Zacarias 14 - Maung A Balita Biblia

Say Jerusalem tan saray Bansa

¹ Asingger lan onsabi so agew a panintinsia na Katawan. Nasamsaman ed satan so Jerusalem tan naapag a sankanengneng yo iray asamsam.

² Pankakasakeyen na Katawan iray bansa a mibakal ed Jerusalem. Nadakep so siudad, nasamsaman iray kaabungan, tan napasoot iray bibii. Nibantak ed arum a bansa iray kapalduan totoo, balet ag nipaway ed siudad iray arum a totoo.

³ Insan ompaway so Katawan a mibakal ed saraman a bansa, a singa impibakal to nen saman a panaon.

⁴ Diad satan a panaon sikatoy manalagey ed Palandey na Kaolibaan, a mamaarap ed bokig na Jerusalem. Insan napaldua na maawang a patar imay Palandey na Kaolibaan manlapud bokig ya anggad sagur. Say kapaldua na palandey ondere ed bandad baybay tan say kapaldua ondere ed bandad abalaten.

⁵ No ombatik kayo ondalan kayod sayan patar ya onsabid palandey ya anggad biek a dapag. Ombatik kayo a singa ginawa na saray lalaki yo nen agawa so yegyeg diad samay panaon nen Ari Uzias na Juda. Onsabi so Katawan a Dios ko, a kaiba to ray amin ya anghil.

⁶ No onsabiy tan ya agew, anggapo lay onsabin ambetebetel a panaon ya onkigtel so danum,

⁷ odino bilonget. Wala lawas so liwawa na agew anggan panaon na labi. Say Katawan labat so makapikabat no kapigay pakagawa to ya.

⁸ No onsabi tan ya agew, onagos so masamit a danum a manlapud Jerusalem, say kapaldua onagos ed Inatey a Dayat tan say kapaldua diad dayat Mediteraneo. Ag ontonday panagos to, nepnep may tiagew.

⁹ Insan say Katawan so magmaliw ya ari ed intiron mundo; balang sakey a too et igalang to a Dios tan nakabatan da ed saksakey a ngaran.

¹⁰ Napalanas so intiron dalin manlapud Geba diad baybay ya anggad Rimon diad abalaten. Say Jerusalem mansiansian ososdungan to ray dalin ed kaliber-liber to; say siudad sakopen toy pasen a manlapud Puirta nen Benjamin ya anggad Puirta na Suyok, a kawalaan nen saman na gendat a puirta, tan manlapud Tori nen Hananel ya anggad pespesan na ubas na ari.

¹¹ Manayam ya arawid kaatapan iray totoo tan, ag la ra nataktakot na deral.

¹² Say Katawan mangipadalan na salot ed saray totood amin a bansan mibabakal ed Jerusalem. Mabilay ni ra aboluk lay laman da, saray mata ra tan say dila ra.

¹³ Diad satan a panaon gewgewen ira na Katawan tan patakoten to ra na mapalalo, kanyan singkaten na balang sakey a too so kaabay to tan kabilen to.

¹⁴ Saray totoo ed Juda et mibakal ira a mangyagel ed Jerusalem. Samsamen da ray kayamanan na amin a bansa—saray balituk, saray pilak, tan mapalaloy karakel a kawes.

¹⁵ Ondalan met so salot ed saray kabayo, diad saray mulo, diad saray kamilyo, tan diad saray asno—diad saray amin ya ayayep ed saray kampo da ray kalaban.

¹⁶ Insan amin da ray akapaliis ed patey a taga rad saray bansa a dinmodogpa ed Jerusalem, et onla rad man a tinaon a mangigalang ed Katawan a Makapanyarin-amin ya ari tan silibraan day Pista na Abung-abung.

¹⁷ No walay bansan ag onlan mangigalang ed Katawan a Makapanyarin-amin ya ari, ag ompelag ed dalin da so oran.

¹⁸ No saray Egipsio et ag da silibraan so Pista na Abung-abung, nadalan met iray salot ya ipadalan na Katawan ed balang bansa ya ag onlad Jerusalem.

¹⁹ Sikato ya so dusan niiter ed Egipto tan diad amin a bansa ya ag da silibraan so Pista na Abung-abung.

²⁰ Diad satan a panaon nitatak ed anggan batingting ya arkos na kabayo ira yan salita, “Nisaklang ed Katawan.” Magmaliw a masanto iray bangan lotowan a singa saray yaung ed arap na altar.

²¹ Amin a bangan lotowan ed Jerusalem tan diad intiron Juda et nibiig ira ya ikana ed pangigalang ed Katawan a Makapanyarin-amin. Ikana na saray totoon mangibagat a panlambungan na karni na saray ibagat. No onsabiy tan a panaon anggapo la ray mannigosio ed dalem na Timplo na Katawan a Makapanyarin-amin.