1 Samuel 8 - Samarenyo Meaning-Based Bible (1984)

Nag-aro hin Hadi an mga Tawo

¹ Han tigurang na hi Samuel, ginhimo niya an iya mga anak nga mga maghurukom didto ha Israel.

² Joel an ngaran han magurang nga anak ngan Abia an manghod; mga maghurukom hira didto ha Berseba.

³ Kundi waray hira magsunod han mga susbaran han ira amay; asay la nira tuyo an panalapi, sanglit nakarawat hira hin mga hukip, ngan diri hira taptap magtuhay hin mga kalipongan.

⁴ Niyan nagtirok an ngatanan nga mga pangulo han Israel, kinmadto hira kan Samuel didto ha Rama,

⁵ ngan nagsiring ha iya, “Kitaa daw, tikalagas ka na ngan an imo mga anak diri nagsusunod han imo susbaranan. Sanglit pagtudlok hin usa nga hadi nga magpapangulo ha amon, basi magkamay-ada kami usa nga hadi sugad han iba nga mga nasod.”

⁶ Nakabido kan Samuel an ira pangaro hin hadi; sanglit nag-ampo hiya han Ginoo,

⁷ ngan nagsiring an Ginoo, “Pamatii an ngatanan nga pinangaro ha imo han mga tawo. Diri ikaw an ira ginsasalikway kundi hi ako.

⁸ Tikang pa han pagdad-a ko ha ira tikang ha Ehipto, binmaya na hira ha akon ngan nagsingba hin iba nga kadiyosan; ngan yana ginbubuhat nira ha imo an masukot nira buhaton ha akon.

⁹ Sanglit pamatii hira, kundi pahimatngoni gud hira hin maupay ngan pagsaysayi hira kon uunanhon han ira kahadian hin pagdumara ha ira.”

¹⁰ An ngatanan nga tugon ha iya han Ginoo iginsumat ni Samuel ngadto han mga tawo nga naaro ha iya hin hadi.

¹¹ Iginsaysay ni Samuel, “Amo ini an bubuhaton ha iyo han iyo hadi. Hihimoon niya nga mga sondalo an iyo mga anak nga kalalaken-an; may-ada ha ira magmamaneho han iya mga karuwahe; an iba hihimoon nga iya dikabayo nga mga sondalo, ngan an iba pa madalagan hin pag-una han iya mga karuwahe.

¹² Hihimoon niya an iba ha ira nga mga opisyal nga tinaporan hin tinag-1,000 nga mga tawo, ngan an iba tinaporan hin tinag-50 nga mga tawo. Mag-aarado han iya mga uma an iyo mga anak nga kalalaken-an, mag-aani han iya mga aranihon, ngan manhihimo han iya mga hinganiban ngan kasangkapan han iya mga karuwahe.

¹³ Maghihimo an iyo mga anak nga kababayen-an hin iya mga pahamot, ngan magbubuhat nga iya mga paraluto ngan mga parahudno.

¹⁴ Kukuhaon niya an iyo gimamag-upayi nga mga uma, mga urubasan, ngan mga kaolibohan, ngan ighahatag ini niya ngadto han iya mga opisyal.

¹⁵ Kukuhaon niya an ikanapulo nga bahin han iyo mga pagkaon ngan han iyo mga ubas para han iya mga opisyal han palasyo ngan iba pa nga mga opisyal.

¹⁶ Kukuhaon niya an iyo mga surugoon, ngan an iyo gimamag-upayi nga kabakahan ngan kaasnohan, ngan magbubuhat ini hira para ha iya.

¹⁷ Kukuhaon niya ha iyo an ikanapulo nga bahin han iyo mga panon, ngan mahihimo kamo ngahaw nga iya mga oripon.

¹⁸ Kon umabot na ito nga panahon, mangurutob kamo tungod han iyo hadi nga kamo ngahaw an nagpili, kundi diri pamamatian han Ginoo an iyo mga sumbong.”

¹⁹ Waray la bumali kan Samuel an mga tawo, kundi nagsiring hira, “Diri! Karuyag gud namon in usa nga hadi,

²⁰ basi masugad kami han iba nga mga nasod, nga may-ada namon kalugaringon nga hadi nga mamumuno ha amon, ngan mangungulo ha amon ha pag-awayan.”

²¹ Pinamatian ni Samuel an ngatanan nga ira iginsiring ngan linmakat hiya ngan ginsumatan niya an Ginoo.

²² Binmaton an Ginoo, “Buhata an ira karuyag ngan tagi hira hin usa nga hadi.” Katapos ginpaoli ni Samuel an ngatanan nga mga tawo han Israel.