Zacarias 4 - Maung A Balita Biblia

Say Pasingayew a Nipaakar ed Patoonay Lamparaan

¹ Dinmago lamet imay katongtong kon anghil tan binangon to ak a singa amangon na toon naogip.

² Tinepet ko, “Antoy nanenengneng mo?” Inmebat ak, “Balituk a panangipatoonan na lamparaan. Diad tapew to walay sakey a yaung a pananginay larak. Walay pitoran lamparaan ed samay panangipatoonan, tan balang sakey et walay pitoran pananginay pabilo.

³ Walay sakey a kiew ya oliba ed kapag diking to may patoonan na lamparaan.”

⁴ Insan ko tinepet ed samay anghil, “Antoy kabaliksan da ra ya?”

⁵ Inmebat imay anghil, “Ag mo amta?” “On, ag ko amta,” ebat ko.

^10b Inkuanto may anghil ed siak, “Saramay pitoran lamparaan et sikaray pitoran mata na Katawan ya onnenengneng ed intiron mundo.”

¹¹ Insan ko tinepet ed sikato, “Antoy kabaliksan na saramay duaran kiew na oliba a wala rad nantopag a diking na samay panangipatoonan na lamparaan?

¹² Tan antoy kabaliksan na duaran sanga na oliba a wala rad abay na duaran balituk a tubo a panlalapwan na ontotoron larak na oliba?”

¹³ Tinepet tod siak, “Ag mo amta?” “Ag ko amta,” ebat ko.

¹⁴ Insan inkuanto, “Sikara yay duaran lalakin pinili na Dios tan nilanaan ton manlingkur ed sikato.”

Say Sipan na Dios ed kinen Zorobabel

⁶ Samay anghil imbaga tod kinen Zorobabel ira yan salita na Katawan: “Mampalabo ka, aliwan lapud pakapanyari na saray sondalo odino lapud dilin biskeg mo, no ag ingen lapud ispirituk.

⁷ Naandipat ed arap mo iray bangen a singa ra palandey. Napasimbalom a nipaalagey so Timplo, tan diad pangiliram na sankasamputan a bato, saray totoo iyeyag da, ‘Marakep, marakep!’”

⁸ Wala niy sananey iran salita a sinmabid siak a nanlapu rad Katawan.

⁹ Inkuanto, “Inlira nen Zorobabel so pundasion na Timplo, et sumpalen ton ipaalagey. No nagawa ya, naamtaan na saray totook a siak so angibakid sika ed sikara.

^10a Binmetel so pananisia ra lapud melmelag niy agawaan ed kimey. Balet nanengneng day Zorobabel a mangituloy na kimey a pamaalagey na Timplo, et manliket ira.”