2 Samuel 5 - Samarenyo Meaning-Based Bible (1984)

Nahimo hi David nga Hadi han Israel ug Juda

¹ Ngan kinmadto kan David didto ha Hebron an ngatanan nga mga tribo han Israel ngan nagsiring ha iya, “Imo kami kalugaringon ha unod ug dugo.

² Han naglabay nga panahon, bisan han hadi pa namon hi Saul, nangulo ka na han mga tawo han Israel, didto ha pag-awayan, ngan nagsaad ha imo an Ginoo nga ikaw an magdudumara han iya mga tawo ngan magigin pangulo ka nira.”

³ Sanglit kinmadto kan David didto ha Hebron an ngatanan nga mga pangulo han Israel. Nagsumpa hi David hin pakig-urosa ha ira, gindihogan hiya nira, ngan nahimo hiya nga hadi han Israel.

⁴ Hi David 30 na an panuigon han kahimo niya nga hadi, ngan naghadi hiya hin 40 ka tuig.

⁵ Naghadi hiya han Juda didto ha Hebron sulod hin pito ka tuig hin tunga, ngan han bug-os nga Israel ug Juda didto ha Jerusalem sulod hin 33 ka tuig.

⁶ Inmabot an panahon nga ginsulong ni Hadi David ngan han iya mga tawo an Jerusalem. Naghunahuna an mga Jebuseohanon nga nag-ukoy didto nga diri makakabihag han syudad hi David sanglit nagsiring hira ha iya, “Diri ka gud makakasulod ngadi; makakapugong ha imo bisan an mga buta ngan an mga lulid la.” (

⁷ Kundi nabihag ni David an ira madig-on nga kota han Sion, ngan ginkilala ini nga “Syudad ni David.”)

⁸ Hito nga adlaw, nagsiring hi David ha iya mga tawo, “May-ada ba dinhe ha iyo nagdudumot han mga Jebuseohanon sugad han akon pagdumot? Pagdumot nga igo pumatay ha ira? Kon may-ada, sagka kamo ngan didto kamo sulod han aragian han tubig ngan sulonga niyo an mga buta ngan mga lulid.” (Amo ini nga iginsiring, “Diri makakasulod han balay han Ginoo an mga buta ngan mga lulid.”)

⁹ Katapos mabihag an madig-on nga kota, didto na pag-ukoy hi David ngan ginngaranan ini nga “Syudad ni David.” Gintindog niya an syudad ngan ginpalibotan ini hin pader tikang han dapit nga tinak-upan hin tuna didto han sinirangan nga ligid han pungtod.

¹⁰ Nagtikakusog la hi David, kay nakada ha iya an Ginoo nga Dyos nga Labi Kamakagarahum.

¹¹ Nagsugo ngadto kan David hi Hadi Hiram han Tiro hin mga tawo nga may-ada dara nga mga troso nga sidro ngan hin mga panday ngan mga kantero para pagtindog hin palasyo.

¹² Sanglit nakasabot hi David nga ginpadig-on hiya han Ginoo nga hadi han Israel, ngan nagmainuswagon an iya ginhadian tungod han iya mga tawo.

¹³ Han pagbalhin na ni David tikang ha Hebron ngadto ha Jerusalem, nadugangan pa an iya mga asawa ug aruasawa, ngan nagkamay-ada hiya damo pa nga mga anak nga kalalaken-an ngan kababayen-an.

¹⁴ Amo ini an mga anak nga natawo didto ha Jerusalem: hira Samua, Sobab, Natan, Solomon,

¹⁵ Ibaar, Elisua, Nefeg, Jafia,

¹⁶ Elisama, Eliada, ug Elifelet.

Gindaog an mga Filisteohanon

¹⁷ Nasumatan an mga Filisteohanon nga ginhimo hi David nga hadi han Israel, sanglit nagkagawas an ira kasondalohan hin pagdakop ha iya. Han paghibaro hini ni David, linmugsong hiya ngadto hin pinadig-on nga kota.

¹⁸ Nagkaabot ngadto ha Kahamub-an han Refaim an mga Filisteohanon ngan ginrikopohan ini.

¹⁹ Nagpakiana han Ginoo hi David, “Susulongon ko ba an mga Filisteohanon? Padadag-on mo ba ako?” “Sulonga,” binmaton an Ginoo. “Padadag-on ko ikaw!”

²⁰ Sanglit kinmadto ha Baal Perazim hi David, ngan ginpirde niya didto an mga Filisteohanon. Nagsiring hiya, “An Ginoo, sugad hin pagbulwang hin baha, nakabungkag han akon mga kaaway.” Sanglit ginngaranan adto nga dapit nga Baal Perazim.

²¹ Han pangalagiw han mga Filisteohanon, ginbayaan nira didto an ira mga diyosdiyos, ngan gindara ini ni David ngan han iya mga tawo.

²² Niyan binmalik ngadto ha Kahamub-an han Refaim an mga Filisteohanon ngan ginrikopohan na liwat ini.

²³ Ginpakianhan na liwat ni David an Ginoo nga nagbaton, “Ayaw hira pagsulonga tikang dinhe, kundi libota ngan sulonga hira ha luyo, hirani han mga kahoy nga balsamo.

²⁴ Kon hibatian mo in mga aringasa sugad hin tubadok hin mga pitad ha bawbaw han kakahoyan, sulong dayon kamo, kay mag-uuna ako ha imo hin pagpukan han kasondalohan nga Filisteohanon.”

²⁵ Gintuman ni David an iginsugo han Ginoo, ngan nakatabog hiya han mga Filisteohanon tikang ha Gabaon tubtob gud ngadto ha Gezer.