Zacarias 10 - Maung A Balita Biblia

Say Katawan Insipan toy Kilalaban

¹ Kerew kayod Katawan na oran no panaon na tiagew. Say Katawan so mangibabaki na lorem a mangipepelag na oran a mamapalambut ed saray tanaman ed kaalogan a para balang sakey a too.

² Saray totoo et mangipapanon irad saray talintaoy diriyos tan diad saray pumaparles, balet tila tan andi-kakanaan iray nanaala ran ebat. Pigarad sikaray mangipapatalus na saray kogip, balet papalikdoen da kayo labat; andi-kakanaan iray iiter dan ligliwa. Kanyan mantawtawataw iray totoon singa ra abalang a karniro. Nagugunigon ira lapud anggapoy pangulo ra.

³ Say Katawan kuanto, “Mamapasnuk ak ed saraman a sangkailin manooley ed saray totook; dusaen ko ra. Kayaryan ko ray totood Juda, tan asikasoen ko ra, siak a Katawan a Makapanyarin-amin. Magmaliw iran makapanyarin kabayok a para bakal.

⁴ Manlapud sikara iray manoley, saray pangulo, tan saray kapitan na sondalo a manoley ed saray totook.

⁵ Saray totood Juda et manalo ran singa saray sondalo a gatin-gatinan dad pitek na daladalan iray kalaban da. Mibakal ira lapud kaiba ra so Katawan, tan taloen da ray anggan kumakabayon kalaban da.

⁶ “Pabiskegen ko ray totood Juda; iyagel ko ray totood Israel. Ipawil ko rad dalin lapud inarok ira. Magmawil iran singa ra ag ko impolisay. Siak so Katawan a Dios; ebatan ko ray pikakasi ra.

⁷ Magmaliw a mabiskeg a singa saray sondalo iray totood Israel, magmaliw iran maliket a singa totoon maniinom na alak. Nanunotan na saray kabyangay boleg da yan pananalo tan manliket ira lapud saray ginawa na Katawan.

⁸ “Tawagen ko ray totook tan pantitiponen ko ra. Ilaban ko ra tan pagmaliwen ko ran dakerakel a singa samay gendat a karakel da.

⁹ Anggaman ya intaytayak ko ra ed saray bansa, nanunotan da ak diman ed arawin lugar. Sikara tan saray anak da et makapaliis irad patey tan mambabansag iran ompawil ed bansa ra.

¹⁰ Pasempeten ko ran manlapud Egipto tan Asiria tan manayam ira ed dilin bansa ra. Panayamen ko ra met ed Galaad tan diad Libano; napano na totoo so intiron dalin.

¹¹ No ondalan irad dayat na gunigon da, siak a Katawan et pareenen ko ray daluyon, tan naekatan iray kaaralman na Ilog na Nilo. Napaabeba so mapaatagey ya Asiria, tan naekalay pakayari so makapanyarin Egipto.

¹² Pabiskegen ko ray totook; igalang tan onuren da ak.” Say Katawan so nansalita.