Saray Salmo 8 - Maung A Balita Biblia

Say Kagalangay Dios tan say Kagalangay Too

¹ O Katawan a Katawan mi, say talonggaring mo nanenengneng ed intiron mundo! Say dayew mo sasabien to ray katawenan;

² tan ikakanta na saray ogogaw tan saray kapangyanak. Maligen ka tan ag ka nasisigensigen na amin a kalaban mo; sarasarag mon patondaen iray onsusumlang ed sika.

³ No nengnengen koy tawen a pinalsam, say bulan tan saray bitewen ya inliram irad pasen da—

⁴ siopa so too, et nununoten mo; say mogmon too, et aasikasoen mo?

⁵ Anggaman ontan ginawam ya abebbebay kipapasen to nen say sika; kinoronaan mo na galang tan dayew.

⁶ Tinorom a manoley ed amin da ray pinalsam; impasen mon manona ed amin da ray bengatla:

⁷ saray karniro tan saray baka, tan saray ayayep ed katakelan;

⁸ saray manok tan saray sira tan amin da ray pinalsan walad dayat.

⁹ O Katawan a Katawan mi, say talonggaring mo nanenengneng ed intiron mundo!