2 Samuel 17 - Samarenyo Meaning-Based Bible (1984)

Ginlipat hi Absalon ni Husai

¹ Niyan nagsiring hi Ahitofel kan Absalon, “Tugoti ako hin pagpili hin 12,000 nga mga tawo, ngan lalanaton ko hi David niyan nga gab-i.

² Susulongon ko hiya samtang binubutlaw ngan kinakapoy hiya. Kakalasan hiya, ngan mangangalagiw an ngatanan niya nga mga tawo. An hadi la an akon papatayon,

³ ngan dadad-on ko ha imo an ngatanan niya nga mga tawo sugad hin asawa nga na-uli ngadto han iya bana. Karuyag mo pagpatay hin usa la ka tawo; ngan paghatag hin kalinaw han iba nga mga tawo.”

⁴ Daw nakalipay ini nga sagdon kan Absalon ngan han ngatanan nga mga punoan nga Israelita.

⁵ Nagsiring hi Absalon, “Tawaga liwat hi Husai, ngan pamatii ta kon ano man an iya igsisiring.”

⁶ Han pag-abot ni Husai, ginsiring hiya ni Absalon, “Amo ini an iginsagdon ha amon ni Ahitofel; susundon ba namon ini? Kon diri, sumati kami kon ano an angay buhaton.”

⁷ Binmaton hi Husai, “Diri maupay an iginsagdon ha iyo yana ni Ahitofel.

⁸ Maaram ka man nga makarit nga paraaway hi David nga imo amay ngan an iya mga tawo, ngan magpintas hira sugad hin uso nga anakan nga inagawan han iya mga nati. Batid nga sondalo an imo amay ngan diri hiya natampo han iya mga tawo kon gab-i.

⁹ Ito yana bangin natago hiya didto hin usa nga lungib o hin iba nga dapit. Ha pagsulonga ni David han imo mga tawo, masiring an bisan hin-o nga makabati hini nga napirde na an imo mga tawo.

¹⁰ Niyan mahadlok an bisan hin-o nga giiisogi nga tawo, nga sugad hin mga liyon kamagpintas, kay maaram an ngatanan ha Israel nga makarit nga sondalo an imo amay, ngan mapintas nga paraaway an iya mga tawo.

¹¹ An akon sagdon amo ini: tiroka an ngatanan nga mga Israelita nga sugad kadamo han baras ha baybayon tikang ha Dan ngadto ha Berseba, ngan ikaw ngahaw an pagmando ha ira didto ha pag-awayan.

¹² Hiaagian ta hi David bisan hain hiya, ngan susulongon ta hiya hin tigda, ngan waray gud mahibibilin nga buhi ha ira.

¹³ Kon umisol hiya ngadto hin syudad, magdadara hin mga pisi an ngatanan naton nga mga tawo ngan pupukanon ta an syudad ngadto han kahamub-an tubtob nga waray gud mahibilin nga bato ha bawbaw han pungtod.”

¹⁴ Nagsiring hi Absalon ngan an ngatanan nga mga Israelita, “Mauruupay an sagdon ni Husai kay han kan Ahitofel.” Nagbuot an Ginoo nga diri sundon an maupay nga sagdon ni Ahitofel, basi mapukan hi Absalon.

Nasumatan hi David ngan Nakalikay

¹⁵ Niyan ginsumatan ni Husai hira Sadoc ug Abiatar nga mga padi han iya iginsagdon kanda Absalon ngan han mga punoan nga Israelita, ngan han iginsagdon ni Ahitofel.

¹⁶ Iginsiring pa ni Husai, “Pagdagmit yana! Patugoni dayon hi David nga diri hiya magpabilin yana nga gab-i dida han mga tarabukan han salog didto ha kamingawan, kundi tumabok gud dayon han Jordan, basi diri madakop ngan patayon hiya ngan an ngatanan niya nga mga tawo.”

¹⁷ Naghinulat didto han burabod han Enrogel, didto ha gawas la han Jerusalem, hira Jonatan nga anak ni Abiatar ngan hi Ahimaas nga anak ni Sadoc, kay diri hira buot hikit-an nga nasulod hira han syudad. Napakadto hin masukot in surugoon nga babaye pagsumat ha ira han mga nahinanabo, ngan hira liwat napakadto pagsumat kan Hadi David.

¹⁸ Kundi usa ka adlaw hinkit-an hira hin lalakehay, nga nagsumat kan Absalon; sanglit nagdagmit hira pagtago didto han balay hin usa ka tawo ha Bahurim. May-ada hiya atabay hirani han iya balay, ngan tinmago hira didto.

¹⁹ Gintahoban han asawa han tawo an ganggang han atabay; ngan ginbularan niya hin trigo, basi waray makasabot.

²⁰ Inmabot ngadto han balay an mga opisyal ni Absalon ngan nagpakiana han babaye, “Hain hira Ahimaas ug Jonatan?” “Tinmabok hira han salog,” binmaton hiya. Nagpinamiling ha ira an mga tawo kundi kay waray man makaagi, binmalik hira ngadto ha Jerusalem.

²¹ Han pagkalakat na nira, ginmawas ha atabay hira Ahimaas ug Jonatan ngan kinmadto hira pagsumat kan Hadi David. Ginsumatan nira hi David han iginlarang ni Ahitofel kontra ha iya ngan nagsiring hira, “Pagdagmit ngan tabok dayon han salog.”

²² Sanglit tinmabok han Jordan hira David ngan an iya mga tawo, ngan han pagkamaagahon didto na hira ngatanan ha tabok han Jordan.

²³ Han paghibaroi la ni Ahitofel nga waray pagsunda an iya sagdon, sinmakay hiya han iya asno, ngan inmoli ngadto han iya bungto. Katapos niya panhimos han iya mga butang, naghikog hiya. Iginlubong hiya didto han lubnganan han iya panimalay.

²⁴ Nakadto na hi David han bungto han Mahanaim han pakatabok han Jordan ni Absalon ngan han iya mga tawo. (

²⁵ Iginbutang ni Absalon hi Amasa nga pangulo han kasondalohan nga liwan kan Joab. Anak hi Amasa ni Itra nga Ismaelita; hi Abigail amo an iroy niya, nga anak ni Nahas ngan bugto ni Seruia nga iroy ni Joab.)

²⁶ Nagkampo didto han tuna han Galaad hi Absalon ngan an iya mga tawo.

²⁷ Han pag-abot ni David didto ha Mahanaim, ginsugat hiya ni Sobi, anak ni Nahas nga taga syudad han Raba didto ha Amon, ngan ni Maquir, anak ni Amiel nga taga-Lodebar, ngan ni Barzilai, taga-Rogelim didto ha Galaad.

^28-29 Nagdara hira hin mga makaong, mga daba, ngan garamiton hin pagkaturog ngan pagkaon liwat para kan David ngan han iya mga tawo: trigo, sebada, arina, sinanlag nga liniso, munggos, balatong, dugos, kiso, mantikilya, ngan mga karnero. Maaram hira nga gugutomon, uuhawon, ngan kakapoyon didto ha kamingawan hira David ngan an iya mga tawo.