Saray Salmo 77 - Maung A Balita Biblia

Ligliwa no Panaoy Kaermenan

¹ Ontatawag ak na maksil ed Dios; ontatawag ak na maksil, et derengelen to ak.

² Mampikasi ak ed Katawan, no nagugunigon ak; sanlabin itatagey ko ray limak diad pampipikasik, balet ag ak naliligliwa.

³ No nunoten koy Dios, mandageyem ak; no mandalepdep ak, onkakapoy so linawak.

⁴ Kapag labi ag ak paogipen na Dios; diad mapalalon kapapagaan ko, ag ak makasalita.

⁵ Nanununotan ko ray agew a linmabas tan natatandaan ko ray taon nen saman.

⁶ Sanlabin araldalem so nununoten ko; mandadalepdep ak, tan onyay itetepet kod siak a dili:

⁷ “Say Katawan lawas to itayo la kasin ipolisay? Ag to itayo la kasi pakaliketan?

⁸ Tinmonda la kasin mangarod sikatayo? Anggapo la kasiy kana na sipan to?

⁹ Alingwanan la na Dios kasi so mangasi? Ag la kasi mangasi lapud pasnuk to?”

¹⁰ Insan inkuanko, “Say paneermenan kon tuloy et saya: aliwa lan makapanyari so Dios.”

¹¹ Nanunotan ko ray ginagawam, Katawan; natandaan koy makapakelaw iran ginagawam nen saman.

¹² Dalepdepen kon amin iray kimey mo; omamengen kon amin iray makapanyarin ginagawam.

¹³ Masanton amin iray gagawaen mo, O Dios! Anggapoy dios a miparad inkatalonggaring mo!

¹⁴ Sika so Dios a manggagawa na saray milagro; impapanengneng moy pakayarim ed saray bansa.

¹⁵ Diad panamegley na pakayarim inlaban mo ray totoom, saray kabyangay boleg nen Jacob tan Jose.

¹⁶ Ataktakot iray danum nen anengneng da ka, O Dios, tan ginmiwgiw so dalem na dayat.

¹⁷ Angipelag na oran iray lorem, kinmarul so tawen, tan kinmirmat ed amin a pasen.

¹⁸ Tinmolin-tolin so dalagurog na karul mo, tan niliwawaan na kirmat so intiron mundo; ayakayak tan ayegyeg so dalin.

¹⁹ Nanakar kad saray daluyon; binaliw moy aralem a dayat, balet ag nanengneng iray bakat na salim.

²⁰ Diad panangipangulo di Moises tan Aaron, singa ka pumapastol ya angiwanwan ed saray totoom.