Saray Salmo 95 - Maung A Balita Biblia

Kantan Pangidayew

¹ Dago kayo, ta idayew tayoy Katawan! Lapud liket mankanta tayo ed Dios a mangyaagel ed sikatayo!

² Ondago tayod arap to a misalamat ed sikato, tan mankanta itayo na saray maliket a kanta a pangidayew.

³ Ta makapanyarin Dios so Katawan makapanyarin ari na amin da ray diriyos.

⁴ Manooley ed intiron mundo, manlapud puseg na dalin ya anggad sankatageyan iran palandey.

⁵ Manooley ed dayat a pinalsa to; tan dia met ed dalin a ginawa to.

⁶ Dago kayo, ta mandakmomo tan mangigalang itayod sikato; mantalimukor itayod arap na Katawan a Manamalsa tayo!

⁷ Sikatoy Dios tayo; sikatayoy totoon aasikasoen to, saray karniron tataganoen to. Diad sayan agew, dengel yoy ibabaga to:

⁸ “Ag yo papaawetey olo yo, a singa saray lalaki yo nen wala rad Meriba, a singa sikara nen samay agew a wala rad kalawakay Masa.

⁹ Sinali da ak diman tan sinubok da ak, anggan anengneng day ginagawak para sikara.

¹⁰ Diad loob na apataploy taon, akapasnuk ak ed saraman a totoo, Inkuanko, ‘Aliwa ran matoor! Ag da labay ya onuren iray ganggan ko!’

¹¹ Diad pasnuk ko, insambak ira, ‘Ag iran balut makaloob ed dalin a pangiteran ko komun ed sikaray inawa.’”