamakaarawod pa ako labaw pa han akon ginbuhat. Bangin pakaalohan ako nimo, kundi dadayawon ako hadto nga kababayen-an!”

²³ Waray gud mag-anak hi Mical nga anak ni Saul, asta nga namatay.