1 Samuel 2 - Samarenyo Meaning-Based Bible (1984)

Nag-ampo hi Ana

¹ Nag-ampo hi Ana: “Ginpuno han Ginoo hin kalipay an akon kasingkasing; kamalipayon ko tungod han iya ginbuhat! Gintataw-an ko la an akon mga kaaway; kamalipayon ko kay ginbuligan ako han Dyos!

² “Waray tawo nga baraan nga sugad han Ginoo; waray gud sugad ha iya, waray darangpan nga sugad han aton Dyos.

³ Hunonga na an iyo duro nga paghinambog; hiloma na an iyo mapinahitas-on nga mga pulong. Kay an Ginoo amo in usa nga Dyos nga maaram, ngan naghuhukom hiya han ngatanan nga buhat han mga tawo.

⁴ Nababari an mga pana han kusgan nga mga sondalo, kundi nagmamakusog an mga magluya.

⁵ An mga tawo nga hadto anay hura hin pagkaon nagpapasuhol na yana basi makakaon; kundi may-ada na pagkaon an mga ginugutom. Ag-anak an baw-as nga asawa hin pito nga anak, kundi an iroy hin damo napuohan hin mga anak.

⁶ Makakahimo an Ginoo hin pagpatay ngan hin paghatag liwat kinabuhi; pinapakadto niya an mga tawo ha kalibutan han mga patay, ngan ginkukuha liwat niya.

⁷ Itinugot niya nga mapobre in pira nga mga tawo ngan mariko an iba; nga magpaubos in pipira ngan magamhanan an iba.

⁸ Binabayaw niya an mga kablas tikang ha tuna, ngan binabangon niya an mga makalolooy ha ira kakurian. Ngan ginhihimo hira nga mga kaupod hin mga pangulo, ngan ibinubutang hira ha mga dapit nga dungganan. An Ginoo an tag-iya han mga patukoranan han tuna; nga ginpatindogan niya han kalibutan.

⁹ “Pinananalipdan niya an matinumanon nga mga tawo, kundi naaanaw ha kasisidman an mga magraot diri nagdadaog in tawo pinaagi han iya kalugaringon nga kusog.

¹⁰ Pupuohon an mga kaaway han Ginoo. Magoliat hiya sugad hin dalugdog tikang ha langit. Huhukman han Ginoo an bug-os nga kalibutan; tatagan niya hin gahom an iya hadi, ngan magmamadinaogon an iya pinili nga hadi.”

¹¹ Katapos inmoli hi Elcana ngadto ha Rama; kundi pinmabilin an bata nga hi Samuel didto ha Silo, ngan nag-alagad hiya han Ginoo ha ubos han pagdumara ni Eli nga padi.

An mga Anak ni Eli

¹² Mga bugoy an mga anak ni Eli. Waray nira pagtahod han Ginoo

¹³ o han mga turumanon hiunong han angay pangaroon han kapadian tikang han mga tawo. Lugod, kon maghalad in usa ka tawo, naabot an surugoon han padi nga may dara nga tugsok nga tulo an kataisan. Samtang ginlalaga pa an karne,

¹⁴ iya na tinutugsok an ginlalaga nga karne, ngan an bisan ano nga madara han tugsok kanan padi na. Amo ini an ira ginbubuhat han mga Israelita nga napakadto ha Silo hin paghalad.

¹⁵ Labot pa hini, san-o ilain ngan tuboron an tambok, madaop an surugoon han padi ngan sisidngon an tawo nga naghahalad, “Tagi ako han unod nga igsurugba para han padi; diri hiya makarawat hin linaga nga karne, kundi karuyag niya an hilaw nga karne.”

¹⁶ Kon magbaton an tawo, “Sunda ta la an angay buhaton. Sunoga ta anay an tambok, ngan katapos, kuhaa na an imo karuyag,” masiring an surugoon han padi, “Diri ito mahihimo! Kinahanglan ihatag mo ini ha akon yana! Kon dumiri ka, pipiriton ko ini hin pagkuha!”

¹⁷ Makalilisang ini nga sala han mga anak ni Eli ha atubangan han Ginoo, kay waray gud nira pagtahod han mga halad ngadto han Ginoo.

Ginduaw hi Samuel didto ha Silo

¹⁸ Hini ngahaw nga panahon nagpadayon an bata nga Samuel hin pag-alagad han Ginoo nga nakakasul-ot hin usa nga sagrado nga lino nga tapis.

¹⁹ Kada tuig naghihimo an iroy niya hin gutiay nga bado nga hilawig ngan gindadara ini niya ngadto kan Samuel kon naupod hiya han iya bana hin pagtuman han tinuig nga paghalad.

²⁰ Niyan benebendisyonan ni Eli hi Elcana ngan an iya asawa, ngan ginsiring niya hi Elcana, “Tagan ka unta han Ginoo pinaagi hini nga babaye hin iba pa nga mga anak nga liwan han usa nga iyo iginhalad ha iya.” Katapos nira pagtuman, nauli hira.

²¹ Ginpakaupay manggud han Ginoo hi Ana, ngan nag-anak hiya hin tulo pa nga kalalaken-an ngan hin duha nga kababayen-an. Tinmubo hi Samuel dida ha pag-alagad han Ginoo.

Ginsaway ni Eli an Iya mga Anak

²² Hini nga panahon lagas na kaupay hi Eli. Nagpipinakabati hiya han ngatanan nga ginbubuhat han iya mga anak ngadto han mga Israelita, ngan nakikighilawas pa ngani hira han kababayen-an nga nag-aalagad didto han aragian han Tulda han Ginoo.

²³ Sanglit nagsiring hiya ha ira, “Kay ano nga iyo ginbubuhat ini nga mga butang? Nagsusumat ha akon an ngatanan hiunong han magraot nga iyo ginbubuhat.

²⁴ Ayaw na niyo pagbuhata ini, mga anak ko! Uraura ini hin kamaraot nga ginyiyinakan han mga tawo han Ginoo.

²⁵ Kon nakakasala in usa ka tawo kontra hin iya igkasi-tawo, makakapanalipod ha iya an Dyos; kundi hin-o in makakapanalipod hin usa ka tawo nga nakakasala kontra han Ginoo?” Kundi waray gud hira pamati han ira amay, kay nagbuot na an Ginoo hin pagpatay ha ira.

²⁶ Nagpadayon hin pagtubo an bata nga Samuel ngan nakalipay gud hiya han Ginoo ngan han mga tawo.

Nanagna Kontra han Panimalay ni Eli

²⁷ Inmabot kan Eli in usa nga manaragna dara ini nga mensahe han Ginoo: “Han mga oripon pa han hadi han Ehipto an imo ginikanan nga hi Aaron ngan an iya panimalay, nagpakilala ako kan Aaron.

²⁸ Tikang han ngatanan nga mga tribo han Israel akon ginpili an iya panimalay nga akon kapadian nga mag-aalagad didto han altar, magtutubod han insyenso, ngan magsusul-ot han efod ha akon atubangan. Ngan gintagan ko hira han katungod hin pag-angkon hin usa ka bahin han mga halad nga gintutubod didto ha altar.

²⁹ Sanglit kay ano nga naiipa ka pa han mga halad nga tinubod ngan han mga halad nga akon ginkikinahanglan tikang han akon mga tawo? Kay ano, Eli, nga imo ginpapasidunggan an imo mga anak labaw ha akon? Kay ano nga tinugotan mo man an imo mga anak hin pagkuha han gimama-upayi nga mga bahin han ngatanan nga mga halad nga iginpahinungod ha akon han akon mga tawo, sanglit magtambok na hira?

³⁰ Hadto nga panahon nagsaad ako an Ginoo nga Dyos han Israel, nga mag-aalagad ha akon nga kapadian an imo panimalay ngan an imo banay ha ngatanan nga katuigan. Kundi yana nasiring ako nga diri ko na gud ini pagtutumanon nga akon saad. Papasidunggan ko lugod adton mga nagpapasidungog ha akon, ngan tatamayon ko adton mga nagtatamay ha akon.

³¹ Pamati, maabot an panahon nga pamamatayon ko an ngatanan nga batan-on nga kalalaken-an han imo panimalay ngan han imo banay, basi waray lalake han imo panimalay nga malalagas.

³² Sasamokon ka ngan maaawa ka han ngatanan nga mga kaupayan nga akon ighahatag han iba nga mga tawo han Israel, kundi waray na malalagas dida han imo panimalay.

³³ Kundi bubuhion ko in usa han imo mga tulin, ngan mag-aalagad hiya nga padi ha akon. Kundi mabubuta hiya ngan mawawarayan gud hin paglaom, ngan aabotan hin tigda nga kamatayon an iba mo nga mga tulin.

³⁴ Kon mamatay na ha amo ngahaw nga adlaw hi Ofni ug Pinehas nga imo duha nga anak magpapakita ini ha imo nga matutuman an ngatanan nga akon iginyakan.

³⁵ Magpipili ako hin usa nga padi nga magmamatinumanon ha akon ngan magbubuhat han ngatanan nga karuyag ko ipabuhat ha iya. Tatagan ko hiya hin mga tulin nga dayuday mag-aalagad ha atubangan han akon pinili nga hadi.

³⁶ Mapakadto hito nga padi an bisan hin-o han imo mga tulin nga mahisalin nga buhi ngan maaro ha iya hin kwarta ug pagkaon, ngan makikimalooy ha iya nga pabuligon hiya han kapadian, basi may-ada niya makaon.”