Saray Salmo 76 - Maung A Balita Biblia

Say Dios a Mananalo

¹ Say Dios kabat dad Juda; galgalangen day ngaran to ed Israel.

² Walad Jerusalem so abung to; manaayam ed Palandey na Sion.

³ Diman to pinoter iray pana da ray kalaban, saray samper tan saray ispada ra, tan amin ya armas dan para bakal.

⁴ Ontan lay kagalangan mo, O Dios! Ontan lay inkatalonggaring mo legan mon ompapawil manlapud saray palandey ya analoan mod saray kalaban mo.

⁵ Naandian na asamsam iray masebeg a sondalo ra; tan natan nanaogip la ra na ogip na patey; anggapoy anggan sakey ed sikara so akapangikanay armas to.

⁶ Nen nampasnukan mo ra, O Dios nen Jacob, atumtumban inaatey iray kabayo tan saray akakabayo.

⁷ Balet sika makapataktakot ka. Siopay makakpel ya onarap ed sika no mamapasnuk ka?

⁸ Manlapud tawen, impaamtam so sintinsiam; tinmakot so mundo tan nandeen,

⁹ nen inmalagey kan mangiter na sintinsia, a pangilaban mod amin da ray napapairap diad tapew na dalin.

¹⁰ Say pasnuk na totoo mansusumpal lamlamang ed lalon pangidayew dad sika; saray ag inatey ed bakal, ituloy dan silibraan iray pistam.

¹¹ Sumpal yo ray insipan yod Katawan a Dios yo; amin yon kaliber-liber a bansa, mangawit kayo ray rigalod sikato. Say Dios patatakoten tod sikato iray totoo;

¹² papaabebaen to ray mapaatagey a prinsipi, tan tataktakoten to ray arari diad tapew na dalin.