Saray Salmo 75 - Maung A Balita Biblia

Say Dios a Huis

¹ Misasalamat kamid sika, O Dios; misasalamat kamid sika! Ibabawag mi so ontan lan inkatalonggaring mo, tan sasalitaen mi ray makapakelaw a bengatlan ginagawam!

² Kuay Dios, “Inggetar ko la so oras na panintinsia, et maptek so panintinsiak.

³ Anggan nayegyeg so mundo tan onggiwgiw ya amin iray katoowan, pansiansiaen kon malet iray pundasion to.

⁴ Ibabagak ed saray totoon maoges ya ag ira manlalastug;

⁵ ibabagak ed sikaran tondaan da lay mampasirayew.”

⁶ Say pananintinsia ag manlalapud bokig o sagur; ag met manlalapud baybay o abalaten;

⁷ say Dios so huis, wala ray sisintinsiaan ton nankasalanan tan wala ray ag nankasalanan.

⁸ Bembembenay Katawan so kupa, a napnoy mabayanin alak na pasnuk to. Ibabales to tan iinomen na amin a totoon maoges; ooputen da ya anggad kaonuran a terter.

⁹ Balet ag ak ontondan mansalita na nipaakar ed Dios nen Jacob, odino mankanta na panangidayew ed sikato.

¹⁰ Poteren toy pakayari da ray totoon maoges, balet naaruman so pakayari da ray matonung.