Saray Salmo 90 - Maung A Balita Biblia

KUMAPAT A LIBRO (Saray Salmo 90–106 ) Nipaakar ed Dios tan say Too

¹ Katawan, sika lawas so abung mi diad amin ya kailalakan.

² Kasakbayay impamalsam ed saray palandey, odino impamalsam ed mundo, Dios ka la manlapud gapoy-gapo; Dios ka ya anggad angga.

³ Ibabagam ed too ya ompawil ed dabuk a gendat a kipapasen to.

⁴ Singa labat sanagew ed sika so sanlibon taon; singa ra labat karoman a linmabas la ra; singa ra labat antikey ya oras ed labi.

⁵ Iyaagos mo kamin singa delap; magangganon singa kogip so bilay mi. Singa kami dikarikan ontutubod kabwasan,

⁶ ombabaleg tan manrorosas ira, insan ira nalenes tan ompatey ed labi.

⁷ Nadederal kami lapud pasnuk mo; natatakot kami lapud sanuk mo.

⁸ Iiyan mod arap mo iray kasalanan mi, diad pasen a nanengneng mo ra iray maamut a kasalanan mi.

⁹ Napapatikeyay bilay mi lapud pasnuk mo; mansasamput a singa esaes.

¹⁰ Pitomploy taon labat so karokey na bilay mi, o walomplo no mabiskeg kami; anggaman ontan, ermen tan segsegang labat so iiter dad sikami; nanagonuyan, anggapo lay bilay mi tan naandipat kami la.

¹¹ Siopay akalikna na ontan lan belat na pasnuk mo? Siopay makaamtad takot a nayarin iter na pasnuk mo?

¹² Ibangat mo pad sikami no panoy katikey na bilay mi, et nayarin magmaliw kamin makabat.

¹³ Katawan, kapigan so itonday pasnuk mo? Kasian mo kami pan aripen mo!

¹⁴ Penek mo kami pan kinabwasan na ag mangoman a panangarom, pian mankanta tan manliket kami legay bilay mi.

¹⁵ No kaonungay inter mod sikamin ermen, leleg da ra may taon a wala kamid segsegang, ontan pa met so iter mod sikamin liket.

¹⁶ Ipanengneng mo pad sikamin aripen mo, iray makapanyarin gawgawam; iyabuloy mo komun a nanengneng da ray kabyangay boleg mo so mapagalang a pakayarim.

¹⁷ Katawan a Dios mi, bindisionan mo kami pa. Paaligwas mo kami pad amin a gagawaen mi!