Say Libro nen Job 1 - Maung A Balita Biblia

Sinubok nen Satanas si Job

¹ Walay sakey a lakin manngaray Job a manaayam ed dalin na Uz. Anggapoy pakabalawan ed sayan too, matonung, walay takot to ed Dios, tan aarawian toy kaogsan.

² Pitoray anak ton lalaki tan taloray bibii,

³ piton libo so karniro to, talon libo so kamilyo, sanlibo so baka, tan liman lasus so asno. Amayamay met so aripen to tan sikatoy sankayamanan ed Bokig.

⁴ Mansosoblayan a mamponsia ira may lalakin anak to ed kaabungan da. Ondarago ran amin ed ponsia tan lawas babagaan da ray taloran agagi ran bibii.

⁵ Kapag nasumpal so ponsia, ombangon a masaksakbay ed ontombuk a kabwasan si Job tan mangisaklang na saray bagat a popoolan a panlinis ed saray anak to, onung ed ganggan. Lawas to yan gagawaen lapud iisipen to ya ompan sakey ed saray anak to so nankasalanan diad ag to ginagalan impansalita sumpad Dios.

⁶ Nen sinmabiy agew ya onarap ed Katawan iray anghil na Dios wadman met si Satanas.

⁷ Tinepet na Katawan ed sikato “Iner so nanlapwan mo?” Inmebat si Satanas, “Manaakar-akar ak ta liliberen koy intiron mundo.”

⁸ Tinepet na Katawan, “Naimanom si aripen kon Job? Anggapoy miparad sikato. Anggapoy pakabalawan ed sikato, matonung, walay takot tod siak, tan aarawian toy kaogsan.”

⁹ Inmebat si Satanas, “Takotan ka kasi nen Job anggaman ya anggapoy nagunggona to?

¹⁰ Iyaagel mo lawas, say pamilya to, tan amin a kayaryan to. Bibindisionan moy amin a kimey to tan iitdan moy ayamayamay ya ayayep a ngalngali da nalaknabay intiron bansa.

¹¹ Balet natan, salim a paadien iray amin a walad sikato, et nengneng mo no ag to ka inayew ed dilin arap mo!”

¹² Inkuan na Katawan ed kinen Satanas, “Sigi sirin, ipalimak ed sikay amin a walad sikato, balet ag mo didiwiten si Job.” Kanyan tinmaynan lad arap na Katawan si Satanas.

Naandi ray Anak tan say Kayamanan nen Job

¹³ Aminsan ya agew nen mampoponsia ray anak nen Job ed abung na sankapangulowanan ya agi ran laki,

¹⁴ sinmabid kinen Job so sakey ya aripen. Inkuanto, “Peles min pambabaka iray baka tan mankakabkab ed asingger iray asno,

¹⁵ nen biglan dinmogpa iray Sabeo tan tinakew da ran amin. Pinatey day amin ya aripen mo likud labat ed siak. Siak labat so akabatik kanyan wadya ak a mangibalitad sika.”

¹⁶ Mansasalita ni nen sinmabi so sakey nin aripen tan kuanto, “Inatey ya amin iray karnirom tan saray mamapastol ed sikara, ta naatotan iray karul. Siak labat so akabatik kanyan wadya ak a mangibalitad sika.”

¹⁷ Mansasalita ni nen sinmabi so sakey nin aripen tan kuanto, “Dinogpaan kami na taloran grupo na saray Caldeo, imbatik da ray kamilyom. Pinatey day amin ya aripen mo likud labat ed siak. Siak labat so akabatik, kanyan wadya ak a mangibalitad sika.”

¹⁸ Mansasalita ni nen sinmabi so sakey nin aripen tan kuanto, “Manliliket a mamangan tan maniinoman iray anak mo ed abung na sankapangulowanan ya agi ran laki,

¹⁹ nen walay mabiskeg a dagem a nanlapud kalawakan. Binmasig ed abung a kawalaan da, et inatey iran amin. Siak labat so akabatik, kanyan wadya ak a mangibalitad sika.”

²⁰ Lapud saya inmalagey si Job tan pinilat toy kawes to a pangipanengneng toy ermen to. Kiniskisan toy olo to tan intiblak tod dalin.

²¹ Inkuanto, “Nianak ak a kalima-lima, ompatey ak a kalima-lima. Angiter so Katawan tan natan binawi to. Nadayew komun so ngaran to!”

²² Anggaman ya onyay agawa, ag nankasalanan si Job, ta ag to tinetel so Dios.