1 Hadi 10 - Samarenyo Meaning-Based Bible (1984)

Dinmuaw kan Solomon an Rayna han Seba

¹ Hinbatian han rayna han Seba an bantog ni Solomon, ngan nasingadto hiya ha Jerusalem hin pagsari ha iya pinaagi hin magkuri nga mga pakiana.

² Nagdara hiya hin damo nga mga surugoon, sugad man hin mga kamilyo nga kargado hin mga panakot, mga alahas, ngan damo nga bulawan. Han pagkakita na niya ngan hi Solomon, ginpakianhan niya hi Solomon han ngatanan nga mga pakiana nga iya nahuhunahunaan.

³ Ginbaton ni Solomon ini ngatanan; waray butang nga makuri ha iya hin pagsaysay.

⁴ Nakabati an rayna han Seba han dako nga kinaadman ni Solomon, ngan hinkit-an niya an palasyo nga iya gintindog,

⁵ an pagkaon nga igindurot dida han iya lamesa, an mga kwarto han iya mga opisyal han palasyo, an pag-alagad han iya mga surugoon, ngan an magtahom nga mga uniporme han iya mga surugoon, an iya mga tinaporan han bino, ngan an mga hayop nga tinubod nga iya iginhalad didto ha Templo. Dako gud an iya katingala tungod han katahom hini ngatanan.

⁶ Nagsiring hiya kan Hadi Solomon, “Matuod gud an akon hinbatian didto han akon kalugaringon nga nasod hiunong ha imo ngan han imo kinaadman!

⁷ Kundi waray ako makakatuod hini tubtob han paghinganhi ngan paghikit-i ko hini ngatanan han akon kalugaringon nga mga mata. Kundi diri ngani katunga an akon hinbatian; labaw gud kaupay han iginsumat ha akon an imo kinaadman ug manggad.

⁸ Hin kapalaran han imo mga asawa! Hin kapalaran liwat han imo mga tawo nga dayuday nag-aalagad ha imo atubangan ngan nakakahigayon hin pamati han imo makinaadmananon nga mga pulong!

⁹ Pagdayawon an Ginoo nga imo Dyos! Iginpakita niya an iya kalipay ha imo pinaagi hin paghimoa ha imo nga hadi han Israel. Tungod nga padayon an iya paghigugma han Israel, ginhimo ka niya nga ira hadi, basi makahatag ka ha mga tawo hin matadong nga balaod ug katadongan.”

¹⁰ Niyan naghatag an rayna han Seba kan Hadi Solomon hin mga regalo nga mga 5,000 ka kilo nga bulawan, ngan damo kaupay nga mga panakot ngan mga alahas. Amo ini an gidadamoi nga mga panakot nga nakarawat ni Solomon tikang ha tinikangan. (

¹¹ Dugang pa hini ngatanan an kan Hiram mga barko nga nagdara hin bulawan tikang ha Ofir, nagdara liwat hin damo hin duro nga mga kahoy nga almug ngan mga alahas.

¹² Ginggamit ni Solomon an kahoy hin paghimo hin mga barandilyas han Templo ngan han palasyo, ngan hin paghimo liwat hin mga arpa ngan mga lira para han mga paratokar. Amo adto an gimamag-upayi nga mga kahoy nga almug nga nadara ngadto ha Israel; waray na masugad hadto hin kamaupay nga mga kahoy nga almug.)

¹³ Tinagan ni Hadi Solomon an rayna han Seba han ngatanan nga iya pinangaro, labot la han nahiaaraan nga mga regalo nga ginhatag ni Hadi Solomon tungod han iya kamahinatagon. Katapos inmoli hiya ngan an iya mga surugoon ngadto ha tuna han Seba.

Damo hin Duro an Manggad ni Solomon

¹⁴ Ha kada tuig nakarawat hi Hadi Solomon hin kapin hin 25,000 ka kilo nga bulawan,

¹⁵ labot han mga buhis nga tikang ha mga magparatigayon, ha mga ganansya hin patigayon, ngan ha mga hadi han Arabia ngan han mga gobernador han mga distrito nga Israelita.

¹⁶ Naghimo hi Solomon hin 200 nga higlapad nga mga taming tikang hin pinilpig nga bulawan nga an kada usa nakagamit hin mga pito ka kilo nga bulawan.

¹⁷ Naghimo liwat hiya hin 300 nga gurugudti nga mga taming nga ginbawbawan an kada usa hin hirani duha ka kilo nga bulawan. Iginpabutang niya ini ngatanan nga mga taming didto han Ruwang han Kagurangan han Libano.

¹⁸ Nagpahimo liwat an hadi hin dako nga trono. May bahin nga pinutos hin marpil ngan an iba nga bahin puraw nga bulawan.

^19-20 An trono may-ada unom nga mga balitang nga may bulto hin liyon ha ligid han kada balitang, dose ngatanan nga mga bulto hin liyon. Ha likod han trono, may-ada dagway hin ulo hin tudo nga baka, ngan ha ligid han kada hangboyan han lingkoran may-ada dagway hin liyon. Waray pa trono nga sugad hini ha bisan diin nga ginhadian.

²¹ Hinimo hin bulawan an ngatanan nga irimnan nga mga kupa ni Solomon, ngan hinimo hin puraw nga bulawan an ngatanan nga mga garamiton ha Ruwang han Kagurangan han Libano. Waray salapi nga ginggamit, kay waray pag-isipa nga mahal an salapi ha panahon ni Solomon.

²² May-ada hiya mga barko ha kalalawdan, nga nabiyahe upod han mga barko ni Hadi Hiram. Kada tulo ka tuig nabalik an iya mga barko nga may dara nga bulawan, salapi, marpil, mga urang-utang, ngan mga ulot.

²³ Linabwan hin kariko ngan kamakinaadmananon ni Hadi Solomon an bisan hin-o nga hadi ha kalibutan,

²⁴ ngan karuyag an bug-os nga kalibutan hin pagkadto ngan pamati han kinaadman nga iginhatag ha iya han Dyos.

²⁵ Nagdara hin mga regalo an ngatanan nga napakadto ha iya—mga butang nga salapi ug bulawan, mga higlawig nga panapton, mga hinganiban, mga panakot, mga kabayo, ngan mga mula. Nagpadayon ini tuig-tuig.

²⁶ Nagtukod hi Solomon hin ipangaraway nga hugpo hin 1,400 nga mga karuwahe ngan 12,000 nga mga kabayo. Iginbutang niya an pira hini ha Jerusalem ngan an iba ha iba nga mga syudad.

²⁷ Han panahon han iya pagkahadi sugad la hin bato ka kumon an salapi ha Jerusalem, ngan an kahoy nga sidro sugad kadamo han kahoy nga sikamura nga nakakaluob ha ubos nga kapungtoran han Juda.

²⁸ Kinaptan han mga magparatigayon han hadi an pagbaligya hin mga kabayo tikang ha Musri ug Cilicia,

²⁹ ngan an pagbaligya hin mga karuwahe tikang ha Ehipto. Ginbaligyaan nira an Hiteohanon ngan Siriahanon nga kahadian hin mga kabayo ngan mga karuwahe, hin tag 600 ka bug-os nga salapi an kada karuwahe, ngan tag 150 ka bug-os nga salapi an kada kabayo.