Saray Salmo 85 - Maung A Balita Biblia

Pikekerew na Pankaabigay Bansa

¹ Katawan, mapangasi kad dalin mo; pinaaligwas mo lamet so Israel.

² Pinaandim ya amin iray kasalanan na saray totoom, tan pinirdonam iray amin a kaogsan da.

³ Ag ka la natan mamapasnuk ed sikara, tan binmetel lay ontan lan petang na olom.

⁴ Papawil mo kami pad sika, O Dios a manangilaban mi, tan tondaan mo pa lay ag mo pakaliliket ed sikami!

⁵ Andi-anggaan so pasnuk mod sikami? Ag la ontonday petang na olom ed amin a kailalakan?

⁶ Pasimbalom pay biskeg mi, pian sikamin totoom et idayew mi ka.

⁷ Ipanengneng mo pad sikamiy ag mangoman a panangarom, O Katawan, tan iter mo pad sikamiy manangilaban a tulong mo.

⁸ Onderengel ak ed ibabagay Dios a Katawan; isisipan toy kareenan ed sikatayon dilin totoo to, no ag ti la pawilen so kaogsan tayo.

⁹ Peteg a sipaparaay Katawan a mangilaban ed saray mangigagalang ed sikato, et mansiansia ed dalin tayo so manangilaban a kiwawala to.

¹⁰ Manabet so panagaro tan inkatoor; ontan met a manlakapan so inkatonung tan kareenan.

¹¹ Say inkatoor na too ontangay manlapud tapew na dalin, tan say inkatonung na Dios onosdung manlapud tawen.

¹² Say Katawan paaligwasen to itayo, tan say dalin tayo mambungay daakan.

¹³ Manonaan ya onlad arap na Katawan so inkatonung, tan iparaan toy dalanen na Katawan.