Saray Salmo 99 - Maung A Balita Biblia

Say Dios a Sankatageyan ya Ari

¹ Ari so Katawan, et manggiwgiw iray katoowan. Manyodyorung ed trono tod tagey da ray kirubin, et nayeyegyeg so dalin.

² Makapanyari so Katawan diad Sion; ooleyan ton amin iray bansa.

³ Idayew na amin a katoowan so matalonggaring tan mapagalang a ngaran to. Sikatoy masanto!

⁴ Makapanyarin ari, inarom so inkatonung; inletneg moy inkatonung ed Israel; inawit moy kaptekan tan kaalasan.

⁵ Idayew yoy Katawan a Dios tayo; igalang yo ed arap na trono to! Sikatoy masanto!

⁶ Di Moises tan Aaron iray papari to, tan si Samuel so sakey ed saray nampikasid sikato; tinmawag irad Katawan, et inebatan to ra.

⁷ Manlapud lusek a lorem, akisalitad sikara; inonur da ray ganggan tan saray bangat ya inter tod sikara.

⁸ O Katawan a Dios mi inebatan mo ray totoom; impanengneng mod sikara a Dios kan manamirdona, anggaman a dinusam ira lapud saray kasalanan da.

⁹ Idayew yoy Katawan a Dios tayo, tan igalang yo ed masanton palandey to! Masanto so Katawan a Dios tayo!