Saray Salmo 98 - Maung A Balita Biblia

Say Dios a Manooley ed Sankamundoan

¹ Kantaan yoy balon kanta so Katawan; nanggagaway makapakelkelaw iran bengatla! Lapud dilin pakayari tan masanton biskeg to, sikatoy analo.

² Imbawag na Katawan so impanalo to; impaamta tod saray bansa so manangilaban a pakayari to.

³ Sinumpal toy insipan tod saray totood Israel, a katekep toy ag mangoman a panangaro tan say inkatoor tod sikara. Anengneng na amin a katoowan so impanalo na Dios tayo.

⁴ Mankanta kayod liket ed Katawan, amin yon walad mundo; idayew yo diad panamegley na saray kanta tan saray maliket ya eyag!

⁵ Kantaan yo na saray dayew so Katawan! Mantogtog kayod saray arpa!

⁶ Sibuk yo ray trumpita tan saray tamboyug, tan eyag kayod liket ed Katawan ya ari tayo.

⁷ Ungol ka, dayat, tan amin da ray pinalsan manaayam ed sika; mankanta ka, dalin, tan amin da ray manaayam ed sika!

⁸ Mantipak kayo, sikayo ran ilog; mantetekep kayon mankanta a maliket diad arap na Katawan, sikayo ran kapokdulan,

⁹ ta onsasabi so Katawan a manoley ed sankamundoan. Matonung tan maptek so panoley tod amin a katoowan ed mundo.