Saray Taga Roma 12 - Maung A Balita Biblia

Say Macristianon Panagbilay

¹ Kanyan, agagi, lapud ontan lan panangasi na Dios, kerewen kon isaklang yon mabilay a bagat ed Dios so bilay yo, bagat a masanto tan makapaliket ed sikato. Sikato yay panangigalang yod Dios.

² Ag yo aaligey panagbilay na sankamundoan. Ingen paoman yo lad Dios so panagbilay yo, pian naamtaan yoy linawa na Dios—no anto so maung, makapaliket ed Dios, tan ayadyari.

³ Lapud baleg a panangaroy Dios ed siak ibabagak ed balang sakey ed sikayo: Ag yo itatanduroy laman yon dili ya alabas nen say kanepegan to. Ingen mampaabeba kayo tan balang sakey ed sikayo sintinsiaan toy sikaton dili, onung ed sukat na pananisian inter na Dios ed sikato.

⁴ Amayamay so kabyangay laman, balet ag nampaparay kimey dan amin.

⁵ Ontan met, anggaman ya amayamay tayo, saksakey tin laman diad pikakasakey tid Cristo. Nandoroma itayon kabyangan, balet nantetekep itayod sakey a laman.

⁶ Kanyan ikana tayo ray langkap ya inter na Dios ed sikatayo, onung ed baleg a panangaro to. No say langkap na Dios ed sikatayo et say panagpulong na salita to, mampulong itayo, onung ed pananisian inter tod sikatayo;

⁷ no panaglingkur, manlingkur itayo; no panagbangat, mambangat itayo;

⁸ no panagsimbawa, manimbawa tayo. Say mangyapag na kayamanan to, nepeg a mangiter a mabonbonluk; say walad oley, mankoli; say mangasid kapara ton too, gawaen ton sililiket.

⁹ Nepeg ya anggapoy pankonkonwari so panangaro yo. Bosul yoy kaogsan, pabli yoy kamaungan.

¹⁰ Manaarowan kayo na malet, a singa dilin sanaagi; manoonaan kayo ed pangiter na dayew ed sakey tan sakey.

¹¹ Mankoli kayo tan ag kayo onngingiras. Ipapuso yoy panaglingkur yod Katawan.

¹² Manliket kid paniilalo yo, mananos kayod saray kairapan yo, tan mampikasi kayo lawas.

¹³ Tulongan yo ray agagi yon walad pankaukolan, patuloy yo ray sangkaili.

¹⁴ Kerew yod Dios a bindisionan to ray mamapasegsegang ed sikayo; on, pikasi yon bindisionan, aliwan isamba to ra.

¹⁵ Miliket kayod saray manliliket, tan minangis kid saray mannanangis.

¹⁶ Pampapara yoy panangaro yod amin a too. Ag kayo mapaatagey, no ag ingen mikaaro kayod saray mapaabeba. Ag yo ipapasen a makabkabat kayo.

¹⁷ Ag kayo ombabales na maoges ed toon nanggaway maoges ed sikayo. Gawa yoy antokaman ya ipapasen a maung na amin a totoo.

¹⁸ No nayari, diad anggaay nayarian yo, piolupan yon amiy too.

¹⁹ Ag kayo ombabawi, inararon agagi; paolyan yo lan ombawi so Dios. Ta ibabagay Masanton Sulat, “Siak so maningil, siak so ombawi, kuay Katawan.”

²⁰ Ingen, onung na ibabagay Masanton Sulat, “No narasay kalaban mo, pakan mo; no napgaan, painom mo; ta diad kababaingan to, singa ipapaagtom so ngalab ed olo to.”

²¹ Ag ka padadaeg ed maoges; nepeg mo ingen a daegey maoges diad panamegley na maung.