2 Samuel 10 - Samarenyo Meaning-Based Bible (1984)

Ginpirde ni David an mga Amonitanhon ngan mga Siriahanon

¹ Waray kaiha namatay hi Hadi Nahas han Amon ngan hi Hanun nga iya anak an naghadi.

² Nagsiring hi David, “Kinahanglan ipakita ko kan Hanun an maunongon nga pakigsangkay, sugad han ginbuhat ha akon ni Nahas nga iya amay.” Sanglit nagpasugo hi David ngadto kan Hadi Hanun hin pagpasabot han iya kabidoan tungod han kamatay ni Hadi Nahas. Han pag-abot han ginsugo ngadto ha Amon,

³ nagsiring han hadi an mga pangulo nga Amonitanhon, “Naghuhunahuna ka ba nga kadungganan ini ni imo tatay nga iginpadara ni David ini nga mga tawo pagpakita han iya kabidoan ha imo? Bangin diri! Iya ginsugo hira nganhi sugad nga mga mag-irinaw hin pag-usisa han syudad basi bihagon kita niya!”

⁴ Gindakop ni Hanun an mga sinugo ni David, gintusaran an luyo nga katunga han ira mga bungot, gintabasan ha may hawak an ira mga panapton, ngan ginpalakat hira.

⁵ Naawod hira hin duro hin pag-uli. Paghibaro ni David han nahinabo, nagpatugon hiya ha ira nga magpabilin la anay hira didto ha Jerico, ngan diri umuli ngada han pagtubo na liwat han ira mga bungot.

⁶ Nakasabot an mga Amonitanhon nga hi David ira na kaaway, sanglit nagsuhol hira hin 20,000 nga mga sondalo nga Siriahanon nga taga-Betrehob ug Soba, 12,000 nga mga tawo nga taga-Tob, ngan han hadi han Maaca upod in 1,000 nga mga tawo.

⁷ Hinbaroan ini ni David ngan ginsugo niya hi Joab hin pagsulong ha ira upod an ngatanan nga kasondalohan.

⁸ Nagkagawas an mga Amonitanhon ngan nag-andam pakig-away dida han aragian ngadto ha Raba nga kapital nira nga syudad, samtang an iba, an mga Siriahanon ngan an mga tawo nga tikang ha Tob ug Maaca, nag-andam didto ha kapatagan.

⁹ Hinsabotan ni Joab nga susulongon hiya han mga kaaway ha atubangan ngan ha talikoran, sanglit ginpili niya an gimamag-upayi nga mga sondalo han Israel ngan ginpaatubang hira han mga Siriahanon.

¹⁰ Iginbutang niya an iba han iya kasondalohan ha ubos han pagdumara ni Abisai nga iya bugto, nga ginpaatubang ini hira han mga Amonitanhon.

¹¹ Nagsiring ha iya hi Joab, “Kon hikit-an mo nga pinipirde na kami han mga Siriahanon, pakadi ngan buligi ako, ngan kon hikit-an ko nga pinipirde kamo han mga Amonitanhon, makada ako ngan bubuligan ko ikaw.

¹² Pagmakusog ngan pagmaisog! Pakig-away kita hin maupay tungod han aton mga tawo ngan tungod han mga syudad han aton Dyos. Ngan matuman unta an kaburot-on han Ginoo!”

¹³ Sinmulong hin pakig-away hi Joab ngan an iya mga tawo, ngan nangalagiw an mga Siriahanon.

¹⁴ Han pakakita han mga Amonitanhon nga nangangalagiw na an mga Siriahanon, pinmalagiw liwat hira tikang kan Abisai ngan inmisol ngadto han syudad. Niyan binmalik hi Joab tikang han iya pakig-away han mga Amonitanhon ngan inmoli ngadto ha Jerusalem.

¹⁵ Han pakakita han mga Siriahanon nga ginpirde na hira han mga Israelita, gintirok nira an ngatanan nira nga kasondalohan.

¹⁶ Ginpasugoan ni Hadi Hadadeser an mga Siriahanon nga nakadto ha sinirangan nga daplin han Salog Eufrates, ngan inmabot hira ngadto ha Helam ha ubos han pagdumara ni Sobac nga pangulo han kasondalohan ni Hadi Hadadeser han Soba.

¹⁷ Han paghibaroi hini ni David, iya gintirok an kasondalohan nga Israelita, tinmabok hiya han Salog Jordan, ngan inmabot ngadto ha Helam diin nag-andam an mga Siriahanon nga naatubang ha iya. Nagtikang an araway,

¹⁸ ngan gintabog han mga Israelita an kasondalohan nga Siriahanon. Pinamatay ni David ngan han iya mga tawo in 700 nga Siriahanon nga mga dikaruwahe ngan 40,000 nga mga dikabayo, ngan ginsamad nira hi Sobac, an pangulo han mga kaaway nga namatay didto ha pag-awayan.

¹⁹ Han paghikit-i la han mga hadi nga sakop ni Hadadeser nga ginpirde na hira han mga Israelita, nakigsabot hira hin kalinaw han Israel ngan nasakop hira han mga Israelita. Sanglit nahadlok na gud an mga Siriahanon hin pagbulig han mga Amonitanhon.