1 Hadi 4 - Samarenyo Meaning-Based Bible (1984)

Amo Ini an mga Opisyal ni Solomon

¹ Hi Solomon amo an hadi han bug-os nga Israel,

² ngan amo ini an iya labaw nga mga opisyal: An padi: hi Asarias nga anak ni Sadoc

³ An mga sekretaryo han palasyo: hira Elihore ug Ahias nga mga anak ni Sisa An tinaporan han mga sinurat: hi Josafat nga anak ni Ahilud

⁴ An pangulo han kasondalohan: hi Benaias nga anak ni Joyada Mga padi: hira Sadoc ug Abiatar

⁵ An puno han mga gobernador han distrito: hi Asarias nga anak ni Natan An magsaragdon han hadi: an padi nga hi Sabod nga anak ni Natan

⁶ An tinaporan han mga surugoon han palasyo: hi Ahisar An tinaporan han inoripon nga pagtrabaho: hi Adoniram nga anak ni Abda

⁷ Nagtudlok hi Solomon hin 12 nga mga gobernador hin mga distrito didto ha Israel. Hira an nag-aandam nga an ira mga distrito makahatag hin pagkaon han hadi ngan han iya panimalay. An tagsa ka gobernador na turno hin usa ka bulan kada tuig.

⁸ An nasunod amo an mga ngaran hini nga 12 nga mga opisyal ngan an mga distrito nga ira ginmamangnoan: hi Benhur: an sagkahon nga katunaan han Efraim

⁹ hi Bendecar: an mga syudad han Macas, Saalbim, Bet Semes, Elon, ug Bet Hanan

¹⁰ hi Benhesed: an mga syudad han Arubot ug Sucot, ngan an ngatanan nga katunaan han Efer

¹¹ hi Benabenadab nga nakaasawa kan Tafat nga anak ni Solomon: an bug-os nga katunaan han Dor

¹² hi Baana nga anak ni Ahilud: an mga syudad han Taanac Megido, ngan an ngatanan nga katunaan hirani ha Bet Sean, nga hirani han bungto han Saretan, ha tinmogan han bungto han Jezrael, tubtob ha syudad han Abel Mehola ngan han syudad han Jecmaam

¹³ hi Bengeber: an syudad han Ramot ha Galaad, ngan an mga baryo han Galaad, nga gintatag-iya han banay ni Jair nga usa nga tulin ni Manases, ngan an katunaan han Argob didto ha Basan, 60 ngatanan nga dagko ngan pinaderan nga mga bungto, ngan hin bronse nga mga trangka han mga ganghaan

¹⁴ hi Abinadab nga anak ni Ido: an distrito han Mahanaim

¹⁵ hi Ahimaas nga nakaasawa kan Basemat nga lain nga anak ni Solomon: an katunaan han Neftali

¹⁶ hi Baana nga anak ni Husai: an katunaan han Aser ngan an bungto han Belot

¹⁷ hi Josafat nga anak ni Parua: an katunaan han Isacar

¹⁸ hi Simei nga anak ni Ela: an katunaan han Benjamin

¹⁹ hi Gaber nga anak ni Uri: an katunaan han Galaad nga ginhadian anay ni Hadi Sihon han mga Amoreohanon ngan ni Hadi Og han Basan Labot hini nga 12, may-ada usa nga gobernador han bug-os nga tuna.

Nagmainuswagon an Pagkahadi ni Solomon

²⁰ Sugad kadamo han baras ha baybayon an mga tawo han Juda ug Israel. May-ada nira pagkaon ug irimnon, ngan maglipayon an ira kinabuhi.

²¹ Nagsakop an ginhadian ni Solomon han ngatanan nga mga nasod tikang han Salog Eufrates ha sinirangan ngadto ha Filistia ha katundan, ngan asta ngadto han pag-ultan han Ehipto ha timogan. Nagbayad ini hira hin mga buhis ngan nag-alagad hira ha iya samtang buhi pa hi Solomon.

²² Kada adlaw nagpapadara hira ngadto kan Solomon hin mga pagkaon nga 70 ka bakid nga gimamaupayi nga arina ngan 150 ka bakid nga giniling nga sebada;

²³ napulo nga mga tinangkal nga baka, 20 nga layaw nga mga baka, ngan 100 nga mga karnero, labot han magkalainlain nga mga bugsok ngan mga tamsi.

²⁴ Naghadi hi Solomon han ngatanan nga katunaan ha katundan han Salog Eufrates, tikang ha Tipsa didto ha Eufrates, ngadto ha katundan tubtob ha syudad han Gaza. Sakop niya an ngatanan nga kahadian ha katundan han Eufrates, ngan waray na hiya pagsamoka han ngatanan nga kahigrani nga mga nasod.

²⁵ Samtang buhi pa hiya, nag-ukoy ha kalinaw an mga tawo han bug-os nga Juda ug Israel tikang ha Dan ngadto ha Berseba; an kada panimalay may-ada kalugaringon nga urubasan ngan kaigosan.

²⁶ May-ada hi Solomon 40,000 nga mga kwadra hin mga kabayo para hin karuwahe, ngan 12,000 para hin mga dikabayo nga mga sondalo.

²⁷ An iya dose nga mga gobernador, an kada usa ka bulan nga igintalaan ha iya nagdara han pagkaon nga kinahanglan ni Solomon ngan han ngatanan nga nakaon didto han palasyo; dayuday hira nagdara han ngatanan nga ginkinahanglan ha palasyo.

²⁸ Naghatag liwat an kada gobernador han iya bahin han sebada ug sakati, kon diin ini pagkinahanglana, para han mga kabayo han karuwahe ngan han mga hayop ha uma.

²⁹ Iginhatag han Dyos kan Solomon in talagsaon nga kinaadman ngan kaaram ngan dako gud nga hibaro nga makuri matukib.

³⁰ Labaw pa kamakinaadmananon hi Solomon kay han mga makinaadmananon ha Sinirangan, o han makinaadmananon han Ehipto.

³¹ Amo hiya an gilalabawi nga makinaadmananon han ngatanan nga mga tawo: labaw pa kan Etan nga tulin ni Esdras, ngan kanda Heman, Calcol, ug Darda nga mga anak nga kalalaken-an ni Mahol. Nahibantog hiya ha ngatanan nga kahigrani nga mga nasod.

³² Nagkumposo hiya hin 3,000 nga darahonon ngan kapin hin 1,000 nga mga karantahon.

³³ Naghinabi hiya hiunong hin mga kahoy ngan mga tanom, tikang han mga sidro han Libano ngadto han mga gudti nga banwa nga naturok ha mga pader. Naghinabi hiya hiunong hin kamanampan, katamsihan, mga nagkakamang ha tuna, ngan kaisdaan.

³⁴ Hinbatian an iya kinaadman han kahadian ha bug-os nga kalibutan, ngan nagpadara hira hin mga tawo hin pamati ha iya.