Saray Salmo 79 - Maung A Balita Biblia

Pikekerew na Pakaiyagel na Intiron Bansa

¹ O Dios, say dalin mo et nilooban na saray pagano. Dinotakan day inkasanto na Timplom tan dineral-deral day Jerusalem.

² Impabwag dad saray manok a buitri iray bangkay na saray aripen mo, diad saray ayayep ed katakelan iray bangkay na saray totoom.

³ Imbung dan singa danum so dala da ray totoom; say dala ra inmagos ed intiron Jerusalem, et anggapoy akeraan a mangipompod saray bangkay.

⁴ Luludlureyen da kami ray kakaabay min bansa; elek-elekan tan balbalawen da kami.

⁵ Katawan, ag la mangangga so pasnuk mod sikami? Mansiansian mandarlang a singa apoy so pasnuk mo?

⁶ Pampasnukan mo pa ray bansan ag mangigagalang ed sika, saray totoon ag mampipikasid sika.

⁷ Ta pinapatey da ray totoom, tan dinederal day bansam.

⁸ Ag mo kami pa dudusaen lapud saray kasalanan da ray lalaki mi. Kasian mo kami pa natan; naandi lan amiy ilalo mi.

⁹ Tulongan mo kami pa, O Dios, tan ilaban mo kami pa; iyagel mo kami pa tan pirdonam pa ray kasalanan mi, lapud kagalangay ngaran mo.

¹⁰ Akin et tetepeten ed sikami na saray bansa, “Kawalaay Dios yo?” Ipanengneng mo pad sikami so panusam ed saray bansa lapud impangibung dad dala na saray aripen mo.

¹¹ Dengel mo pay panay-ay da ray priso tan lapud baleg a pakayarim ibolus mo pa ray asintinsiaan lan ompatey.

¹² Katawan, bales mo pan mamimpito iray arum a bansa, lapud saray impanpapabaing dad sika.

¹³ Insan sikami ran totoom, saray karniro na poluk mo, anggad anggan misalamat kamid sika tan idayew mi kad amin a panaon ya onsabi.