Saray Salmo 97 - Maung A Balita Biblia

Say Dios a Sankatageyan a Manoley

¹ Ari so Katawan! Manggayaga ka, O dalin! Manliket kayo, amin yon isla na saray dayat!

² Aliber na saray lorem tan kabilongetan so Katawan; maptek tan matonung so panooley to.

³ Walay apoy ed arap to tan popoolan to ray kabosul to a walad kaliber-liber to.

⁴ Say kirmat to liliwawaan toy mundo; nanenengneng na mundo, et manggiwgiw.

⁵ Natotonaw a singa ispirma iray kapokdulan ed arap na Katawan, diad arap na Katawan na intiron mundo.

⁶ Ibabawag na katawenan so inkatonung na Katawan, tan nanenengneng na amin a katoowan so kagalangan to.

⁷ Napepelag ed kababaingan ya amin iray mangigagalang ed saray talintaoy diriyos; mandadakmomo ya amin iray diriyos ed Katawan.

⁸ Manggagayaga iray totood Sion, tan manliliket iray totood siudad na Juda lapud pananintinsiam, O Katawan.

⁹ Makapanyarin-amin a Katawan, sikay manooley ed intiron mundo; matalonggaring kan tuloy nen saray diriyos.

¹⁰ Inaro na Katawan iray mamobosul na kaogsan; iyaagel toy bilay na saray totoo to, ilalaban to rad pakayari da ray totoon maoges.

¹¹ Onsisinag so silew ed saray totoon matonung, ta onsisinag so gayaga ed saray maung a totoo.

¹² Amin yon matonung, manggayaga kayo, lapud ginagaway Katawan! Nunot yoy ginagaway masanton Dios, tan misalamat kayod sikato.