1 Cronicas 4 - Samarenyo Meaning-Based Bible (1984)

An mga Tulin ni Juda

¹ Inin masunod amo an mga anak ni Juda: hira Fares, Jezron, Carmi, Hur, ug Sobal.

² May-ada anak hi Sobal nga amo hi Raias. Amay ini hiya ni Jaat nga amay nira Aumai ug Laad. Tulin ini hira han mga Zorahanon.

^3-4 Hi Hur amo an timagurangi nga anak nira Caleb ug Efrata ug an iya mga tulin amo an nagtindog han syudad han Betlehem. May-ada tulo nga anak hi Hur: hira Etam, Fanuel, ug Ezer. Hi Etam may-ada tulo nga mga anak: hira Jezrael, Jesema, ug Jedebos. Hi Asalelfuni amo an ira bugto nga babaye. Hi Fanuel amo an amay ni Gedor ug hi Ezer amo an amay ni Hosa.

⁵ Hi Asur nga amay ni Tecoa may-ada duha nga asawa: hira Halaa ug Naara.

⁶ Hi Asur ngan hi Naara may-ada upat nga anak: hira Ausan, Hefer, Temani, ug Ahastari.

⁷ Hi Asur ngan hi Halaa may-ada tulo nga anak: hira Seret, Isaar, ug Etnan.

⁸ Hi Cos amo an amay ni Anob ug Soboba ngan an ginikanan han mga banay ni Aharehel, an anak ni Arum.

⁹ Hi Jabes amo an labi ka tinahod han iya mga kabugtoan. Ginngaranan hiya han iya nanay nga Jabes tungod kay ginkurian hiya han pag-anak niya kan Jabes.

¹⁰ Kundi nag-ampo hi Jabes ngadto han Ginoo, “Bendisyoni ako, Ginoo, ngan ihatag ha akon in hiluag nga tuna. Upod ha akon ngan bantayi ako ha ngatanan nga karat-an nga makakahatag ha akon hin kagul-anan.” Ngan pinamatian hiya han Ginoo.

Lain nga mga Lista hin mga Panimalay

¹¹ Hi Caleb, an bugto ni Sua, may-ada anak, hi Mehir. Hi Mehir amo an amay ni Eston.

¹² Hi Eston may-ada tulo nga anak: hira Betrafa, Fese, ug hi Tehina nga amay ni Naas. Mga ginikanan hira hadton mga nag-ukoy ha Reca.

¹³ Hi Kenes may-ada duha nga anak: hira Otoniel ug Saraya; hi Otoniel may-ada duha nga anak: hira Hatat ug Maonati.

¹⁴ Hi Maonati amo an amay ni Ofra. Hi Saraya amo an amay ni Joab nga amay ni Herasim. Ginngaranan hi Herasim kay an nag-ukoy hini nga dapit mga batid man han mga de arte nga buhat.

¹⁵ Hi Caleb nga anak ni Jefone may-ada tulo nga anak: hira Hir, Ela, ug Naam. Hi Ela amo an amay ni Kenes.

¹⁶ Hi Jaleleel may-ada upat nga anak: hira Sif, Sifa, Tiria, ug Asareel.

^17-18 Hi Ezra may-ada upat nga anak: hira Jeter, Mered, Efer, ug Jalon. Hi Mered nakaasawa kan Bitia, anak han hadi han Ehipto. May-ada nira anak nga babaye, hi Miriam ug duha nga lalake, hira Samai ug Jesba. Hi Jesba amo an amay ni Estamos. Hi Mered nakaasawa hin babaye nga taga-Juda ngan nag-anak hira hin tulo: hira Jared nga amay ni Gedor; hi Jeber nga amay ni Soco ug hi Idutiel nga amay ni Sanoe.

¹⁹ An bugto ni Naam gin-asawa ni Odaya. Hi Odaya amo an amay nira Ceila nga taga-Garmi ug ni Estamo nga taga-Maaca.

²⁰ May-ada upat nga anak hi Simon: hira Amon, Rina, Hanan ug Tilon. Hi Jesi may-ada duha nga anak: hira Zoet ug Benazoet.

An mga Tulin ni Sela

²¹ Hi Sela amo an usa han mga anak ni Juda. Upod han iya mga tulin hi Er, nga nagtindog han bungto han Leca; hi Laada nga nagtindog han bungto han Maresa: an banay hin mga parahablon hin lino nga nag-ukoy didto han bungto han Betasbes;

²² hi Jokim ug an mga tawo nga taga-Gozeba; hi Joas ngan hi Saraf nga nakaasawa hin mga taga-Moab nga kababayen-an ngan nag-ukoy didto ha Betlehem. (Tikang ini ha daan na kaupay nga mga sinurat.)

²³ Mga parahimo hira hin daba para han hadi ngan nag-ukoy hira didto han mga bungto han Netaim ug Gedera.

An mga Tulin ni Simeon

²⁴ Amo ini an mga tulin ni Simeon: hira Nemuel, Jamin, Jarib, Zara, ug Saul.

²⁵ Hi Selum amo an anak ni Saul; hi Salum amay ni Mabsam nga amay ni Masma.

²⁶ Hi Masma may-ada mga anak: hira Hamuel, Sacur, ug Simei.

²⁷ Hi Simei may-ada 16 nga anak nga kalalaken-an ug unom nga kababayen-an, kundi an mga kauropdan ni Simei diri damo an mga anak, sanglit waray magdamo an tulin ni Simeon; diri sugad han tribo ni Juda.

²⁸ Tubtob han panahon ni Hadi David, didto pag-ukoy an mga tulin ni Simeon hinin masunod nga mga bungto: Berseba, Molada, Hazarsual,

²⁹ Bala, Asom, Tolad,

³⁰ Batuel, Horma, Siklag,

³¹ Betmarkabot, Hazarsusim, Betberei, ug Saarim.

³² Nag-ukoy liwat hira didto hin lain nga lima nga mga dapit: ha Etam, Ain, Remon, Toquen, ug Asan,

³³ lakip an mga higrani nga mga baryo, tubtob ngadto ha timogan-katundan sugad han bungto han Baal. Amo ini an mga dapit nga ira gin-ukyan ngan may-ada nira hinipos nga sinurat bahin han ira tulin.

^34-38 An masunod amo an mga pangulo han ira banay: hira Mosobab, Jemlec, Josa nga anak ni Amasias, ug Joel, hi Jehu (an anak ni Josabias nga anak ni Saraya nga anak ni Asiel), hira Elionai, Jaacoba, Isuaya, Asaya, Adiel, Ismiel, ug Benaias, hi Siza (an anak ni Sefei nga anak ni Alon, tulin nira Idaya, Samri, ug Samaya). Tungod kay nagtitikadamo an ira mga panimalay,

³⁹ nagsarang hira hin pag-ukoy tubtob ngadto ha katundan, hirani ha Gerar, ngan didto han sinirangan nga dapit han kahamub-an han syudad may-ada nira panabsaban han ira mga karnero.

⁴⁰ Nakaagi hira hin haluag nga maglangbo nga panabsaban didto han kaumhan diin malinaw ngan murayaw an kahimtang han mga tawo. An mga tawo nga nag-ukoy anay didto amo an mga tulin ni Ham.

⁴¹ Ha panahon ni Hadi Ezequias han Juda, ini nga hinnabihan nga mga tawo kinmadto ha Gerar ngan ira ginbungkag an mga tulda ug mga payag han mga tawo nga nag-uokoy didto. Ginpaiwas nira an mga tawo ngan hira an nag-ukoy didto tungod kay haluag an panabsaban para han ira mga karnero.

⁴² An 500 nga mga kaapi han tribo ni Simeon napakadto ha sinirangan nga dapit, ngadto ha Edumea. Pinangulohan ini hira han mga anak ni Isi: hira Faltias, Naarias, Rafaias, ug Usiel.

⁴³ Pinamatay nira didto an mga tulin ni Amalec ngan didto na hira pag-ukoy ngada yana.