1 Samuel 1 - Samarenyo Meaning-Based Bible (1984)

Kinmadto ha Silo an Panimalay ni Elcana

¹ May hadto usa ka tawo nga Elcana an ngaran, sakop han tribo ni Efraim, nga nag-ukoy didto han bungto han Rama ha sagkahon nga katunaan han Efraim. Anak hiya ni Jeroham ngan apo ni Eliu, ug sakop han panimalay ni Tohu nga bahin han banay ni Zuf.

² May duha nga asawa ni Elcana, hira Ana ug Fenena. May mga anak hi Fenena, kundi waray hi Ana.

³ Kada tuig nalakat hi Elcana tikang ha Rama ngan napakadto ha Silo hin pagsingba ngan paghalad hin mga halad nga tinubod ngadto han Ginoo nga Labi Kamakagarahum, diin mga padi han Ginoo hira Ofni ug Pinehas nga duha nga anak ni Eli.

⁴ Kada paghalad ni Elcana, binabahinan niya hi Fenena ug an iya mga anak.

⁵ Ngan bisan kon labis an iya paghigugma kan Ana, tinatagan niya hin usa la ka bahin, kay pagbuot man han Ginoo nga diri hiya mag-anak.

⁶ Masukot hiya pagtamayon ug pagpakaalohan ni Fenena, kay ginhimo hiya nga baw-as han Ginoo.

⁷ Nagpadayon ini tuigtuig; kada pagkakadto nira han balay han Ginoo, duro gud an pagpinaantosa ni Fenena kan Ana nga nagtatangis nala hiya ngan diri gud nakaon.

⁸ Danay pakianhan hiya ni Elcana nga iya bana, “Ana kay ano nga nagtitinangis ka? Kay ano nga diri ka nakaon? Kay ano nga dayuday mabidoon ka man? Diri ba ako nimo minahal labaw pa hin napulo nga mga anak nga kalalaken-an.”

Nabaraka hi Eli tungod kan Ana

^9-10 Usa ka higayon, katapos nira pangaon didto han balay han Ginoo ha Silo, tinmindog hi Ana. Mabidoon gud hiya ngan duro an iya pagtinangis samtang nag-aampo hiya ngadto han Ginoo. Hito nga takna nakadto hi Eli nga padi han iya lingkoran ha ligid han porta.

¹¹ Nagsumpa hi Ana, “Ginoo nga Labi Kamakagarahum, siplati gad ako nga imo surugoon! Tan-awa an akon kasakitan, ngan hinumdomi ako! Ayaw gad ako hingalimti! Kon imo ako tagan hin anak nga lalake, nagsasaad ako nga akon hiya ighahalad ha imo ha bug-os niya nga kinabuhi ngan diri ko gud hiya aarotan.”

¹² Naiha an pag-inampoon ni Ana ngadto han Ginoo ngan gin-ininaw ni Eli an iya mga im-im.

¹³ Hilom la an iya pag-ampo; nagkikiwa an iya mga im-im, kundi waray niya tingog nga hinbabatian. Sanglit nakahunahuna hi Eli nga hubog hi Ana,

¹⁴ ngan ginsiring hiya, “Ayaw na pagpakahubog! Ayaw na pag-ininom ngan upaya na an imo panhunahuna!”

¹⁵ “Diri gad ako hubog,” binmaton hiya, “Waray gad ako pag-ininom! Masurub-on gud ako, ngan nag-inampo ako, basi makapahungaw ako han akon kakurian ngadto han Ginoo.

¹⁶ Ayaw pakasiring nga maraot ako nga babaye. Nag-inampo ako hin sugad hini kay makalolooy an akon kahimtang.”

¹⁷ Nagsiring hi Eli, “Lakat nga malinawon; ayaw na kaguol. Tagan ka unta han Dyos han Israel han imo pinangaro ha iya.”

¹⁸ Binmaton hiya, “Magmaloloy-on ka unta ha akon.” Niyan linmakat hiya, kinmaon, ngan waray na pagmabidoon.

Natawo ngan Iginhalad hi Samuel

¹⁹ Han pagkabuwas han aga binmuhat hin temprano hi Elcana ngan an iya panimalay, ngan katapos nira magsingba han Ginoo, inmoli hira ngadto ha Rama. Nakighilawas hi Elcana kan Ana nga iya asawa, ngan pinamatian han Ginoo an pag-ampo ni Ana.

²⁰ Nagburod hi Ana ngan nag-anak hin lalake. Iya ginngaranan nga Samuel, kay siring pa niya, “Gin-aro ko hiya han Ginoo.”

²¹ Inmabot na liwat an turno ni Elcana ngan han iya panimalay hin pagkadto ha Silo hin paghalad ngadto han Ginoo han tinuig nga halad nga iya saad.

²² Kundi hini nga higayon waray umopod hi Ana. Ginsiring niya an iya bana, “Malutas ngani an bata, dadad-on ko hiya ngadto han balay han Dyos, diin mag-uokoy hiya ha bug-os niya nga kinabuhi.”

²³ Binmaton hi Elcana, “Maupay man, buhata an imo ginhuhunahuna nga maupay; pabilin la anay ha balay ngada han kalutas han bata. Ngan itugot unta han Ginoo nga matuman an imo saad.” Sanglit pinmabilin hi Ana ha balay ngan ginmangnoan niya an iya anak.

²⁴ Han kalutas han bata, iya ini gindara ngadto ha Silo, ngan nagdara liwat hiya hin usa nga todo nga baka nga tulo ka tuig an panuigon, mga dose ka gantang nga harina, ngan hin usa nga supot nga anit nga puno hin bino. Gindara niya hi Samuel bisan kon bata pa ini hiya ngadto han balay han Ginoo didto ha Silo.

²⁵ Katapos pag-ihawa han baka, ira gindara an bata ngadto kan Eli.

²⁶ Nagsiring ha iya hi Ana, “Patabia daw ako; nahinumdom ka ba ha akon? Amo ako an babaye nga imo hinkit-an nga natindog dinhe, nga nag-inampo ngadto han Ginoo.

²⁷ Pinangaro ko ha iya ini nga bata, ngan pinamatian niya an akon pinangaro.

²⁸ Sanglit iginhahalad ko hiya han Ginoo. Samtang buhi pa hiya, magaalagad hiya han Ginoo.” Ngan didto nagsingba hira han Ginoo.