Tobit 1 - Maung A Balita Biblia

¹ Siak si Tobit tan sikato yay istoria na impanbilay ko. Say amak et si Tobiel ya anak nen Ananiel ya anak nen Aduel. Say ama nen Aduel et si Gabael ya anak nen Rafael, tan si Rafael et anak nen Raguel a kabyangay boleg nen Asiel, a sakey ed saray kabyangay tribu nen Neftali.

² Nen peles ya Impirador na Asiria si Salmaneser, adakep ak diad dilin baley kon Tisbe, a walad baybay na Galilea, abalaten na Cades ed Neftali, baybay a sagur na Hazor, tan baybay na Pogor.

Say Impanogaw nen Tobit

³ Anggapoy pakatetelan na saray totoo ed siak legan kon nambilay, ta ginawak lawas so matonung. Naynay kon itdan na kuarta iray kakanayon ko a walad pankaukolan tan saray kaparak a Judion kaibak a nibantak ed Ninive a manonan siudad na Asiria.

⁴ Diad bandad baybay na Israel so nanayaman ko, nen wala ak nid kalangweran. Kanepegan na amin da ray tribu na Israel so mangisaklang na saray bagat diad Jerusalem. Diad amin da ray siudad na Israel, say siudad na Jerusalem so piniliy Dios a pangipaalageyan na Timplo a para masanto tan andi-anggaan a panayaman to. Balet sikamin amin a kabyangay tribu nen Neftali et ag mi labay so Jerusalem tan saray ararin nanlapud boleg nen David.

⁵ Kanyan singa amin da ray kabyangan na sayan tribu mi, oonla so pamilyak ed siudad na Dan diad kapalandeyan a baybay na Galilea. Diman kami mangibabagat ed dios a bakan balituk ya inlirad man nen Ari Jeroboam na Israel.

Matoor ed Rilihion to si Tobit

⁶ Siak labat ed saray kabyangay pamilyak so oonlad Jerusalem a manumpal na saray pistay rilihion, onung na ibabagay Ganggan nen Moises a gawaen na saray totoo. Samboten koy onlad Jerusalem a sankataruk ko ray ononan bungay tanaman ko, saray besag a kilaw na ayayep ko, say kakaplo na saray bakak, tan say bago a katkapankatlid saray karnirok. Manalagey ak ed arap na altar diad Timplo, insan ko iyawat ira yan bagat ed saray paparin kabyangay boleg nen Aaron.

⁷ Diad saray Levita a manlilingkur ed Dios diad Jerusalem, iter ko so kakaplo na trigok, alak, larak na oliba, saray bungay granada, igos, tan arum iran bungay tanaman. Kapag taon, andi baliy kumapiton taon a panagpainaway dalin, ilakok so kumadwan kakaplo na saray kayaryan ko tan gastosen koy kuarta ed panangan na pista diad Jerusalem.

⁸ Balet kapag kumatlon taon, iter koy kumatlon kakaplo na saray kayaryan ko ed saray bibiin balo tan saray olila tan saray sangkailin manaayam ed pegley na saray totook, tan pandorongoan miy panangan na pista. Ginawak ya onung ed Ganggan nen Moises, ya imbangat ed siak nen Debora ya ina nen lakik ya Ananiel. (Naolila ak nen inatey si amak.)

Matoor ed Katawan si Tobit Diad Bansan Nibantakan to

⁹ Nen binmaleg ak, inasawak si Ana a kabyangay dilin tribuk. Walay sakey ya anak min laki ya inngaran mi na Tobias.

¹⁰ Diad panaakar na panaon, adakep ak tan nibantak ak ed Asiria. Onyay istoriay inkiwalak ed Ninive a panaayaman ko natan. Legan min manaayam ed Ninive, amin a kakanayon ko tan saray kaparak a Judio et mamangan iray kakanen da ray totoon manaayam diman,

¹¹ balet ag ak akinonung.

¹² Lapud mapeget a susumpalen ko ray ganggan na Sankatageyan a Dios,

¹³ tinenyeg toy puso nen Impirador Salmaneser a pagalangan to ak, et nipasen ak a makaoley ed pansaliw na amin iray abasto na ari.

¹⁴ Kasakbayay impatey na impirador, mabetbet so iyakar kod Media a mansaliw na saray nakaukolan to. Aminsan nen wadman ak ed siudad na Rages na Media, intilak koy pigaran supot a nankargay kuarta ed kinen Gabael ya agi nen Gabrias, tan impaisinup kod sikato. Masoluk a talon lasus a kilon kuartan pilak so karga na saramay supot.

¹⁵ Kapatey nen Salmaneser, sinmalat ya impirador si anak ton Senakerib. Nagmaliw a maatap so panagbiahid saray dalan ed Media, kanyan ag ko la makakar diman.

Inkokotkot nen Tobit iray Inaatey

¹⁶ Nen peles ya impirador si Salmaneser, tinutulongan ko ray kaparak a Judio no walad sikaray nankaukolan.

¹⁷ No walad sikaray narasan, innagnag kod kanen ko; no walad sikaray nankaukolan na kawes, inter koy arum a kawes ko. No walay bangkay na kaparak a Judio a nibantak ed paway na padir na siudad, imponpon koy manepeg.

¹⁸ Aminsan ya agew, inayew nen Senakerib so Dios ya Ari na Tawen; dinusa na Dios, tan apasoot si Senakerib ya ibatikan toy Juda. Nen ompawil lan mamaarap ed Media, pinapatey toy amayamay ya Israelita lapud baleg a pasnuk to. Balet inaalak ya anggapoy makaamta ira may bangkay tan imponpon ko ra; nen anapen ira nen Senakerib, ag to ra narumog.

¹⁹ Insan walay sakey a toon taga Ninive ya imbaga tod impirador a siak so angikokotkot na totoon pinapatey to. Nen akabatan ko ya amta la na impirador iray amin a nipaakar ed siak tan maatap so bilay ko, ataktakot ak. Kanyan batik ak tan inmamut ak.

²⁰ Nalan amin iray kayaryan ko tan niiyan ed panagsinupan na kayamanay ari. Si Ana ya asawak tan si Tobias ya anak ko—sikara labat so atilak ed siak.

Inyagel na Kaanakan to si Tobit

²¹ Kalabas na sakey ya anem a simba, si Senakerib et pinatey na duaran anak ton lalaki, insan ira batik ed kapalandeyan na Ararat. Si Esarhadon a sakey ya anak nen Senakerib so sinmalat ya impirador tan tinoro ton makaoley ed amin a kuartay impirio si Ahikar a lakin anak nen Anael ya agik.

²² Kumadwa lan egnaan nen Ahikar yan kipapasen, ta nen impirador na Asiria si Senakerib, si Ahikar so atoron inkargado na alak, tisoriro, tan makaoley ed kuartan onsesegep tan gagastosen, tan sikato met so makaoley ed timbri na impirador. Lapud kaanakan koy Ahikar, insalitaan to ak ed impirador, kanyan naabuloyan ak ya ompawil ed Ninive.