Saray Taga Roma 16 - Maung A Balita Biblia

Saray Pabanod Pigaran Totoo

¹ Ipipiak ed sikayoy agi tin Febe, a manlilingkur ed iglisia ed Cencrea.

² Lapud Katawan, awat yo onung na kanepegan a gawaen da ray totooy Dios, tan iter yo pay antokaman a nakaukolan tod sikayo, ta amayamay iray tinulongan to, tan siak so sakey ed sikara.

³ Ibanoan yo ak pad kindi Priscila tan Aquila a kaparak iran manlilingkur ed Cristo Jesus.

⁴ Imposta ray bilay da nisengeg ed siak, kanyan pisalsalamatan ko ra; aliwan siak labat so misasalamat ed sikara, no ag ingen pati amin ya iglisia da ray Hintil.

⁵ Ibanoan yo ak met ed saray kabyangay iglisian mantitipon ed abung da ra yan sanasawa. Ibanoan yo ak pa met ed pinablik ya Epeneto, a sikatoy inmona-onan anisiad Cristo dimad luyag na Asia.

⁶ Ontan met ya ibanoan yo ak ed kinen Maria a nanlingkur a maung ed sikayo,

⁷ tan kindi Andronico tan Junia a kadalaan ko ra tan kaibak irad prisowan; bantug irad saray apostol tan akaona ran nagmaliw a Cristiano nen say siak.

⁸ Ibanoan yo ak pa met ed kinen Ampliato a pinablik ed Katawan;

⁹ ontan met ed kinen Urbano, say kapara tin managlingkur ed Cristo, tan si pinablik ya Estaquis.

¹⁰ Ibanoan yo ak met ed kinen Apeles ya apaneknekan a matoor ed Cristo. Ibanoan yo ak met ed pamilya nen Aristobulo,

¹¹ tan kinen Herodion a kadalaan ko tan saray agagid Katawan a kabyangan iray pamilya nen Narciso.

¹² Ibanoan yo ak pad kindi Trifena tan Trifosa, a manlilingkur irad Katawan, tan si pinablik a Persida, a pinasyay impankimey to para Katawan.

¹³ Ibanoan yo ak met ed kinen Rufo a bantug a managlingkur na Katawan, tan si ina to ya impasen to ak ya anak a dili.

¹⁴ Ibanoan yo ak met ed kindi Asincrito, Flegonte, Hermes, Patrobas, Hermas, tan saray arum ya agagin kaiba ra.

¹⁵ Ibanoan yo ak ed kindi Filologo, Julia, Nereo tan si agi ton bii, si Olimpas tan amin a kaiba ran totooy Dios.

¹⁶ Mambabanowan kayod panamegley na inaagin angub. Ibabano kayo na amin da ray iglisia nen Cristo.

Saray Kasamputan a Bilin

¹⁷ Kerewen kod sikayo, agagi, alwaran yo ray manangigapoy pansisian da ray kabyangay iglisia, a dederalen day pananisiay totoo tan susumlangen day bangat ya inawat yo. Paliisan yo ra.

¹⁸ Saratan a klasiy totoo et ag da panlilingkuray Criston Katawan tayo, no ag say dilin pilalek da. Lapud malamlamuyot tan masamsamit a pananalita ra, ibabalang da so kanunotan da ray totoon mainomay a natanggoyur.

¹⁹ Kabkabat la na amin a matoor kayod Cristo, tan panliliketan ko yan maung. Labay kon makabat kayo no nipaakar ed kamaungan, balet anggapoy pibabali yo no nipaakar ed kaogsan.

²⁰ Say Dios a panlalapway kareenan tayo et magano lan pagatin-gatinan toy Satanas ed sikayo. Talimaen kayo komun nen Jesus a Katawan tayo.

²¹ Papaibanoad sikayo si Timoteo a kakimeyan ko. Ontan met a papaibanoan ira di Lucio, Jason, tan Sosipatro, a kadalaan ko ra.

²² Siak, a si Tercio, ya angikorit ed sayan sulat et ibabano ta kayo ed ngaray Katawan.

²³ Ibabano ki met nen Gayo a pipupundoan ko tan diad abung toy pantitiponay intiron iglisia. Ontan met, ibabano kinen Erasto a tisoriroy siudad tan si agi tayon Cuarto.

Say Kasamputan a Pangidayew

²⁵ Idayew tayoy Dios a nayarian ton pabiskegey pananisia yo, onung ed Maung a Balitan nipaakar ed Jesu-Cristo ya ipupulong ko; onung ed inkibawag na abaybayag lan niamut a katwaan.

²⁶ Nibawag la ya natan a katwaan diad panamegley na saray insusulat da ray propita; tan lapud ganggan na andi-anggaan a Dios, nipakabat ed saray amin a bansa pian manisia tan mangonur iray amin a katoowan.

²⁷ Nagalang komun ed ando lan ando, diad panamegley nen Jesu-Cristo, so bukor toy makabat a Dios! Amen.