Saray Salmo 72 - Maung A Balita Biblia

Say Pangipikasid Ari

¹ O Dios, ibangat mo pay ari a manintinsia onung na inkatonung mo; pinabang mo rad dilin kaptekan

² pian maptek so panoley tod saray totoom, tan matonung so panoley tod saray napapairap.

³ Onaligwas komuy dalin; manari komuy katonungan.

⁴ Maptek komuy panintinsiay ari ed saray mairap-bilay; tulongan to komun iray walad pankaukolan, tan taloen to ray managpairap ed sikara.

⁵ Igalang ka komun na saray totoom anggad onsisinag ni so agew, legan ya onliliwawa niy bulan, diad amin a panaon.

⁶ Say ari et magmaliw komun a singa oran ya ompelag ed kaalogan, singa mayamaya ya ondadapod dalin.

⁷ Ombolaslas komuy katonungan anggad mambibilay ni so ari, tan manari komuy kareenan, anggad onliliwawa ni so bulan.

⁸ Manlapud dayat ya anggad dayat so sakop na nanarian to, manlapud Ilog na Eufrates ya anggad saray samput na dalin.

⁹ Ondakmomod sikaton amin iray totood kalawakan; ontakbad dabuk iray kalaban to.

¹⁰ Saray arari na Espanya tan saray arari na saray isla et mangiter irad sikato na saray rigalo; saray arari na Arabia tan Etiopia et mangiter irad sikato na saray bagat.

¹¹ Ondakmomod sikato komun ya amin iray arari; manlingkur ed sikato ray amin a bansa.

¹² Iyaagel to ray mairap-bilay ya ontatawag ed sikato, saray walad pankaukolan tan saray napapaolyan.

¹³ Maabagey ed saray makapoy tan saray mairap-bilay; ilalaban toy bilay da ray walad pankaukolan.

¹⁴ Iyaagel to rad kalalames tan kakairapan da; mabli ed sikato ray bilay da.

¹⁵ Andokey komun so bilay na ari! Naitdan komun na balituk a manlapud Arabia; nipikasi komun lawas; nabindisionan komun lawas na Dios!

¹⁶ Dakel komuy naani ed dalin; natoboan komun na tantanaman iray nipokpokdul a pasen, tan mabunga ran singa saray walad Libano. Napano komun na totoo iray siudad, a singa karakel na malambut a dikarikad alog.

¹⁷ Ag komun nalingwanan so ngaran na ari; mansiansia komun a singa agew so inkabantug to. Amin a bansa kerewen da komun ed Dios a bindisionan to ra a singa impamindision tod ari.

¹⁸ Idayew yoy Katawan, say Dios na Israel! Sikato labat so manggagawa na sarayan makapakelkelaw a bengatla.

¹⁹ Idayew yon anggad angga so mapagalang a ngaran to! Panoen komun na kagalangan to so intiron mundo! Amen! Amen!

²⁰ Sikato yay samput na saray pikakasi nen David a lakin anak nen Jesse.