Saray Salmo 94 - Maung A Balita Biblia

Say Dios a Huis na Amin a Katoowan

¹ Katawan, sika so Dios a manudusa; ipanengneng mo pay pasnuk mo!

² Sika so huis na amin a katoowan; alagey ka pa tan iter mod saray mapaatagey so dusan kanepegan da!

³ Kapigan so itonda na panggayaga da ray makasalanan? Kapigan, Katawan?

⁴ Kapigan so itonda na panlalastug da ray managgaway kaogsan, tan say pampapasirayew dad saray kasalanan da?

⁵ Papasegsegangen da ray totoom, Katawan; papairapen da ray totoon kayaryan mo.

⁶ Papateyen da ray balon bibii, saray olila, tan saray sangkailin manaayam ed dalin mi.

⁷ Kuanda, “Ag itayo nanenengneng na Katawan; ag itayo nanaimano na Dios na Israel.”

⁸ Talusan yo, sikayo ran totook, agaylay inkakulang-kulang yo! Kapigay pakaaral yo?

⁹ Pinalsa na Dios iray layag tayo—ag to makadngel? Pinalsa to ray mata tayo—ag to makanengneng?

¹⁰ Pampapasnukan to ray bansa—ag to ra dusaen? Bumabangat na katoowan—anggapoy amta to?

¹¹ Amta na Katawan so nununotey totoo; amta to ya andi-kakanaan so panagnunot da.

¹² Katawan, agaylay liket na toon bibilinen mo, say toon babangatan mo na ganggan mo!

¹³ Iitdan mo na inawa no panaoy gunigon, anggad pakakotkot na abut a pamatit ed saray makasalanan.

¹⁴ Ag paolyan na Katawan iray totoo to; ag to ikaindan iray totoon kayaryan to.

¹⁵ Manari lamet so inkatonung ed saray korti, tan italindeg na amin a totoon matonung.

¹⁶ Siopay angitalindeg ed siak ed saray totoon maoges? Siopay angibad siak diad insumlang kod saray managgaway kaogsan?

¹⁷ No ag ak tinulongay Katawan, wala ak la komun a tampol ed dalin na kareenan.

¹⁸ Kuanko, “Natutumba ak”; balet inampaya ak na ag mangoman a panangarom, O Katawan.

¹⁹ No mapagpaga tan nagugunigon ak, liligligwaen tan pagagayagaen mo ak.

²⁰ Ag mo pibabalian iray maoges a huis, ya ipapasen dan onung ed ganggan so bengatlan aliwan matonung,

²¹ a mankokomplut ira sumpad saray maung a totoo, tan sisintinsiaan da na patey iray anggapoy kasalanan.

²² Balet iyaagel ak na Katawan; ilalaban ak na Dios ko.

²³ Lapud kaogsan da dusaen to ra, tan lapud saray kasalanan da deralen to ra; say Katawan a Dios tayo so manderal ed sikara.