1 Samuel 4 - Samarenyo Meaning-Based Bible (1984)

Nabihag an Kahon han Ginsaaran

¹ Hito nga panahon nakig-away an mga Filisteohanon kontra han Israel. Ginmawas hin pakig-away an mga Israelita ngan nagkampo hira didto ha Ebenezer ngan an mga Filisteohanon didto ha Apek.

² Sinmulong an mga Filisteohanon, ngan katapos hin mapintas nga araway napirde nira an mga Israelita, ngan pinamatay nira in mga upat ka yukot ka tawo didto ha pag-awayan.

³ Han pagbalik na han nahisalin nga mga sondalo ngadto ha kampo, nagsiring an mga pangulo han Israel, “Kay ano nga tinmugot man an Ginoo nga madaog kita han mga Filisteohanon yana nga adlaw? Tana, kuhaa ta an Kahon han Ginsaaran han Ginoo didto ha Silo basi umopod hiya ha aton ngan talwason kita ha aton mga kaaway.”

⁴ Sanglit nagsugo hira hin mga surugoon ngadto ha Silo hin pagkuha han Kahon han Ginsaaran han Ginoo nga Labi Kamakagarahum nga nalingkod ha trono ha igbaw han mga kerubin. Ngan binmunyog han Kahon han Ginsaaran hira Ofni ug Pinehas, an duha nga mga anak ni Eli.

⁵ Han pag-abot na han Kahon han Ginsaaran, naggogliat an mga Israelita, nag-aningal an ira tingog nga nabay-og an tuna.

⁶ Hinbatian han mga Filisteohanon an gogliat, ngan nagsiring hira, “Pamatii ta daw an dagko nga gogliat didto han kampo han mga Hebreo! Ano ba an karuyag sidngon hini?” Han paghibaro nira nga inmabot ngay-an an Kahon han Ginsaaran han Ginoo didto han kampo han mga Hebreo,

⁷ nagkahahadlok hira ngan nagsiring, “Inmabot in usa nga diyos ngadto han ira kampo! Pirde na kita! Waray pa gud mahinabo ha aton in sugad hini!

⁸ Hin-o in magtatalwas ha aton tikang hito nga gamhanan nga kadiyosan? Amo hira an kadiyosan nga nagpatay han mga Ehiptohanon didto ha kamingawan!

⁹ Pagmaisog kamo, mga Filisteohanon! Pakig-away kamo ngan pagpakalalake, kay kon diri, maooripon kita han mga Hebreo sugad nga mga oripon man hira naton hadto. Sanglit pakig-away kamo ngan pagpakalalake kita hin kaisog.”

¹⁰ Nakig-away hin maupay an mga Filisteohanon ngan ginpirde nira an mga Israelita nga nanadlagan hira tipaoli. Makalilisang adto nga pamatay; pinamatay in 30,000 nga mga sondalo nga Israelita.

¹¹ Naagaw an Kahon han Ginsaaran han Ginoo, ngan pinamatay hira Ofni ug Pinehas nga mga anak ni Eli.

Namatay hi Eli

¹² Nagdinalagan in usa ka tawo nga sakop han tribo ni Benjamin tikang ha pag-awayan ngadto ha Silo, ngan inmabot hiya hito ngahaw nga adlaw. Ha pagpakita han iya kabidoan, nagsul-ot hiya hin gisi nga panapton ngan ginbutangan niya hin tapotapo an iya ulo.

¹³ Nalingkod hi Eli nagtitinan-aw ngadto ha unhan ha ligid han dalan tugob hin kabaraka mahitungod han Kahon han Ginsaaran. Nahisangyaw an sumat han tawo ha bug-os nga bungto, ngan an ngatanan nga mga tawo ginmoliat tungod hin kahadlok.

¹⁴ Han pakabati ni Eli han aringasa, nagpakiana hiya, “Ano ini nga aringasa?” Nagdagmit an tawo ngadto kan Eli ngan ginsumatan hiya. (

¹⁵ Hi Eli hini nga panahon 98 na an panuigon ngan haros buta na gud hiya.)

¹⁶ Nagsiring an tawo, “Kinmalagiw ako ha pag-awayan ngan nagdinalagan la ako nganhi yana nga adlaw.” Nagpakiana ha iya hi Eli, “Ano man an nahinabo, anak ko?”

¹⁷ Binmaton an surugoon, “Nangalagiw an mga Israelita tikang han mga Filisteohanon; makalilisang gud ini nga kapirdehan naton! Labot pa hito, pinamatay an imo mga anak nga hira Ofni ug Pinehas, ngan naagaw an Kahon han Ginsaaran han Dyos!”

¹⁸ Han paghinabihi la han tawo hiunong han Kahon han Ginsaaran, nahipahuyang hi Eli ha iya linilingkoran ha ligid han ganghaan. Lagas na gud hiya ngan matambok sanglit nabari an iya liog hadto nga iya kahuyang ngan namatay hiya. Nagin pangulo hiya han Israel sulod hin 40 ka tuig.

Namatay an Asawa ni Pinehas

¹⁹ Burod ngan tipag-aranak na gud an babaye nga umagad ni Eli ngan asawa ni Pinehas. Han pakabati niya nga nabihag na an kanan Dyos Kahon han Ginsaaran, ngan patay na an iya ugangan nga lalake ngan an iya bana, nagbati hiya dayon ngan nag-anak.

²⁰ Han tikamaratay na hiya, ginsiring hiya han kababayen-an nga binmulig ha iya hin pagpaanak, “Ayaw kahadlok! May-ada ka na usa nga lalake!” Kundi waray la hiya mamati ngan waray bumaton.

²¹ Ginngaranan niya nga Icabod an bata, kay siring pa niya, “Binmaya na han Israel an himaya han Dyos”—tungod han kabihag han Kahon han Ginsaaran ngan han kamatay han iya ugangan nga lalake ngan han iya bana.

²² Nagsiring hiya, “Binmaya na han Israel an himaya han Dyos, kay naagaw na an kanan Dyos Kahon han Ginsaaran.”