Saray Salmo 81 - Maung A Balita Biblia

Say Kanta Para Pista

¹ Iyeyag yoy gayaga ed Dios a manangyagel tayo; ikanta yoy dayew yo ed Dios nen Jacob!

² Igapo yoy mankanta tan paknul yo ray pandirita; manogtog kayoy marakep ed saray arpa tan saray lira.

³ Sibuk yoy trumpita a pangipakabat na pista, no balo so bulan tan no tulaw.

⁴ Sikato yay ganggan ed Israel, sikato yay bilin na Dios nen Jacob.

⁵ Ingganggan to ya ed saray totood Israel nen dinogpaan toy dalin na Egipto. Narerengel koy bosis ya ag ko kabat a kuanto,

⁶ “Inekal kod takeb yo iray kairapan a sasakbaten yo; impaigatun kod sikayo ray laryon sankabembenan yo.

⁷ Tinmawag kayod siak nen nagugunigon kayo, et inlaban ta kayo. Manlapud panaamutan kod bagyo inebatan ta kayo. Diad saray sobul na Meriba, sinubok ta kayo.

⁸ Sikayo ran totook, dengel yoy pamapasakbay ko; O Israel, agaylay pampipirawat kon ondengel kayod siak!

⁹ Nepeg ya ag kayo mangigalang ed sananey a dios.

¹⁰ Siak so Katawan a Dios yo ya angipaway ed sikayod Egipto. Sangi kayo, ta pakanen ta kayo.

¹¹ “Balet ag ondengel ed siak iray totook; say Israel ag da ak toluken.

¹² Kanyan inabuloyan kon mansiansiay awet na kapusoan da, tan manggawa ray labay dan dili.

¹³ Agaylay pampirawat kon ondengel iray totook; agaylay pampirawat kon onuren da ak!

¹⁴ Taloen kon tampul iray kalaban da, tan pasukoen ko ra.

¹⁵ Saray mamobosul ed siak onggiwgiw irad takot diad arap ko; ag manganggay dusa ra.

¹⁶ Balet pakanen ta kayoy sankaabigan a trigo, tan peneken ta kayoy dilod katakelan.”