2 Hadi 1 - Samarenyo Meaning-Based Bible (1984)

Nakigkita hi Elias kan Hadi Ahasias

¹ Han kamatay ni Hadi Acab han Israel, nakig-away han Israel an nasod han Moab.

² Nahulog hi Hadi Ahasias han Israel tikang han balkon ha atop han iya palasyo ha Samaria, ngan nasakit hiya. Sanglit may-ada hiya ginsugo hin pagpakiana kan Baalsebub nga diyos han Filisteohanon nga syudad han Ekron, basi hibaroan kon mag-uupay pa ba hiya o diri.

³ Kundi nagsugo kan Elias nga manaragna nga taga-Tisbe in anghel han Ginoo hin pagkadto ngan pagtapo han mga sinugo ni Hadi Ahasias ngan pagpakiana ha ira, “Kay ano nga napakadto kamo hin pagpakiana kan Baalsebub nga diyos han Ekron? Tungod ba nga naghuhunahuna kamo nga waray na Dyos ha Israel?

⁴ Sumati niyo an hadi nga nasiring an Ginoo, ‘Diri ka na mag-uupay han imo sakit; mapatay ka!’” Gintuman ni Elias an iginsugo han Ginoo,

⁵ ngan binmalik ngadto han hadi an mga sinugo. Nagpakiana an hadi, “Kay ano nga binmalik man kamo?”

⁶ Binmaton hira, “Gintapo kami hin tawo nga nagpabalik ha amon hin pagsumat ha imo nga nasiring an Ginoo, ‘Kay ano nga nagsugo ka hin mga tawo hin pagpakiana kan Baalsebub nga diyos han Ekron? Tungod ba ini nga naghuhunahuna ka nga waray na dyos ha Israel? Diri ka na mag-uupay han imo sakit; mapatay ka!’”

⁷ Nagpakiana an hadi, “Ano an panagway han tawo?”

⁸ Binmaton hira, “An iya bado kanan anit hin mananap sugad man an iya bakos ha hawak.” “Hi Elias adto!” nagsiring an hadi.

⁹ Niyan nagsugo hiya hin opisyal upod in 50 ka tawo hin pagkuha kan Elias. Hin-agian hiya nga nalingkod ha bawbaw hin pungtod, ngan nagsiring ha iya an opisyal, “Tawo han Dyos, nagsugo an hadi nga lumugsong ka.”

¹⁰ Binmaton hi Elias, “Kon tawo man ako han Dyos, kumunsad unta tikang ha langit in kalayo ngan sunogon ka ngan an imo mga tawo ngada hin kamatay niyo!” Kinmunsad dayon in kalayo, ginsunog an opisyal ngan an iya mga tawo ngan namatay hira.

¹¹ Nagsugo an hadi hin lain nga opisyal upod in 50 ka tawo, nga kinmadto ngan nagsiring kan Elias, “Tawo han Dyos, nagsugo an hadi nga lumugsong ka dayon!”

¹² Binmaton hi Elias, “Kon tawo man ako han Dyos, kumunsad unta tikang ha langit in kalayo ngan sunogon ka ngan an imo mga tawo ngada hin kamatay niyo!” Kinmunsad dayon in kalayo, ginsunog an opisyal ngan an iya mga tawo, ngan namatay hira.

¹³ Makausa pa nagsugo an hadi hin lain nga opisyal upod in 50 ka tawo. Sinmagka hiya han pungtod, linmuhod ha atubangan ni Elias, ngan nakimalooy, “Tawo han Dyos, kalooyi intawon ako ngan an akon mga tawo. Ayaw gad kami pamataya!

¹⁴ Ginpamatay hin kalayo nga tikang ha langit an duha nga mga opisyal ngan an ira mga tawo; kundi kalooyi intawon ako!”

¹⁵ Nagsiring kan Elias an anghel han Ginoo, “Lugsong upod ha iya, ngan ayaw kahadlok.” Sanglit inmupod hi Elias han opisyal ngadto han hadi,

¹⁶ ngan ginsiring an hadi, “Amo ini an siring han Ginoo: ‘Tungod nga nagsugo ka hin pagpakiana kan Baalsebub nga diyos han Ekron—sugad hin waray na Dyos ha Israel nga sadang pakianhan—diri ka mag-uupay; mapatay ka!’”

¹⁷ Namatay hi Ahasias, sumala han iginsiring han Ginoo kan Elias. Waray mga anak nga lalake hi Ahasias, sanglit sinmunod ha iya hin pagkahadi hi Joram nga iya bugto, dida han ikaduha ka tuig nga pagkahadi han Juda ni Joram nga anak ni Josafat.

¹⁸ Nahisurat dida han Kasaysayan han Kahadian han Israel an iba pa nga nabuhat ni Hadi Ahasias.