1 Samuel 3 - Samarenyo Meaning-Based Bible (1984)

Pinmakita kan Samuel an Ginoo

¹ Hadto nga mga adlaw han nag-aalagad han Ginoo an bata nga hi Samuel ubos han pagdumara ni Eli, diri pa adto damo an mga mensahe han Ginoo, ngan talagsaon la an mga panan-awon nga tikang ha iya.

² Usa ka gab-i hi Eli nga haros buta na nakaturog didto han iya kalugaringon nga kwarto;

³ nakaturog man hi Samuel didto ha balay han Ginoo diin nakadto an baraan nga Kahon han Ginsaaran. Han maagahon pa, samtang naglalaga pa an pakaagahan nga suga,

⁴ nagtawag an Ginoo kan Samuel. Binmaton hiya, “Aadi ako!”

⁵ ngan dinmalagan hiya ngadto kan Eli ngan nagsiring, “Nagtawag ka ha akon, ngan iini na ako.” Kundi binmaton hi Eli, “Waray ako magtawag ha imo; balik ha imo higdaan.” Sanglit binmalik hin paghigda hi Samuel.

^6-7 Nagtawag liwat an Ginoo kan Samuel. Waray kalibutan an bata nga amo adto an Ginoo, kay waray pa gud maghimangraw ha iya an Ginoo hadto. Sanglit binmuhat hiya, kinmadto kan Eli ngan nagsiring, “Nagtawag ka ha akon, ngan iini na ako.” Kundi binmaton hi Eli, “Anak ko, waray ako magtawag ha imo; balik ha imo higdaan.”

⁸ Nagtawag kan Samuel an Ginoo hin ikatulo; binmuhat hiya, kinmadto kan Eli ngan nagsiring, “Nagtawag ka ha akon, ngan iini na ako.” Niyan nakasabot hi Eli nga an Ginoo amo an nagtawag han bata,

⁹ sanglit nagsiring hiya han bata, “Balik ha imo higdaan, ngan kon tawgon ka pa niya, sidnga, ‘Pagyakan, Ginoo, kay namamati an imo surugoon.’” Binmalik ha iya higdaan hi Samuel.

¹⁰ Inmabot an Ginoo ngan tinmindog hiya didto, ngan nagtawag sugad han una, “Samuel! Samuel!” Binmaton hi Samuel, “Pagyakan; namamati an imo surugoon.”

¹¹ Nagsiring ha iya an Ginoo, “May adlaw nga may-ada ko makalilisang nga pagbubuhaton han mga tawo han Israel, nga mahahadlok gud an ngatanan nga makakabati hini.

¹² Dida hito nga adlaw tutumanon ko an ngatanan nakon nga mga pagtarhog kontra han panimalay ni Eli tikang ha tinikangan ngadto ha kataposan.

¹³ Ginsumatan ko na hiya nga kakastigohon ko ha kadayonan an iya panimalay, kay an iya mga anak nagnamastamas ha akon. Nahibaro hi Eli nga ginbinuhat ini han iya mga anak kundi waray niya sawaya hira.

¹⁴ Sanglit iginsumpa ko ini han panimalay ni Eli nga waray gud halad nga tinubod o bisan ano nga halad nga makakapara han mga lara hini nga makalilisang nga sala.”

¹⁵ Naghinigda hi Samuel ngada han pagkaaga; niyan binmuhat hiya ngan gin-abrehan niya an mga porta han balay han Ginoo. Nahadlok hiya hin pagsumat kan Eli mahitungod han panan-awon.

¹⁶ Gintawag hiya ni Eli, “Samuel, anak ko!” “Aadi ako,” binmaton hi Samuel.

¹⁷ Nagpakiana hi Eli, “Ano an iginsumat ha imo han Ginoo? Ayaw ako paglirongi hin bisan ano? Kakastigohon ka gayud han Dyos kon diri mo igsumat ha akon an ngatanan nga iya iginsiring.”

¹⁸ Sanglit iginsumat ha iya ni Samuel an ngatanan; waray gud niya iginlirong nga bisan ano. Nagsiring hi Eli, “Amo hiya an Ginoo; tutumanon niya an bisan ano nga maupay gud buhaton niya.”

¹⁹ Samtang nagtubo hi Samuel, kaupod niya an Ginoo, ngan gintuman niya an ngatanan nga iginyakan ni Samuel.

²⁰ Sanglit nahibaro an ngatanan nga mga tawo han Israel, tikang ha usa nga kataposan han tuna ngadto ha luyo, nga tinuod gud nga hi Samuel usa nga manaragna han Ginoo.

²¹ Nagpadayon an Ginoo hin pagpadayag didto ha Silo, diin pinmakita ngan naghimangraw hiya kan Samuel. Ngan an ginhimangraw ni Samuel nahisangyaw ha bug-os nga Israel.