Saray Tagleey 5 - Maung A Balita Biblia

Pikakasin Pikerew na Panangasi

¹ Nudnunot mo pay asumpalan mi, O Katawan. Nengneng mo kami pa, tan imanom so inkaplag mid kababaingan.

² Walad lima na saray taga arum a bansa iray kayaryan mi; manaayam ed kaabungan mi iray totoon sangkaili.

³ Pinapatey na kalaban iray kaamaan mi; balo la natan iray kainaan mi.

⁴ Nakaukolan a bayaran miy danum ya iinomen mi; nakaukolan a saliwen mi ray itotongo mi.

⁵ Pinairap da kamin pinabatik a singa asno o kamilyo, naknaksawan kami, balet ag da kami abuloyan a mampainawa.

⁶ Linma kamid Asiria tan Egipto ya akikerew, pian nawalaan kamiy magenap a napambilay.

⁷ Nankasalanan iray lalaki mi tan inaatey la ra, balet maniirap kami lapud saray kasalanan da.

⁸ Ooleyan kami na saray totoon anggapoy pidomaan dad saray aripen, anggapoy mangyagel ed sikami ed pakaoley da.

⁹ Ipupusta miy bilay mi kapag mananap kamiy napambilay; lapud akar-akar ed kaalogan iray managpatey na too.

¹⁰ Lapud eras singa kami popoolan ed kapepetang mi, ya anggad ampetang lay baog mi a singa pogun.

¹¹ Diad dilin Palandey na Sion apasoot iray kaasawaan mi; diad saray bario na Juda nalnalay inkabii da ray mamarikit mi.

¹² Narel tan nibitay iray pangulo mi; ag da inggalang iray mamatakken mi.

¹³ Apasoot a manggiling iray lalakin tobun-balo tayo; mandokingking a mansasakbat na ambelat a kiew iray ogogaw a lalaki.

¹⁴ Ag la onyoyorung ed puirta na siudad iray mamatakken a lalaki, tan ag la manotogtog o mangakanta iray tobun-balo.

¹⁵ Naandi lad bilay mi so gayaga; ermen so sinmalat ed saray panagsayaw mi.

¹⁶ Anggapo lay nakdaan ed amin da ray ikikinon mi. Nankasalanan kami, kanyan pangaskasiyay kipapasen mi natan.

¹⁷ Ambelat so pagew mi lapud saya tan binmilonget so pakanengneng mi,

¹⁸ lapud anggapo lay onkitakitaw a too ed Palandey na Sion, tan saray asod katakelan so akar-akar lad saray deral-deral to.

¹⁹ Balet sika, Katawan, so ari ed anggad angga, tan mansiansia kan manoley ya anggad kapigan.

²⁰ Akin et abaybayag lay impangikaindan mod sikami? Ag mo kami la nanunotan?

²¹ Papawil mo kamid sika, O Katawan! Papawil mo kami pa! Ipawil mo pay gendat a kagalangan mi.

²² Odino andi-anggaan lay impangikaindan mod sikami? Ag la manganggay pasnuk mod sikami?