Say Libro nen Job 5 - Maung A Balita Biblia

¹ Tawag ka, Job, ta nengneng mo no walay onebat ed sika. Walay siopaman ya anghil a nayarian mon piregan?

² Inaambagel tan andi-kakanaan so alablabas a panggunigon tan pansakit na linawa.

³ Akanengneng ak na saray totoon makulang-kulang a maligen so panagbilay da, balet biglan insambak iray kaabungan da.

⁴ Ag makaarawid kaatapan iray anak da; diad korti anggapoy mangyagel ed sikara.

⁵ Kanen na totoon narasan iray bungay tanaman na toon makulang-kulang— anggan saray trigon walad kasabitan— tan panggonaetan na saray napgaan a totoo so kayamanan to.

⁶ Ag ontobod dalin so kaogsan, odino onsulming ed dalin so gunigon.

⁷ Ingen manlapud sikato met lamlamang so gunigon na too, a singa panlalapud apoy na saray talagsik.

⁸ No siak so sika, onsingger ak ed Dios tan sikatoy pangipiregan koy kipapasen ko.

⁹ Ag natalusan iray gagawaen ton makapakelaw a bengatla, tan andi-tonda iray gagawaen ton milagro.

¹⁰ Ipepelag tod dalin so oran a manalog ed kaalogan.

¹¹ Say Dios so mangitanduro ed saray totoon mapaabeba tan diad saray maermen iter toy gayaga.

^12-13 Deralen to ray plano na saray totoon masilib, tan erelen tod kasiliban da iray totoon makabat, pian ag onaligwas so antokaman a gagawaen da;

¹⁴ anggan diad kagkaagwan karapkarap irad kabilongetan.

¹⁵ Balet say Dios iyaagel tod patey iray mairap-bilay; iyaagel tod panamairap na arum a totoo iray walad pankaukolan.

¹⁶ Iitdan toy ilalo iray mairap-bilay, tan ag to paeeselen iray totoon maoges.

¹⁷ Maliket so toon pepeteken na Dios! Ag mo liliknaen no dusaen to ka.

¹⁸ Beberberen na Dios iray sinusugat to; mamapasakit tan mamapaabig ed sika iray lima to.

¹⁹ Lawas iyagel to ka ed gunigon tan kaogsan;

²⁰ no panaoy eras pansiansiaen to kan mabilay, tan no panaoy bakal ipaliis to kad patey.

²¹ Say Dios ipaliis to kad panamaoges na arum a totoo; iyagel to ka no onsabiy deral.

²² Elekan moy onsabin deral tan eras, tan ag mo takotan iray masesebeg ya ayayep.

²³ Anggapoy bato so kaalogan a bakaen mo; ag kan balut dogpaan na saray masesebeg ya ayayep.

²⁴ Insan ka manayam a walay kareenan diad dalem na tuldam; no nengnengen mo ray karnirom, arawi rad kaatapan.

²⁵ Nawalaan ka na amayamay ya anak, a singa karakel na dika ed tapew na dalin.

²⁶ Mambilay kay andokey, a singa trigon ontatakken ya anggad panagani.

²⁷ Job, amta mi ya, ta abayag min inaral. Tua ya, kanyan panisiaan mo la, ta pankaabigan mo.”