2 Samuel 16 - Samarenyo Meaning-Based Bible (1984)

Nakigkita kan David hi Siba

¹ Han pakaunhan na ni David han sampaw han pungtod, ginsugat hiya ni Siba, surugoon ni Mefiboset, nga dara in duha nga asno, kargado hin 200 nga tinapay, 100 ka urapong nga mga ubas, 100 ka urapong nga mga prutas, ngan usa ka supot nga anit nga puno hin bino.

² Nagpakiana ha iya hi David, “Aanhon mo ito ngatanan?” Binmaton hi Siba, “Sarakyan han panimalay han Imo Kaharangdon an mga asno, pagkaon han imo mga tawo an mga tinapay ngan mga prutas, ngan irimnon nira an bino kon aboton hira in kakapoy didto ha kamingawan.”

³ Nagpakiana ha iya an hadi, “Hain man hi Mefiboset nga apo ni Saul nga imo agaron?” “Aadto hiya ha Jerusalem,” binmaton hi Siba, “kay naghuhunahuna hiya nga ibabalik na ha iya han mga Israelita an ginhadian ni Saul nga iya apoy.”

⁴ Nagsiring kan Siba an hadi, “Imo na an ngatanan nga gintatag-iya ni Mefiboset.” “Imo ako surugoon,” binmaton hi Siba. “Dayuday makalipay unta ako han Imo Kaharangdon.”

Gintunglo ni Simei hi David

⁵ Han pag-abot ni David ngadto ha Bahurim, ginsugat hiya ni Simei nga anak ni Gera, nga usa han kauropdan ni Saul, nga waray hunong an pagbinuyayaw kan David.

⁶ Ginbato ni Simei hi David ngan an iya mga opisyal, bisan kon ginlilibotan hi David han iya mga tawo ngan han iya mga gwardya.

⁷ Ginbinuyayaw hiya ni Simei ngan ginsiring, “Iwas! Iwas! Parapamatay! Kriminal!

⁸ Gin-agaw mo an ginhadian ni Saul, ngan ginkakastigo ka na yana han Ginoo tungod han damo nga pinamatay mo han panimalay ni Saul. Iginhatag na han Ginoo an ginhadian ngadto kan Absalon nga imo anak, ngan napukan ka na, ikaw nga parapamatay!”

⁹ Nagsiring han hadi hi Abisai nga anak ni Seruia, “Harangdon nga Hadi, kay ano nga natugot ka la nga pagbinuyayawon ka hini nga ayam? Tugoti na gud ako hin pagdaop ha iya ngan pupugoton ko an iya ulo!”

¹⁰ “Waray niyo labot hini,” nagsiring an hadi kan Abisai ug Joab nga iya bugto. “Kon gintunglo ako niya kay ginsugo hiya han Ginoo, hin-o man in magahom hin pagpakiana kay ano nga ginbuhat man niya ini?”

¹¹ Ngan nagsiring hi David kan Abisai ngan ha ngatanan nga iya mga opisyal, “Karuyag han akon kalugaringon nga anak nga patayon ako niya; sanglit kay ano nga nahipapausa kamo hini nga Benjaminhon? Ginsugo hiya han Ginoo hin pagtunglo; sanglit pabay-i la hiya ngan tugoti hiya hin pagtunglo ha akon.

¹² Manggad na la hikit-an han Ginoo an akon kasakitan ngan tagan ako hin mga kaupayan nga liwan han iya pagtunglo ha akon.”

¹³ Sanglit nagpadayon hin pagkalakat hira David ngan an iya mga tawo. Ginsinunod hira ni Simei didto ha ligid han pungtod, nga nagbibinuyayaw, nagbibinato, ngan nagsisinabrag hin tuna ha ira.

¹⁴ Kinapoy hin duro hi David ngan an ngatanan niya nga mga tawo han pag-abot nira han Jordan, ngan pinmahuway hira didto.

Inmabot ha Jerusalem hi Absalon

¹⁵ Sinmulod ha Jerusalem hi Absalon ngan an ngatanan nga mga Israelita nga tinmampo ha iya, ngan upod nira hi Ahitofel.

¹⁶ Han pagkakita la nira Absalon ug Husai, an sinarigan nga sangkay ni David, ginmoliat hi Husai, “Mabuhi an hadi! Mabuhi an hadi!”

¹⁷ Pinmakiana ha iya hi Absalon, “Amo ba ini an imo pag-ugop kan David nga imo sangkay? Kay ano nga waray ka umupod ha iya?”

¹⁸ Binmaton hi Husai, “Uunanhon ko man? Maupod ako han tawo nga ginpili han Ginoo, ngan han ngatanan nga mga Israelita. Magpapabilin ako ha imo.

¹⁹ Labot pa, hin-o pa man an akon pag-aalagdon, kon diri an anak han akon agaron? Sugad nga nag-alagad ako han imo amay, mag-aalagad man ako ha imo.”

²⁰ Niyan inatubang ni Absalon hi Ahitofel ngan ginsiring, “Yana nga aanhi na kita, ano an imo sadang isagdon ha akon?”

²¹ Binmaton hi Ahitofel, “Kadto na ngan pakighilawas han mga aruasawa han imo amay nga iginbilin niya hin panimangno han palasyo. Niyan mahibabaroan han ngatanan ha Israel nga imo ini gintuyo basi kontrahon ka han imo amay, ngan makakadasig ini han imo mga sakop.”

²² Sanglit nagtulda hira didto han atop han palasyo para kan Absalon, ngan ha atubangan han ngatanan sinmulod hi Absalon hin pakighilawas han mga aruasawa han iya amay.

²³ Hadto nga mga adlaw, an bisan ano nga sagdon ni Ahitofel kinarawat nga daw pulong han Dyos; gintuman ini nira David ug Absalon.