Saray Salmo 78 - Maung A Balita Biblia

Say Dios tan saray Totoo To

¹ Sikayo ran totook, dengel kayod bangat ko, tan imano yo ray ibabagak.

² Ikanak iray salitan manangiter na kakabatan, tan ipaliwawak iray mistirio nen saman,

³ saray bengatlan nadngel tan naamtaan mi, saray bengatlan imbagad sikami na saray lalaki mi.

⁴ Ag mi ra iyamut ed saray anak tayo; ibaga mid ontombuk a kailalakan so nipaakar ed pakayariy Katawan tan saray matalonggaring a kiwas to tan saray makapakelaw a ginagawa to.

⁵ Angiter na saray ganggan ed saray totood Israel, tan diad saray kabyangay boleg nen Jacob. Binilin to ray lalaki tayo ya ibangat dad saray anak da iray ganggan to,

⁶ pian naaralan ira na ontombuk a kailalakan, tan ibangat da met ed saray anak da.

⁷ Diad onya manilalo met irad Dios, ag da nalingwanan iray ginagawa to, tan onuren da lawas iray ganggan to.

⁸ Ag ira magmaliw a singa saray lalaki ra a matonganga tan bangar iran totoo; aliwan malet so panagmatalek dad Dios, tan ag ira nansiansian matoor ed sikato.

⁹ Saray kabyangay boleg nen Efraim, a say armas da et saray pana, et kibatiktik ira nen agew na bakal.

¹⁰ Ag da tinoor so impisipanan dad Dios; ag da tinoluk so ganggan to.

¹¹ Alingwanan da ray ginagawa to, saray milagron anengneng dan ginagawa to.

¹² Diad imatun da ray lalaki ra, nanggaway milagro so Dios, diad patar na Soan na dalin na Egipto.

¹³ Binelsay toy dayat tan pinadalan to ra; pinaalagey ton singa padir so danum.

¹⁴ No agew inwanwan to ra diad panamegley na lorem, tan no labi diad panamegley na liwawa na apoy.

¹⁵ Pinasangi to ray baton-dampay diad kalawakan, tan initdan to ray daakan a danum a nanlapud dalem na dalin.

¹⁶ Pinapaway tod baton-dampay so sobul tan pinaagos ton singa ilog so danum.

¹⁷ Balet intuloy day nankasalanan ed Dios, tan diad kalawakan sinmumpa rad Sankatageyan.

¹⁸ Ginagala ran sinubok so Dios, diad impankerew day kakanen a labay da.

¹⁹ Nansalita ray sumpad Dios tan inkuanda, “Nayarian kasi na Dios so mangiter na kakanen diad kalawakan?

²⁰ Tua a pinekpek to so baton-dampay, et tinmoroy mapmaples a danum; balet nayarian to itayo met kasin itdan na tinapay tan karni?”

²¹ Kanyan akapasnuk so Katawan nen nadngel to ra; kinabil to na apoy iray totoo to, tan linmoor so pasnuk tod sikara,

²² ta ag ira nanmatalek ed sikato tan ag ira anisia ya ilaban to ra.

²³ Balet nansalitad tawen tan ingganggan ton onlokas iray puirta to;

²⁴ initdan to ray nakan a nanlapud tawen, diad impangoran to na mana a kanen da.

²⁵ Kanyan angan iray kakanen da ray anghil. Say Dios initdan to ra na daakan.

²⁶ Pinasiplug to met so dagem ed bokig, tan diad pakayari to pinaalimbosabos toy dagem ed abalaten;

²⁷ insan pinadapo tod saray totoo to iray manok, a singa ra karakel na buer ed gilig na dayat;

²⁸ napnaplag irad pegley na kampo ra, diad kaliber-liber na saray tulda ra.

²⁹ Kanyan angan tan napnapsel iray totoo; inter na Dios so nilabay da

³⁰ Balet nen legan dan mangakan tan kasakbayan iran napesel,

³¹ akapasnuk so Dios ed sikara, et pinatey to ray sankabiskegan ed sikara, saray sankamaungan a lalakin tobun-balo na Israel.

³² Anggaman a wala ra yan agawa intuloy na saray totoo so nankasalanan; anggaman a wala ray milagron ginagawa to ag ira anisia.

³³ Kanyan singa ingas so impamaandipat tod saray agew da, tan makapataktakot so impamasamput tod saray bilay da.

³⁴ Balet kapag wala ray pateyen tod sikara, saray nakdaan onsingger irad Dios; mampatauli ra tan masimoon iran mampikasid sikato.

³⁵ Anunotan dan say Dios so manangyagel da, tan say Makapanyarin-amin so dinmagon tinmulong ed sikara.

³⁶ Balet tilan amiy salita ra, tan lastug ya amiy imbaga ra.

³⁷ Ag ira nansiansian matoor ed sikato, tan ag da sinumpal so impisipanan dad sikato.

³⁸ Balet say Dios mapangasid saray totoo to. Pinirdona to ray kasalanan da tan ag to ra pinatey. Naynay a pinokpokan toy pasnuk to, tan pinabetel toy petang na olo to.

³⁹ Anunotan ton totoo ra labat, tan singa ra dagem ya onsisiplug tan nanaandi la.

⁴⁰ Naynay iran sinmumpad sikato diad kalawakan; amimpiga-pigan pinaermen da.

⁴¹ Inolit-olit dan sinubok so Dios, tan impanpapasnuk da so Masanton Dios na Israel.

⁴² Nilingwanan day baleg a pakayari to; alingwanan da may agew ya inliktar to rad saray kalaban da,

⁴³ tan nanggagawa na saray milagro tan tanda diad patar na Soan, ed dalin na Egipto.

⁴⁴ Impagmaliw ton dala iray ilog, kanyan anggapoy nainom da ray Egipsio.

⁴⁵ Angibakid sikaray amayamay ya apangat a nampapairap ed sikara; angibaki met na amayamay a patang a nandederal ed dalin da.

⁴⁶ Angibakiy amayamay a dorun a nambubuwag ed saray tanem da, tan aneral ed saray aaniyen da.

⁴⁷ Pinapatey to ray kaubasan da diad panamegley na oran a kristal tan saray kakiewan dan igos diad panamegley na mapalalon betel.

⁴⁸ Pinapatey to met iray baka diad panamegley na oran a kristal, tan saray karniro ra diad panamegley na kirmat.

⁴⁹ Pinadalan tod sikara so ontan lan kairapan diad impangidapo toy mapalalon pasnuk tan petang na olo ya imbaki to ran singa saray anghil a managpatey.

⁵⁰ Ag to pinokpokay pasnuk to, odino kinawanan so bilay da, no ag ta pinatey to rad sakey a salot.

⁵¹ Pinatey to ray lalakin pangulowan ya anak ed amin a pamilya na Egipto.

⁵² Insan singa sakey a pumapastol, impaway to ray totoo to; tan inwanwan to ran singa poluk na karniro diad imbeltang dad kalawakan.

⁵³ Arawi rad kaatapan nen inwanwan to ra, kanyan ag ira tinmakot; balet tinabunay dayat iray kalaban da.

⁵⁴ Inyakar to rad masanton dalin to, diad kapalandeyan a sikaton diliy anakep.

⁵⁵ Pinataynan to ray totoon manaayam diman nen mankukurang iray totoo to; inapag toy dalin ed saray tribu na Israel, tan inter tod saray totoo to iray panaayaman da.

⁵⁶ Balet sinmumpa rad Makapanyarin-amin a Dios, tan sinubok da. Ag da tinoluk iray ganggan to,

⁵⁷ balet mananumpa ra tan aliwa ran matoor a singa saray lalaki ra, tan ag ira napampiaan a singa panan pikewet.

⁵⁸ Pinasanuk day Dios lapud saray paganon pasen a panangigalangan, tan pinapetang dan maung so olo to lapud saray talintaoy diriyos da.

⁵⁹ Say Dios akapasnuk nen anengneng to ya, kanyan impolisay ton sigput iray totoo to.

⁶⁰ Inkaindan toy tulda tod Silo, say tuldan nanayaman tod pegley tayon totoo to.

⁶¹ Inyabuloy ton nadakep na saray kalaban mi so Kaban na Sipanan, say tanda na pakayari tan kagalangan to.

⁶² Pinmetang so olo tod saray totoo to, tan pinaolyan ton pinatey ira na saray kalaban da.

⁶³ Inatey ed bakal iray babalolaki, kanyan anggapoy angasawad saray mamarikit.

⁶⁴ Inatey iray papari ra diad panamegley na ispada, tan ag naabuloyan a lamayan ira na kaasawaan da.

⁶⁵ Diad kaonuran, say Katawan binmangon a singa aliing ed ogip to; singa toon mabiskeg a maniingal lapud abuek.

⁶⁶ Pinapoliktar to ray kalaban to; andi-anggaan tan makapabaing so inkatalo ra.

⁶⁷ Balet impolisay to ray kabyangay boleg na Jose; ag to piniliy tribu nen Efraim.

⁶⁸ Ingen pinili toy tribu nen Juda tan say Palandey na Sion ya inararo to.

⁶⁹ Diman to impaalagey so Timplo to a kaparparay abung tod tawen; inletneg to na malmalet a singa say mundo, kanyan mansiansian anggad angga.

⁷⁰ Pinili toy aripen ton David a magmaliw ya aripen to; inala tod pastolan na saray karniro,

⁷¹ a dimay pangaasikasoan tod saray ayep to; ginawa ton ari na Israel, say pumapastol na saray totooy Dios.

⁷² Nilingwanan nen David so sikaton dili diad impangasikaso tod sikara, tan maabig so impangiwanwan to.