1 Samuel 6 - Samarenyo Meaning-Based Bible (1984)

Nahibalik an Kahon han Ginsaaran

¹ Katapos hin pito ka bulan nga nakadto ha Filistia an Kahon han Ginsaaran han Ginoo,

² gintawag han mga tawo an kapadian ngan an mga paratigo, ngan ginpakianhan hira, “Ano an angay naton buhaton han Kahon han Ginsaaran han Ginoo? Kon aton igbalik ini ngadto han dapit nga iya hinmumutangan, ano man an aton igpapabalon hini?”

³ Binmaton hira, “Kon igbalik niyo an Kahon han Ginsaaran han Dyos han Israel, kinahanglan pabalonan niyo ini hin usa nga regalo ha iya hin pagbayad tungod han iyo sala. Kinahanglan diri bumalik an Kahon han Ginsaaran nga waray upod nga regalo. Dida hini nga paagi, matatambal kamo, ngan hibabaroan niyo kay ano nga ginkinastigo kamo niya.”

⁴ “Ano nga regalo an amon igpapadara ha iya?” nagpakiana an mga tawo. Binmaton hira, “Lima ka bug-os nga bulawan nga ginporma sugad hin mga hubag ngan hin lima ka bug-os nga bulawan nga ginporma sugad hin yatot, tag-usa ka padis para han kada usa nga hadi nga Filisteohanon. Amo gihapon nga peste an iginpadara ha iyo ngatanan ngan han lima nga kahadian.

⁵ Kinahanglan paghimoon niyo ini nga mga modelo han mga hubag ngan han mga yatot nga nakaluob hin pagbungkag han iyo nasod, ngan kinahanglan pagpasidunggan niyo an Dyos han Israel. Bangin undangon niya an pagkastigo ha iyo, han iyo kadiyosan, ngan han iyo tuna.

⁶ Kay ano nga matig-a man an iyo ulo sugad han hadi han Ehipto ngan han mga Ehiptohanon? Ayaw niyo hingalimti kon gin-unan-o han Dyos hin paglurong ha ira tubtob han pagpagawsa nira han mga Israelita tikang ha Ehipto.

⁷ Sanglit pag-andam kamo hin bag-o nga karomata ngan duha nga mga baka nga waray pa gud kasangati hin yugo. Igsangat ini ha karomata ngan taboga an mga nati hini hin pagpabalik ngadto han kamalig.

⁸ Kuhaa an Kahon han Ginsaaran han Ginoo ngan igkarga ini dida han karomata, ngan isapit liwat hini in kahon nga may sulod nga bulawan nga mga modelo nga iyo regalo para pagbayad han iyo mga sala. Iduso an karomata ngan papaglugaringa hin paglakat.

⁹ Niyan bantayi ini; kon tadongon hini an bungto han Betsemes, karuyag sidngon hini nga an diyos han mga Israelita amo an nagpadara hini nga makalilisang nga kakurian. Kundi kon diri, aton hibabaroan nga diri hiya amo an nagpadara han peste; usa la ini nga nahinabo ha aton.”

¹⁰ Gintuman nira an iginsiring ha ira: kinmuha hira hin duha nga baka ngan iginsangat ini ha karomata, ngan ginsadhan an mga nati didto han kamalig.

¹¹ Iginkarga nira an Kahon han Ginsaaran dida han karomata, upod an kahon nga ginsusudlan han bulawan nga mga modelo han mga yatot ngan mga hubag.

¹² Nagtipakadto an mga baka ha Betsemes, ngan gintadong ini nga dalan ngan waray gud lumiko. Nag-iininga an mga baka samtang naglalakat. Sinmunod an lima nga kahadian nga Filisteohanon tubtob han pag-ultan han Betsemes.

¹³ Nag-aani hin trigo an mga tawo han Betsemes didto han kahamub-an ngan ha gilayon ira hinkit-an an Kahon han Ginsaaran, ngan tugob hira hin kalipay tungod han ira hinkit-an.

¹⁴ Didto hunong an karomata hin usa nga uma nga gintag-iya ni Josue nga taga-Betsemes, didto hin dapit hirani hin usa nga dako nga bato. Gintiak han mga tawo an karomata, gin-ihaw an mga baka, ngan gintubod ini nga usa nga halad nga tinubod ngadto han Ginoo.

¹⁵ Gin-alsa han mga Levita an Kahon han Ginsaaran han Ginoo ngan an kahon nga may sulod nga bulawan nga mga modelo, ngan iginbutang ini dida ha bawbaw han dako nga bato. Niyan naghalad an mga tawo han Betsemes hin mga halad nga tinubod ngan iba nga mga halad ngadto han Ginoo.

¹⁶ Kahuman nagkinita an lima nga kahadian nga Filisteohanon ngan inmoli hira ha Ekron hito ngahaw nga adlaw.

¹⁷ Ginpadara han mga Filisteohanon an lima nga bulawan nga mga hubag sugad nga ira regalo ngadto han Ginoo hin pagbayad tungod han ira mga sala. Natindog ini para han mga syudad han Asdod, Gaza, Askelon, Gat, ug Ekron.

¹⁸ An bulawan nga mga yatot natindog liwat para han tagsa nga syudad nga ginhahadian han lima nga kahadian nga Filisteohanon, an mga bungto nga ginpalibotan hin kota upod an mga baryo nga waray mga pader. Aadto pa yana an dako nga bato han uma ni Josue nga taga-Betsemes, nga ginbutangan han Kahon ha Ginsaaran han Ginoo sugad nga usa nga saksi han nahinabo.

¹⁹ Ginpatay han Ginoo in 70 nga kalalaken-an han Betsemes kay hinmiling hira han Kahon han Ginsaaran. Ngan nagmabidoon an mga tawo kay damo ha ira an ginpatay han Ginoo.

Gindara ha Kiriat Jearim an Kahon han Ginsaaran

²⁰ Sanglit nagsiring an mga tawo han Betsemes, “Hin-o in makakatindog ha atubangan han Ginoo, hini nga baraan nga Dyos? Ngain ta hiya dadad-a basi mahibulag hiya ha aton?”

²¹ Nagpadara hira hin mga surugoon ngadto han mga tawo han Kiriat Jearim hin pagsiring, “Igin-uli na han mga Filisteohanon an Kahon han Ginsaaran han Ginoo. Lugsong kamo ngan kuhaa niyo ini.”