1 Samuel 10 - Samarenyo Meaning-Based Bible (1984)

¹ Niyan kinmuha hi Samuel hin usa ka tibod nga lana hin olibo ngan iginbubo ini han ulo ni Saul, hinadkan hiya, ngan nagsiring, “Gindidihogan ka han Ginoo nga hadi han iya nasod Israel. Paghahadian mo an iya mga tawo ngan pananalipdan mo hira ha ngatanan nira nga mga kaaway. Ngan amo ini an tigaman nga ginpili ka han Ginoo nga hadi han iya mga tawo:

² Kon bumulag ka ha akon yana nga adlaw, igkakasugat mo in duha ka tawo hirani han lubnganan ni Raquel didto ha Selsa, ha katunaan ni Benjamin. Susumatan ka nira nga hin-agian na an mga asno nga iyo ginbibiniling, sanglit diri na kinahanglan mabaraka an imo amay hiunong hini kundi mabaraka lugod hiya hiunong ha imo, ngan waray hunong an pakiana niya, ‘Ano daw la an akon bubuhaton han akon anak?’

³ Magpapadayon ka tubtob pag-abot mo han baraan nga kahoy didto ha Tabor, diin igkakasugat mo in tulo ka tawo nga tikadto hin paghalad ngadto han Dyos didto ha Betel. Magtutugway hin tulo nga nati nga mga kanding an usa ha ira, magdadara hin tulo ka bug-os nga tinapay an ikaduha, ngan magbibitbit hin supot nga anit nga puno hin bino an ikatulo.

⁴ Makikighimangraw hira ha imo ngan ihahatag ha imo in duha ka bug-os nga tinapay ngan imo ini kakarawton.

⁵ Niyan, mapakadto ka ha Pungtod han Dyos didto ha Gabaa diin aadto in usa nga kampo hin mga Filisteohanon. Dida han aragian ngadto han bungto igkakatapo ka hin usa ka hugpo hin mga manaragna nga tilugsong tikang ha altar didto han pungtod nga nagtotokar hin mga arpa, mga gimbal, mga plawta ngan mga lira. Magsisinaragyaw ngan maggiginogliat hira.

⁶ Ha gilayon gagamhan ka han espiritu han Ginoo, ngan maapi ka han ira sarayaw ngan gogliat, ngan maiiba ka na nga tawo.

⁷ Kon mahinabo na ini nga mga butang, buhata an bisan ano nga ipapagbuhat ha imo han Dyos.

⁸ Mag-uuna ka ha akon ngadto ha Gilgal, diin makikigkita ako ha imo ngan maghahalad hin mga halad nga tutuboron nga mga halad hin pagdait. Hulat didto hin pito ka adlaw ngada han akon pag-abot ngan susumatan ko ikaw han imo pagbubuhaton.”

⁹ Han pagbaya na ni Saul kan Samuel, ginbag-o han Dyos an kasingkasing ni Saul. Ngan nahinabo hito nga adlaw an ngatanan nga iginsumat ha iya ni Samuel.

¹⁰ Han pag-abot na ha Gabaa ni Saul ngan han iya surugoon, gintapo hiya hin usa ka hugpo hin mga manaragna. Ha gilayon gingamhan hiya han espiritu han Dyos ngan nanagna hiya upod ha ira.

¹¹ An mga tawo nga iya hadto mga kilala kinmita han ira ginbubuhat, ngan naggiparupakiana hira, “Ano ba an nahinabo han anak ni Cis? Usa ba hi Saul han mga manaragna?”

¹² Nagpakiana in usa ka tawo didto hito nga dapit, “Ano man ini nga iba nga mga manaragna—hin-o man ha iyo paghunahuna an ira mga amay?” Amo ini an tinikangan han darahonon, “Nahimo na ba nga usa nga manaragna hi Saul?”

¹³ Han katapos ni Saul hin pagpanagna, kinmadto hiya han altar didto han pungtod.

¹⁴ Nakakita ha iya ngan han iya surugoon an bata ni Saul, ngan ginpakianhan hira, “Tikang kamo diin?” Binmaton hi Saul, “Nagpinamiling kami han mga asno. Han waray kami pakakaagi hini, nakigkita kami kan Samuel.”

¹⁵ Pinmakiana an bata ni Saul, “Ngan ano man an iya iginsumat ha iyo?”

¹⁶ Binmaton hi Saul, “Ginsumatan kami nga hin-agian na an mga hayop,”—kundi waray niya pagsumati an iya bata han iginsiring ni Samuel hiunong han iya pagkahimo nga hadi.

Ginkalipayan an Kahimo nga Hadi ni Saul

¹⁷ Gintawag ni Samuel an mga tawo didto ha Mispa basi magtirok ha atubangan han Ginoo,

¹⁸ ngan nagsiring ha ira, “Nasiring an Ginoo nga Dyos han Israel, ‘Gindara ko kamo tikang ha Ehipto ngan gintalwas ko kamo tikang han mga Ehiptohanon ngan han ngatanan nga iba nga mga tawo nga nagraogdaog ha iyo.

¹⁹ Ako amo an iyo Dyos nga nagtatalwas ha iyo ha ngatanan niyo nga kasamokan ngan kakurian, kundi iginsalikway ako niyo yana nga adlaw, ngan naghangyo kamo ha akon nga tagan ko kamo hin usa nga hadi. Sanglit maupay nga magpurupundok kamo ha atubangan han Ginoo pinaagi han iyo mga tribo ngan han iyo mga banay.’”

²⁰ Niyan ginpadaop ni Samuel an kada tribo, ngan ginpili han Ginoo an tribo ni Benjamin.

²¹ Niyan ginpadaop ni Samuel an mga panimalay han tribo ni Benjamin, ngan napili an panimalay ni Matri. Niyan dinmaop an kalalaken-an han panimalay ni Matri, ngan napili hi Saul nga anak ni Cis. Ginbiling hiya nira, kundi han waray hira makaagi ha iya,

²² nagpakiana hira han Ginoo, “May-ada pa ba iba?” Binmaton an Ginoo, “Aadto hi Saul, natago ha luyo han mga pinutos.”

²³ Sanglit nagdadlagan hira ngan ira gindara hi Saul ha atubangan han mga tawo. Ngan han pagtukdaw, dayag kaupay nga hitaas hiya kay an iba tubtob la ha iya sugbong.

²⁴ Nagsiring hi Samuel han mga tawo, “Iini an tawo nga ginpili han Ginoo! Waray gud usa dinhe ha aton nga masugad ha iya!” Nanggogliat an ngatanan nga mga tawo, “Mabuhi an hadi!”

²⁵ Iginsaysay ni Samuel han mga tawo an mga katungod ngan mga katungdanan hin usa nga hadi, ngan katapos iginsurat ini dida hin usa nga basahon nga iya iginbutang didto hin usa nga baraan nga dapit. Katapos, ginpauli niya an ngatanan nga mga tawo.

²⁶ Inmoli liwat hi Saul ngadto ha Gabaa. Binmunyog ha iya in pipira nga gamhanan nga mga tawo kanay mga kasingkasing ginbantad han Ginoo.

²⁷ Kundi nagsiring in iba nga waray pulos nga mga tawo, “Uunanhon hini nga tawo hin pakabuhat ha aton hin bisan ano nga kaupayan?” Gintamay nira hi Saul ngan waray gud hira humatag ha iya hin bisan ano nga mga regalo.