Saray Salmo 89 - Maung A Balita Biblia

Kanta No Panaoy Kairapan ed Intiron Bansa

¹ Katawan, ikantak lawas so ag mangoman a panangarom; andi-anggaan ya ibawag ko so inkatoor mo.

² Amtak ya ag manganggay panangarom, tan say katooran mo et ag naderal a singa say tawen.

³ Imbagam, “Akisipanan ak ed toon pinilik; sinambaan kod managlingkur kon David,

⁴ ‘Sakey a kabyangay boleg mo so manari lawas, tan pansiansiaen kon anggad angga so panarian mo.’”

⁵ Saray katawenan ikakanta ray makapakelaw a gagawaen mo, O Katawan; ikakanta na saray masantom so inkatoor mo.

⁶ Anggapod tawen so miparad sika, Katawan; anggapod saray anghil so singa sika.

⁷ Sikay gagalangen ed tipon da ray masanto; manalalagey iran amin a natatakot ed sika.

⁸ Katawan a Dios a Makapanyarin-amin, anggapoy makapanyarin singa sika; diad amin a bengatla matoor ka, Katawan.

⁹ Ooleyan moy makapanyarin dayat; papareenen mo ray ankakabaleg a daluyon to.

¹⁰ Binibingkas mon singa bangkay so dragon a Rahab; lapud biskeg na pakayarim tinalom iray kalaban mo.

¹¹ Kayaryan moy tawen tan say dalin; pinalsam so mundo tan amin a logan to.

¹² Ginawam so baybay tan say abalaten; kakantaan ka na Palandey na Tabor tan say Palandey na Hermon lapud liket da.

¹³ Agaylay pakayarim! Agaylay biskeg mo!

¹⁴ Say panarian mo niletneg ed inkatonung tan kaptekan; nanengneng ed amin a gagawaen mo so aro tan inkatoor mo.

¹⁵ Agaylay liket da ray totoon mangigagalang ed sika diad panamegley na saray kanta, saray mambibilay onung ed panangasim!

¹⁶ Lawas iran manliliket lapud sika, tan itatanduro da ka lapud inkatonung mo.

¹⁷ Iitdan mo kami na baleg a pananalo; panataloen mo kami lapud panangasim.

¹⁸ Pinilim so manangyagel mi, O Katawan; sika a Masanton Dios na Israel initdan mo kamiy ari.

Sipan na Dios ed kinen David

¹⁹ Diad sakey a payawar nen saman, imbagam ed saray matoor a managlingkur mo, “Tinulongan koy sakey a bantug a sondalo; inter koy trono ed pinilik ed saray totoo.

²⁰ Ginawak ya ari si aripen kon David diad panamegley na impanlanak ed sikato na masanton larak.

²¹ Niwala lawas ed sikatoy biskeg ko, tan pabiskegan na pakayarik.

²² Ag ontalonad sikato iray kalaban to; ag taloen na saray maoges a totoo.

²³ Mekmeken ko ray onlalabad sikato, tan pateyen kon amin iray mamobosul ed sikato.

²⁴ Magmaliw ak a maaro tan matoor ed sikato; panaloen ko lawas.

²⁵ Palaknaben koy nanarian to, manlapud Mediteraneo ya anggad Ilog na Eufrates.

²⁶ Ikuantod siak, ‘Sikay amak tan Dios ko; Sikay manangyagel tan manangilaban ko.’

²⁷ Pagmaliwen kon anak kon pangulowan, say sankatalonggaringan ed amin da ray arari ed mundo.

²⁸ Sumpalen ko lawas so sipan kod sikato, tan mansiansiad anggad angga so impisipanan kod sikato.

²⁹ Sakey a kabyangay boleg to so lawas manari; say panarian to ag manganggan singa say tawen.

³⁰ “Balet no saray kabyangay boleg to et sumlangen day ganggan ko tan ag ira mambilay onung ed saray pananontonan ko,

³¹ no ag da italtalek iray bilin ko tan ag da sumpalen iray ganggan ko,

³² dusaen ko ra lapud saray kasalanan da; panirapen ko ra lapud saray kaogsan da.

³³ Balet ag ak ontondan mangarod kinen David, tan ag ko lingwanan a toorey sipan kod sikato.

³⁴ Ag ko deraley impisipanan kod sikato, tan ag ko bawien so anggan sakey ya insipan kod sikato.

³⁵ “Aminsan labat tan nasput la so impansipan ko diad masanton ngaran ko; ag kon balut tilaay David.

³⁶ Nawalaan lawas na saray kabyangay boleg to, tan daput onsisinag so agew asikasoen koy nanarian to.

³⁷ Ag manganggan singa bulan so nanarian to, say bulan a matoor a tasid tawen.”

Tagleey Lapud Inkataloy Ari

³⁸ Balet mamapasnuk kad pinilim ya ari; inkaindan tan impolisay mo.

³⁹ Ag mo tinoor so impisipanan mod aripen mo, tan imbantak mod dabuk so korona.

⁴⁰ Ginebam iray padir na siudad to, tan dineral mo ray tirinsira to.

⁴¹ Amin da ray ondadalan tatakewan da; elek-elekan na saray kakaabay to.

⁴² Impanatalom iray kalaban to; pinapaliket mo ran amin.

⁴³ Ginagawam ya andi-kakanaan iray armas to, tan impatalom ed bakal.

⁴⁴ Inekal mod sikatoy sitro na ari, tan imbalsak mod dalin so trono to.

⁴⁵ Pinatikey moy panaon na kabisbiskegan to, tan impelag mod kababaingan.

Pikekerew na Kilalaban

⁴⁶ Andi-anggaan so iyaamut mo, Katawan? Kapigan mangangga so dalang na pasnuk mo?

⁴⁷ Nunot mo pa, Katawan, so katikey na bilay ko; nunot mo ya ompatey ya amiy katoowan a pinalsam.

⁴⁸ Siopay makapambilay ya ag ompatey? Panon a napaliisay too so lobuk?

⁴⁹ Katawan, kawalaan da ray pakapatnagay panangarom nen saman? Kawalaan da la ra may insipan mod kinen David, lapud inkatoor mo?

⁵⁰ Ag mo pa lilingwanan, Katawan so ontan lan impakabaingan ko ya aripen mo, say ontan lan impantetepel koy impanbabalaw-balaw ed siak na saray pagano.

⁵¹ Katawan, papabaingan na saray kalaban mo so pinilim ya ari! Nileleglemew da ya anggan iner so laen to.

⁵² Andi-anggaan ya idayew to Katawan! Amen! Amen!