Saray Taga Roma 13 - Maung A Balita Biblia

Say Kanepegan ed saray Manoley ed Gobirno

¹ Nepeg a toluken na balang sakey iray manoley ed gobirno; ta anggapoy pakaoley ya ag nanlapud Dios, tan saray manoley natan et pinayorung iray Dios.

² Kanyan siopamay onsumlang ed gobirno, sumlangen toy pakaoley ya inletneg na Dios, tan nadusa so toon onsumlang.

³ Saray manoley nepeg a takotan na saray managgaway kaogsan, aliwan saray managgaway kamaungan. Labay mon ag takotay toon manoley? Manggawa kay kamaungan, pian pagalangan to ka.

⁴ Ta sikatoy kumikimey na Dios tan pankaabigan moy gagawaen to. Balet takot ka no maoges so gawaen mo, ta dusaen to kan dusaen. Sikatoy kumikimey na Dios a manusa ed saray manggaway kaogsan.

⁵ Kanyan nepeg yoy ontoluk, aliwa labat a lapud labay yon paliisay pasnuk na Dios, no ag ingen lapu met ed konsinsia.

⁶ Sikato ya met so makasengeg no akin et mambabayar kayoy buis. Ta saray manoley kumikimey iray Dios tan makoli ran manusumpal ed sayan kanepegan.

⁷ Iter yo sirin ed sikaran amin so kanepegan da ya awaten; bayaran yoy lisinsia yo tan buis yo ed saray nepeg a pambayaran; takotan yo ray nepeg a takotan, tan igalang yo ray nepeg a galangen.

Say Kanepegan ed Kaparan Too

⁸ Ag kayo miuutang ed siopaman, likud ed panarowan yo. Siopamay mangarod kapara ton too sinumpal toy Ganggan.

⁹ Ta saray ganggan, “Ag ka mikakaloguran; ag ka mamapatey; ag ka mantatakew; ag ka maagom” tan arum ni ran ganggan a singa saraya et natitibokel ed sayan ganggan, “Arom so kaparam a too, a singa panangarom ed sikan dili.”

¹⁰ Say toon mangarod kapara ton too et ag manggaway antokaman a kaogsan ed siopaman. Kanyan say pangarod kaparan too panumpal ed Ganggan.

¹¹ Nepeg yo yan gawaen lapud amta yo no anto la yan panaon. Panaon lan nepeg kayon onliing, ta say kilalaban tayo et magano la natan nen samay inggapo tayon manisia.

¹² Ngalngali la mansamput so labi, tan ombubutay lay agew. Tondaan ti lay panggaway bengatlan kayaryay bilonget, tan egnaan ti la ray armas a kayaryay liwawa.

¹³ Simpitan ti lay kagagawa tayo, ta singa tayo totoon mambibilay ed liwawa; ikaindan ti lay alablabas a panagliket tan say panagbuanges, ekalen ti met la ray mabanday a likeliket na laman, pankokolkol, tan paniimonan.

¹⁴ Balet panoleyen yo lan sigput ed bilay yo so Katawan a Jesu-Cristo, tan ibeneg yo lay makasalanan ya inkatoo yo, pian ag yo la nagawaay labay to.